Cau ùr càr Dăk Lăk pơgồp bal bơta pràn bơ̆t bơtàu ƀòn lơgar pa bơh broă tơrlòng lơh “3 kloh”
Thứ hai, 14:01, 23/12/2024 Cau mblàng Ndong Brawl/Cau cih H’ Xíu (VOV Tây Nguyên) Cau mblàng Ndong Brawl/Cau cih H’ Xíu (VOV Tây Nguyên)
VOV4.K'Ho- Mờ broă lơh mùl màl jơh broă tơrlòng lơh “3 kloh” là kloh hìu, kloh gùng lòt, kloh bơnhă ồs gơs ală broă lơh mùl màl, cau ùr càr Dăk lăk gam lơh ngan pơgồp bal tàm bơnah broă lơh jăt ală jơnau kờñ bè tiah kis mờ kloh niam phan sa, tus bal mờ gơnoar atbồ ƀòn lơgar bơ̆t bơtàu ƀòn lơgar pa.

Mho ngai dơ̆ prao pah poh, ală oh mi cau ùr tàm ƀòn H’ Đinh, xã Cư̆ Dliê Mnông, kơnhoàl Cư̆ Mngar, càr Dăk Lăk tơrgùm bal nàng pơs wàs kloh niam gùt dar ƀòn ơm kis. Mờ broă lơh ngan bơh ală oh mi cau ùr, gùng mŭt tàm ƀòn neh kloh niam, ală pơngàr geh tam bơkào niam, tiah kis ngai sơlơ tơlir, kloh, niam. Lŏ H’ Nhi Byă, kis tàm ƀòn H’ Đing yal, tơl hìu tàm ƀòn ndrờm hơ lơh jăt broă gàr kloh niam gùt dar hìu, ờ ròng krơ̆ kơnrồ, iar, ơda tàm tiah rềp mờ hìu mờ sùm pơs wàs kloh niam, rơndăp hìu đam niam bơnĕ. “Tus bal pơs wàs kloh niam gùt dar hìu, tus bơsram bal, tam pà bal broă lơh mờng chài bè broă sền gàr tiah kis kloh niam, gàr niam bơta niam chài jơi bơtiàn dê”.

Tus bal broă tơrlòng lơh, bal mờ broă gàr kloh niam tiah kis, ală oh mi cau ùr gam tus bal tàm broă bơtàu tơnguh lơh sa, tam is biăp, lơh wơl mờ lơh geh sùm broă tàñ ồi yau ờs mờng. Lŏ H’ Muôi Byă, Atbồ broă lơh tơrlòng “Hìu nhă lơngăp lơngai, tơlir, kloh, niam, niam chài” ƀòn H’ Đing pà git, bơh broă tơrlòng lơh do geh dong kờl oh mi cau ùr tam gơl jơnau git wă, tus bal lơh ală jơnau kờñ geh ai bè “3 kloh”. “Ai tơl tơngu me, jơnau kờñ geh ai lơh broă mờ tơl nă cau neh dan hơ lơh jăt di mờ jơnau pal jăt neh geh ai. Lài ngan là lam oh mi bơ̆t bơtàu tiah kis kloh niam, sùm pơs wàs hìu đam, ƀlàng hìu, suơn rơbòng, rơndăp hìu đam niam bơnĕ, kloh niam, tam cah is ală bơta siồ siă, tơrmù ngui ală kơl dung nilong. Lơh, ntrờn wàng ròng kơnrồ, iar, ơda ngài mờ hìu ơm”.

“Hìu nhă lơngăp lơngai, kloh, tơlir, niam, niam chài” là dùl tàm ală broă tơrlòng lơh geh cau ùr càr Dăk Lăk ai lơh nàng dờp bal dơ̆ lam sồr bơ̆t bơtàu hìu nhă “5 ờ 3 kloh” geh Mpồl cau ùr Dà lơgar lam lơh. Tàm 3 nam do, cau ùr càr Dăk Lăk neh lơh mờr 1 rơbô broă lơh, bơnah broă, tơrgùm tàm ală khà broă bè tormù rơƀah, hìu ơm, tiah kis mờ gùng lòt. Bal mờ hơ̆, cau ùr tàm càr gam pơgồp bal niam tàm broă lơh sa, kă bro phan kloh niam. Bè tàm xã Quảng Hiệp, kơnhoàl Cư̆ Mngar. Mpồl cau ùr neh lam ală hìu lơh sa, lơh gơs phan sa cih jơnau hơ bal gàr kloh niam phan sa mờ geh sùm broă lơh suơn tam biăp gơboh gơbài. Mò Võ Thị Trang, Củ tịc Mpồl cau ùr xã Quảng Hiệp pà git: “Bol añ bơyai lơh 22 hìu lơh, ai phan, lơh phan ngui sa dan lơh jăt bè kloh niam phan sa, geh sùm broă lơh 200 broă tơrlòng lơh biăp gơboh gơbài, bơh tŭ hơ̆ lam ală cau tàm mpồl, cau ùr lơh phan sa kloh niam. Geh sùm boă tơrlòng lơh tơrgùm siồ siă nàng tă tàm Kes priă dong kờl cau ùr rơƀah tàm Mpồl cau ùr ƀòn Hiệp Hưng in”.

