Tàm ù tiah nhàr lơgar gam uă kal ke tàm tiah đah măt tơngai Mŭt càr Gia Lai dê, lŏ Rơ Mah H’ Dịu, Ƀí thư Đoàn sàh Đức Cơ neh lam mŭt lơh broă “Ƀòn lơh broă tàñ phan ờs mờng ơruh pơnu” dê. Lài ngan priă geh tơl nă cau mìng geh bơh 2 tus 3 tơlăk đong pah nhai ai ală đoàn viên in tus bal lơh broă sùm, mơya tài jơnau kơ̆p kờñ dờng màng bơh ƀòn lơh broă dê den tàng sơlơ geh uă ơruh pơnu tus bal. broă lơh do pơgồp bal mờ mpồl lơh sa kă bro, mpồl lơh broă bal nàng bơto broă lơh; broă rơndăp lơh tiah tam đơr; bơyai lơh hìu ràng, tàñ ală phan pơgồp bal mờ lòt nhơl. Rơndăp broă lơh geh mŭt tàm mpồl 40 rơndăp broă lơh sa jăk ngan tàm Dơ̆ pơrlòng Mŭt lơh broă ơruh pơnu ƀòn lơgar nam 2023 dê. Lŏ Rơ Mah H’ Dịu pà git: “Do là bơta pràn dờng màng ngan nàng să tờm añ pơn jăt tai tàm tơnơ̆ do, pơgồp bal mờ ai bơta pràn gam kơnòm să dê lơh broă tàm broă lơh đoàn kung bè tơnguh nùs nhơm bơh rài kơnòm să, añ kơlôi là pal lơh ngan rơlao tai, pơgồp bal rơlao tai, tài ală broă lơh, broă lơh bơh añ dê kung gam đềt ngan di lah pơn drờm mờ ală bơyô dê”.

Gam gơwèt mờ bi Rơ Châm Suê, tàm ƀòn Blang 2, sàh Ia Hung, càr Gia Lai, gùng tam gơl rài kis sơn đờm bơh broă lòt bơsram broă lơh. Bơsram jơh ơdŭ 12, bi mŭt bơsram broă lơh tàm Hìu bơsram Cao đẳng Gia Lai dê, tơnơ̆ mờ hơ̆ lòt lơh broă tàm dùl kông ty kơ khí. Tŭ broă lơh neh chài, geh broă dong kờl bơh cau tàm hìu, bi bal mờ ờ uă cau bơyô lòt bơsram bal lài do pờ geh hìu lơh kơ khí tơn tềng hìu. Lơh broă jơh nùs mờ pin dờn dong kờl hìu lơh broă bơh bi dê rơhời geh làng bol pin dờn. Ờ mìng ai geh broă lơh să tờm in, bi Suê gam hòi jà tai uă bơyô gam kơnòm tàm ƀòn rê lơh broă bal. “Lik hờ bơdìh lơh 2, 3 nam den tŭ do kung neh git lơh, hơ̆ sồng rê lơh broă is. Tàm hìu kung geh 2, 3 nă bơyô bơsram bal lài do, tŭ do rê lơh broă bal. lơh rơndeh kông nông, drơng lơh nàng làng bol in lòt lơ-òr, lòt lơh broă. Tàm tơngai tus di lah broă lơh geh uă den añ rơ̆p pờ ơnàng anih lơh broă tai”.

