Kra ƀòn ồng Cao Dáng, kòn cau Rơglai, ơm tàm thôn A Xây lài do neh uă nam là Củ tịc Anih duh broă Làng bol, Ƀí thư Đảng ủy xã Khánh Nam, kơnhoàl Khánh Vĩnh là dùl xã geh tus 80% làng bol ơm kis là làng bol jơi bơtiàn dồ êt nă cau. Ală nam hơ̆, bơta jơgloh, rƀah gơ jăt sùm làng bol. Ồng Cao Dáng neh khin cha tam gơl bơh tùc kòi mìr tus tam kòi sre, tờ tơnau ròng ka, tam tàu, tam plai bung…Tŭ do, hìu bơnhă geh 2 lồ tàu, 2 lồ keo bơtờp sơntìl pa, 3 sào plai bung kơmhò tơlir gơ ai priă lơh geh sùm. Gŏ ồng Cao Dáng lơh sa cồng nha, làng bol jơi bơtiàn dồ êt nă cau tàm thôn, tàm xã lơh jăt, bơh hơ̆ uă hìu bơnhă neh klàs rƀah. Ồng pà gĭt: “Làng bol tàm thôn sền he lơh, khi lùp bơsram, lơh jăt. Tam chi sa plai pal geh phơng sơngka sền gàr, jì wàs sươn sàng goh, tuh dà nàng tờm chi in bơtàu tơngguh pràn, mhar gơ ai plai. Làng bol kòn cau Rơglai khi gŏ he lơh, khi kung lơh jăt bal sơl. Añ bơto ai làng bol in lơh. Lài do, tàm thôn do dồ êt mơya tus tŭ do uă hìu bơnhă neh tam chi sa plai, lơh sươn”.

Lồi nam 2021, kơnhoàl Khánh Sơn gam mờr 5 rbô hìu rƀah, hìu pa jơh rƀah, geh tus rlau 66% khà làng bol ơm kis; ai kơnhoàl Khánh Vĩnh gam rlau 5 rbô hìu rƀah, hìu pa jơh rƀah, geh tus mờr 60% khà làng bol ơm kis. Tài bè hơ̆, do là 2 tàm khà 74 kơnhoàl rƀah ngan rlau jơh gùt lơgar tơngai bơh nam 2021- 2025.

Mờ bơta jơh nùs lơh ngai ai 2 kơnhoàl gờñ lik klàs bơh kơnhoàl rƀah, càr Khánh Hoà neh tơrgùm priă jền bơh Dà lơgar, bơh ƀòn lơgar mờ hòi tơrgùm uă bơnah priă jền ndai nàng bơcri, lam lơh ndrờm bal ală broă lơh bơtàu tơngguh lơh sa- mpồl bơtiàn. Bơdìh mờ bơcri priă lơh phan bơna den càr Khánh Hoà sền gròi ngan ală broă lơh tơrlòng lài broă lơh broă sa, tơngguh priă lơh geh, tơrmù rƀah ai tơl hìu làng bol in. Ală broă lơh tơrlòng lài tam gơl chi tam, ròng siam phan geh lam lơh dồ ròt bal tus ală thôn, ƀòn. Ờ mìng bơto pơlam, pà chi sơntìl lơm mờ ală đảng viên, cau geh bơngă pin dờn gam lơh lài, lơh krơh nàng làng bol tàm mpồl bơtiàn in lơh jăt. Ală cau geh bơngă pin dờn gam mblàng yal, hòi jà làng bol tơngguh uă jơnau wă wờng, bồ tơnggoh gĭt wă kơnờm tàm bơta pràn is brồ guh bơh hìu rƀah, hìu pa jơh rƀah dê. Kra ƀòn ồng Mấu Xuân Nghi, ơm tàm thôn Dốc Gạo, ƀòn drà dềt Tô Hạp, kơnhoàl Khánh Sơn, càr Khánh Hoà pà gĭt: “Lơh phan bơna mìng tam sầu riêng, tam bơrlŭ bal mờ tờm prìt nàng geh phan ngui sa pah ngai. Cau làng bol jơi bơtiàn dồ êt nă cau bơh chờm tam gam dồ êt ờ hềt geh uă mờng chài. Bol hi tam pà bal mờ khi, geh bơta sền gròi bơh Dà lơgar dê ai pơlam tàp lơh tơn tam chi, tŭ do uă ngan cau tam. Cau dồ êt kung 200 tờm, geh cau tam tus dồ lồ, geh hìu bơnhă neh tơl ngui tơl sa rlau”.

