Hìu bơnhă bi Hà Thị Eng ơm tàm thôn 5, xã Cư Kbang, kơnhoàl Ea Súp, càr Dăk Lăk geh 6 nă cau mơya mìng geh nă să bi lơm là cau lơh broă tờm. Ù lơh sa dồ êt, priă lơh geh bơh broă lơh mờng lơh apah pah ngai ờ tơl nàng ngui sa tàm rài kis ai 3 nă kòn dềt, pô me kra lơbơn mờ bơklau sùm gơbàn kòp jê. Nam 2023, kơnờm geh dong kờl rlau 35 tơlak đong bơh Broă lơh Jơnau kờñ Dà lơgar dê tơrmù rƀah kơ̆ kơl jăp, bi neh blơi 4 nơm kơnrồ dra rê ròng. Tus tŭ do kơnrồ neh rơ̆ rài tus 6 nơm. Bi Hà Thị Eng dòn kơnờm rài tơnơ̆ àng sơrdah gam mpờl gŏ ngan ngồn, bè do: Hìu ờ gŏ geh dồ nơm phan bơna lơi ờ, ù tiah geh 5, 6 sàu sre lơh kòi kung geh bơh 50 tus 60 ƀào gời lơm. Hìu bơnhă añ geh dong kờl kơnrồ, geh gơnoar ătbồ tiah do sền gròi mờ geh pơlam tàp nàng sền gàr ròng siam kơnrồ. Tơngai tus, añ lơh ngan nàng hìu bơnhă klàs bơh rƀah.

Gơ wèt mờ bi Hà Thị Yêu ơm tàm thôn 5, xã Cư Kbang, dơ̆ ồs sa hìu nam 2013 lài do lơh hìu bơnhă gơtìp gơ ơm tàm rài kis kal ke rƀah lơ ời ngan. Lồi nam 2014, bi geh pà hìu bơta nđàc. Nam 2023, hìu bơnhă geh dong kờl 4 nơm kơnrồ dra. Mờ bơta dong kờl bơh dà lơgar dê mờ ală lơh ngan brồ guh, tŭ do hìu bơnhă bi Hà Thị Yêu neh klàs bơh rƀah. Bi Hà Thị Yêu chờ hờp yal: Tŭ geh kơnrồ rao, añ jồm tai priă nàng bơcri lơh sa lài hơ̆ sồng tŭ kơnrồ deh kòn den rơ̆p tăc ai priă tơm ƀà dồs. Tŭ do, hìu bơnhă añ neh kơ̆ kơl jăp đau, neh klàs rƀah, ờ gŏ gĭt đơs bơta lơi rlau tai mìng dan ưn ngài Đảng, gơnoar ătbồ lơm gời mơ.

Cư Kbang là xã tiah III is ồn kal ke ngan bơh kơnhoàl Ea Súp dê, uă ngan là làng bol jơi bơtiàn dồ êt nă cau, hìu rƀah geh tus mờr 58%. Ồng Cao Thanh Hoài, Phó Ƀí thư Đảng ủy xã Cư Kbang, pà gĭt: nàng broă lơh tơrmù rƀah kơ̆ kơl jăp, xã neh lam lơh ndrờm bal ală broă lơh bơtàu tơngguh lơh sa- mpồl bơtiàn. Is ồn là bơh tŭ lơh jăt 03 broă lơh jơnau kờñ Dà lơgar dê neh lơh gơlik geh ală gơ tam gơl niam ngan, pơgồp bơnah kwơmàng lơh tam gơl rài kis làng bol dê. Ồng Cao Thanh Hoài, đơs: Bơta bơcri bè phan bơna bè broă lơh tơrlòng lài dong kờl bơtàu tơngguh lơh sa ròng phan ai làng bol in, is ồn là broă dong kờl kơnrồ ai làng bol in geh bơta kờñ bal mờ dùl nùs bal bơh làng bol dê uă ngan. Bơh dùl nam jăt sền den cồng nha kung bè priă geh lam lơh niam ngan. Khà hìu rƀah pah nam gơmù bơh 5-7%.

Tàm jơh gùt kơnhoàl tiah nhàr lơgar Ea Súp, ală nam do, kâp ủy, gơnoar ătbồ kơnhoàl neh lam lơh geh cồng nha ală gùng dà, broă lơh bơh Đảng, Dà lơgar dê, lơh gơlik geh bơta gơ tam gơl loh làng tàm bơtàu tơngguh lơh sa- mpồl bơtiàn. Gŏ loh làng ngan là lơh 56 broă lơh tơrlòng lài broă lơh broă sa bơtàu tơngguh lơh sa mpồl bơtiàn; pờ gĭt nđờ jơ̆t ơdŭ bơto broă ƀòn lơgar; lam cau lơh broă lòt lơh broă jăt tơngai kàl tàm lơgar Hàn Quốc; dong kờl làng bol geh càn priă rlau 121 tơmàn đong nàng lơh sa kă bro…pà sră kham sơm kòp ờ sa priă ai 53 rbô 240 hìu làng bol in; ờ tă mờ tơrmù priă pal tă bơsram, priă tă bơsram ai 13 rbô 650 nă kơnòm bơsram in…Ồng Nguyễn Thanh Tuấn, Phó Củ tịc Anih duh broă Làng bol kơnhoàl Ea Súp, càr Dăk Lăk yal: Lài do, khà hìu rƀah tàm ù tiah kơnhoàl Ea Súp uă ngan, rlau 60%. Bơh 03 nam lam lơh ală broă lơh jơnau kờñ tơrmù rƀah kơ̆ kơl jăp, tus tŭ do kơnhoàl neh tơrmù gam 42% hìu bơnhă rƀah. Nàng broă lơh tơrmù rƀah dồ bă kơ̆ kơl jăp, Anih duh broă Làng bol kơnhoàl neh lam lơh ndrờm bal 03 Broă lơh jơnau kờñ Dà lơgar, lam lơh uă rơndăp broă lơh bè dong kờl ù ơm, ù ơm, ù lơh sa ai ală hìu làng bol jơi bơtiàn dồ êt nă cau in.

Kung jăt ồng Nguyễn Thanh Tuấn yal, kơnhoàl Ea Súp gam tơrgùm mblàng yal tơngguh uă bơta gĭt wă, lơh geh wơl bơta kơ̆p kờñ ngan klàs bơh rƀah bơh làng bol dê; mơkung lơh mờ rề ơnàng lơh uă ală broă lơh tơrlòng lài lơh sa cèng wơl cồng nha lơh sa uă. Bal mờ hơ̆, kơnhoàl pơn jăt tai hòi tơrgùm ală priă jền bơcri bơ̆t bơtàu phan bơna drơng bơtàu tơngguh lơh sa- mpồl bơtiàn, pơgồp bơnah tơrmù rƀah kơ̆ kơl jăp.