Bơh tơnơ̆ mờ kòp Covid-19, mpồl cau mŭt lơh broă geh uă tàm càr Gia Lai, ai geh bơta pràn nàng uă ơruh pơnu khin tàm broă mŭt lơh broă tơn tàm ù tiah ƀòn lơgar dê. Tàm hơ̆ geh lŏ Rơ Châm Awưnh, tàm ƀòn Mrong Yố, sàh Ia Ly. Mờ 70 tơlăk đong priă càn bal mờ priă prăp bơh hìu nhă dê, lŏ Awưnh bal mờ bơklao sơn đờm bơh broă lơh sa suơn sre hữu kơ, wèt tus bơta kwơ kơl jăp mờ jŏ jòng. Is mờ broă lơh bè ờs gơrềng tàm cau tus blơi, phan geh lơh rơhời geh anih tăc kơl jăp, cèng geh cồng nha lơh sa loh làng ngan. Tơnơ̆ mờ tơngai tơrlòng lơh bal mờ rơhời git lơh, lŏ Awưnh pơn jăt tai rề ơnàng broă lơh, pơgồp bal loh mi cau ùr tàm ƀòn tus bal lơh, rơhời ai kơphe kloh bơh ƀòn lơgar dê geh tus tàm drà kă bro. Sền gŏ bơta pràn bơh phan geh lơh, tàm gùl nam 2024, lŏ lơh gơs Kông ty TNHH Lơh phan geh lơh bơh broă lơh sa suơn sre Jrai Ia Ly, bơyai lơh kơphe jăt broă lơh ndơ̆p, atbồ bơta niam jăt khà Organic mờ VietGAP. Phan geh lơh “Jrai Ialy Coffee” geh dờp phan OCOP 3 sơrmañ, rơhời cau ngui sa kờñ. Lŏ Ra Châm Awưnh pà git: “Tŭ do añ neh càn priă tai nàng blơi tai măi nàng lơh coh, bŏ kơphe. Kơnờm mờ priă do añ neh geh bơta pràn tàm nùs nhơm kơlôi sơnơng, bồ tơngoh bơh cau ùr pa dê. Den gơtùi là tơnơ̆ do rơ̆p pơgồp bal tai mờ ală oh mi cau ùr lơh jăt broă lơh do”.

Đah ngkời mờ ală broă mŭt lơh broă bơh ơruh pơnu ală jơi bơtiàn ờ gal cau càr Gia Lai dê là broă lơh broă bal bơh ală mpồl Đoàn mờ broă dong kờl bơh Dà lơgar dê. Gùt càr tŭ do geh 932 mpồl ai càn priă mờ geh ai kơnòl broă bơh Đoàn ơruh pơnu, dong kờl rơlao 40 rơbô hìu in càn mờ kờp jơh broă jơnkah dồs rơlao 2 rơbô 300 tơmàn đong. Bơdìh hơ̆ tai, Kes priă Ơruh pơnu càr Gia Lai lơh broă, mŭt lơh broă neh bơcri, dong kờl uă rơndăp broă lơh, ai geh bơta pràn nàng kơl jăp ai ală broă lơh sa pa in. Bi Đỗ Đức Thanh, Phó Ƀí thư Duh broă sùm Tỉñ đoàn càr Gia Lai pà git: “Neh geh uă ngan bơyô kơnòm să lơh ngan brồ guh, kis mờ ƀòn lơgar, tàm hơ̆ uă ngan là neh jòi bơsram nàng git wă, dan cih măt phan kă bro kung bè jòi geh tiah tam, cèng geh bơta kwơ cau ngui sa in, pin dờn gơwèt mờ ală bơta phan tờm bơh ƀòn lơgar dê. Geh ờ uă bơyô kung neh jòi tàm broă lùp sền mờ ală mpồl lơh sa kă bro, ală mpồl lơh broă ai phan, ală mpồl lơh broă kă bro phan nàng geh anih tăc phan geh lơh bơh să tờm dê mờ bơh tŭ hơ̆ nùs nhơm pin dờn tàm drà kă bro phan điện tử kung bè tam nùs nhơm pin dờn cau ngui sa dê”.

Gơtùi gŏ dùl rơnàng cau kơnòm să jơi bơtiàn ờ gal cau càr Gia Lai gam rơhời tam gơl bồ tơngoh, rơcang kă bro, lơh sa. Tŭ geh broă dong kờl, bal mờ broă lơh broă bal bơh ală kấp, ală gah lơh broă dê, mờ bơta kwơ màng rơlao jơh là geh nùs nhơm pin dờn tàm să tờm dê, gùng dà mŭt lơh broă tàm ƀòn lơgar tiah bơnơm gam pờ geh ală bơta niam pa mờ geh uă nùs nhơm kơ̆p kờñ.