04 nam do, kes priă Dà lơgar mờ ƀòn lơgar dê neh bơcri ai kơnhoàl Khánh Sơn in rlau 600 tơmàn đong. Tus lồi nam 2024, dùl tàm ală bơta pơnrơ bơh kơnhoàl dê là neh lơh geh ală broă jàu lik klàs bơh kơnhoàl rƀah; khà hìu rƀah, hìu pa jơh rƀah gơmù mhar tŭ mìng gam rlau 31%. Priă lơh geh kờp bal dồ nă cau bơh kơnhoàl dê geh 36 tơlak 120 rbô đong dồ nam, gơguh mờr bàr dơ̆ pơndrờm mờ lồi nam 2020.

Tus tŭ do, kơnhoàl Khánh Sơn neh lik klàs bơh sră cih măt kơnhoàl rƀah, gờñ rlau 1 nam pơndrờm mờ jơnau kờñ bơh Jơnau lơh nền tàm pơrjum bơh Pơrjum dờng Đảng ƀộ kơnhoàl dê sồr, là bơnàng jă kwơmàng nàng kơnhoàl in kơlôi tus ală jơnau kờñ dờng rlau. Ồng Bùi Hoài Nam, Ƀí thư Huyện ủy kơnhoàl Khánh Sơn, pà gĭt: broă lơh sa sươn sre gam là gah lơh sa tờm tŭ geh tus rlau 70% tàm rơndăp lơh sa, kung là gùng dà nàng kơnhoàl in “tơn jơh rƀah” mhar tàm ală nam rềp ndo mờ geh kơ̆p gờn pờ tơlik gùng dà dong làng bol brồ guh gơgơs hìu tơl ngui tơl sa, hìu pas sơm. Jơh gùt kơnhoàl geh 29 nă cau geh jờng rơ là cau geh bơngă pin dờn, tàm hơ̆ 24 nă cau là đảng viên, do là mpồl cau tờm nàng kơnhoàl geh ală jơnau kờñ dờng rlau tàm tơngai tus. Ồng Bùi Hoài Nam, yal: “Tơngguh uă gơnoar broă cau geh bơngă pin dờn dê tàm mpồl bơtiàn, khi là ală cau geh priă lơh geh uă bơh ală broă lơh tơrlòng lài broă lơh sa sươn sre tàm kơnhoàl Khánh Sơn. Bơh hơ̆, pơn jăt tai rề ơnàng lơh uă ală broă lơh tơrlòng lài lơh sa, tơngguh uă bơta gĭt wă sền gàr tiah ơm kis, làng bol brồ guh rềp mờ ù, rềp mờ sươn lơh pas dipal. Mờr tus, kơnhoàl rơ̆p geh ală broă jàu nđờ hìu klàs rƀah kơnhăp, khà pas, tơl ngui tơl sa tàm mpồl bơtiàn jơi bơtiàn dồ êt nă cau”.

Ồng Nghiêm Xuân Thành, Ƀí thư Tỉñ ủy càr Khánh Hoà neh sồr 2 kơnhoàl: Khánh Sơn, Khánh Vĩnh tơnơ̆ tŭ geh dờp lik klàs bơh kơnhoàl rƀah, kràñ cê kơ̆ dơn ờ geh gơtìp rƀah wơl mờ pal bơtàu tơngguh gơgơs kơnhoàl bơtàu tơngguh đau, kơnhoàl pas bơh bơta pràn tờm tàm dơlam is he dê. Kờñ bè hơ̆, ală tiah pal gĭt loh tam pà ală priă jền bơcri. Broă bơcri pal geh di broă, di anih, lơh gơlik geh bơta gơn kơnờm bơtàu tơngguh. Jăt ồng Nghiêm Xuân Thành, ală tiah kờñ pal sền ngăc broă bơtàu tơngguh li la ală chi tam geh bơta kwơ phan bơna uă, bơtàu tơngguh lơh sa gơ jăt bal lơh sa mờ sền gàr tiah ơm kis ƀòn brê bơnơm. Ồng Nghiêm Xuân Thành, sồr: “Đảng viên lòt lài, làng bol ƀòn lơgar jăt tơnơ̆ bè bơtàu tơngguh broă lơh sa sươn sre cèng wơl cồng nha uă ngan, brơn brài ngan. Ală oh mi neh lam lơh ală jơnau neh lơh nền, mblàng yal, hòi jà cau làng bol mờ lòt lơh lài. Ală oh mi tàm ƀòn lơgar neh tề lam mờ mŭt lơh bal bơh să tờm ală oh mi dê. Bơta pơnrơ niam bơh càr Khánh Hoà dê là gơmù rƀah, gơguh tơl ngui tơl sa, gơguh pas. 2 kơnhoàl klàs rƀah lài dồ nam, do là bơta lơh ngan dờng ngan. Klàs rƀah là tŭ tơngai geh bơta kah yau”.