Bơdìh mờ ală broă lơh mùl màl, srơh broă lơh “3 kloh” gam geh Mpồl cau ùr ală kấp tàm càr Dăk Lăk lơh uă bơh ală broă lơh mblàng yal, lam làng bol lơh wơl mờ bơ̆t bơtàu tiah kis kloh niam. Jăt mò Lê Thị Thu Hiền, Củ tịc Mpồl cau ùr kơnhoàl Cư̆ Mngar đơs, mờ bơta krơi is là tiah geh gal làng bol jơi bơtiàn ờ gal cau, bơta ngăc ngar tàm làng bol ờ ndrờm bal, mpồl cau ùr ală kấp tàm kơnhoàl Cư̆ Mngar neh ngui broă mblàng yal bơh broă lơh pơgồp bal, ngui broă lơh tơn nàng ală cau tàm mpồl cau ùr in ƀuơn lơh: “Bơ̆t bơtàu broă rơndăp lơh, lam broă lơh mblàng yal tus tơl hìu nhă. Tus tơl hìu bơh ală cau tàm mpồl, cau ùr, di lah hìu bơh ală cau tàm mpồl ờ hềt kloh niam, ờ hềt niam den bol añ pal bơto sồr, lơh bal, bơto sồr mùl màl nàng lơh, kung ờ gơtùi mìng lòt mblàng yal gời”.

Broă tơrlòng lơh “3 kloh” neh geh ai tàm khà broă 17.8 tàm broă lơh jăt jơnau kờñ dà lơgar bè bơ̆t bơtàu ƀòn lơgar pa, mùl màl jơh gơs ală khà bơnah broă dê bè khà hìu geh hìu un, hìu jă brê, phan đơ dà ngui sa kloh niam mờ gàr tơl 3 kloh. Bơh broă lơh jăt ală broă tơrlòng lơh do, tàm 3 nam do tàm càr Dăk Lăk neh geh rơlao 5 rơbô hìu cau ùr neh geh khà broă geh ai. Mò Võ Thị Ngọc, Phó Củ tịc Mpồl cau ùr càr Dăk Lăk pà git: “Jơnau geh jào Mpồl cau ùr dan dờp bơnah broă mờ geh jơnau sồr lơh, ai tơl bơta niam, gùng dà broă lơh bơh Anih duh broă Làng bol kơnhoàl dê. Bè jơnau sồr nàng lơh jăt jơnau mblàng yal, lam lơh mờ dong kờl ală mpồl cau ùr lơh hìu jă brê kloh niam, gàr niam “3 kloh” bè jơnau rơcang cih mờ Mpồl cau ùr càr gam pơn jăt tai ai pơgồp jơnau đơs bơh ală gah lơh broă nàng yal Anih duh broă Làng bol càr in”.

Bơh broă lơh mùl màl jơh broă tơrlòng lơh “3 kloh”, cau ùr càr Dăk Lăk neh mờ gam geh ală broă pơgồp bal niam tàm broă bơ̆t bơtàu ƀòn lơgar pa tàm càr dê. Ală broă lơh mùl màl bơh broă gàr kloh niam tiah kis tus mờ broă bơtàu tơnguh lơh sa kơ̆ kơl jăp, ờ mìng lơh gơguh rài kis mờ gam pơgồp bal tàm broă bơ̆t bơtàu dùl mpồl bơtiàn pràn kơl dang, geh uă bơta niam chài.

Cau mblàng Ndong Brawl/Cau cih H’ Xíu (VOV Tây Nguyên)

Viết bình luận

TIN CÙNG CHUYÊN MỤC