Ngui tŭ jiơ lơm pah tơngai kàl prang dê, làng bol thôn Kim Môn, sàh Chư A Thai, càr Gia Lai ai cau lik lòt lơh gơl gùng ală thôn, pờ ơnàng tus 8 thơk. Nàng broă lơh bơ̆t bơtàu gờñ lơh sir, uă hìu làng bol neh geh nùs nhơm is tơn rŭc pơnggàr, pà ù. Hìu bơnhă ồng Phạm Văn Hùng là dùl tàm ală hìu lơh lài, tă sờr jơh ală pơnggàr, pà rlau 74 thơk vuông ù. Tàm hìu ơm rềp tơn kềng măt gùng gam pờ ơnàng, ồng Hùng yal bơta chờ hờp tŭ sền gŏ ƀòn tờm ngai sơlơ tam gơl:

 “Hìu bơnhă añ pà ù bơh kềng măt gùng yau mŭt tàm jơng gùng là 3 thơk, bol hi dùl nùs bal mờ Dà lơgar lơh dùl nơm gùng nàng sàng goh ƀòn, lòt rê bươn soh jơh ală bơta, pơndiang phan lơh geh bơh sươn sre kung ƀươn sơl ai làng bol in. Làng bol gùt dar ndo dùl nùs bal jơh lơm nàng pà ù bal mờ Dà lơgar lơh”.

Lài do, mŭt tàm kàl tơnhàu, rơndeh pơndiang phan ờ gơtùi mŭt tus anih blơi phan lơh geh bơh sươn sre tài gùng dềt, uă gơl gùng ờ gam niam tai. Nàng lam lơh pờ ơnàng ală gơl gùng lòt rê ƀòn lơh broă sa in, bal mờ mpồl cau kwang bàng tàm sàh, să tờm làng bol kung mblàng yal, tàm jà bal gơ̆p tus bal lơh sơl. Ồng Dương Văn Phon, ơm tàm thôn Hải Yên pà gĭt, gơ wèt mờ làng bol tiah do, pà dùl pèt ù nàng pơgơl wơl ai dùl nơm gùng ơnàng rơđaìh ai ngai do mờ tơnơ̆ do in là bơta dipal ngan.

“Ờ gŏ di mìng kwang bàng lòt jà lơm, làng bol bol hi kung gam tàm jà bal, làng bol tài tơl nă cau, tơl nă cau tài he den tàng kung lơh ngan sơl. Hoàc hươr là he roh dồ êt ù, mơya bơta kwơ là gùng Dà lơgar dê lơh ai he in ơnàng rơđàih ai he in lòt sùm, ờ mìng rài he lơm, rài kòn rài sau he geh gùng ơnàng, bè hơ̆ làng bol ƀòn lơgar hơ̆ sồng gơtùi bơtàu tơngguh”.

Ồng Trần Văn Nguyên, Ƀí thư Ci ƀộ mơkung là Lam bồ thôn Hải Yên, sàh Chư A Thai pà gĭt, bơta pal chờ hờp ngan là 79 hìu làng bol bơh bàr thôn dê ơm kis jăt kềng gah gùng den jơh ală ndrờm dùl nùs bal pà ù pờ gùng, pà gŏ bơta dùl nùs bal ngan nàng lơh jăt jơnau lơh nền Dà lơgar dê.

“Làng bol chờ hờp tài gùng do bŏ bil ờ niam ngan tai. Tŭ mblàng yal làng bol cau lơi kung dùl nùs pà ù, tă sờr pơnggờr lài do neh geh lơh kơnhăp ngan. Geh tŭ bơtuah geh Đảng, Dà lơgar lơh ai dùl nơm gùng do den làng bol chờ hờp ngan”.

Sàh Chư A Thai là tiah lơh gơlik kòi tờm ngan đah măt tơngai Mŭt càr Gia Lai dê. Gĭt nền phan bơna gùng lòt rê là gơn kơnờm bơtàu tơngguh, ƀòn lơgar neh bơcri 18 gơl gùng ală thôn mờ kờp jơh priă rlau 17 tơmàn 400 tơlak đong. Tàm hơ̆, làng bol neh pà is mờr 5 sàu ù lơh gùng, tă pơgồp rlau 1 tơmàn 100 tơlak đong. Ồng Phạm Văn Lương, Phó Ƀí thư Đảng ủy, Củ tịc Anih duh broă Làng bol sàh Chư A Thai pà gĭt, sàh gam pơn jăt tai lam lơh tai 7 nơm gùng pa mờ dờp geh bơta dùl nùs bal uă bơh làng bol dê.

“Lam lơh ală gơl gùng neh dờp geh bơta dùl nùs bal uă bơh làng bol tàm ƀòn lơgar ală thôn dê, dong gơnoar ătbồ lam lơh mhar ală rơndăp broă lơh. Tàm ală tŭ lam lơh, bol he neh tơnggơs jơnum hòi jà mblàng yal sờr ntrờn măt ù mờ neh lam lơh hòi jà mblàng yal, jơh ală anih lơh broă cíñ trị ală thôn dê mŭt lơh bal hòi jà mblàng yal làng bol dùl nùs bal mờ dơ̆ hòi jà pà ù lơh gùng”.

Ală gơl gùng gam rơhời pờ ơnàng tàm Chư A Thai, càr Gia Lai ờ mìng lơh gơlik geh bơta ƀươn ƀoài ai lòt rê, lơh sa in lơm mờ gam là cơng tàng tơnggŏ loh làng ai nùs nhơm tam klăc, dùl nùs bal bơh làng bol dê tàm bơ̆t bơtàu ƀòn làng bol lơh broă sa pa gam mờng hòi là ƀòn lơgar pa.