- Ơi ơ bi Cil Salamôn, sơn đờm bơh mùl màl rài kis cau ùr tàm tiah Dà Long dê mờ gùng dà tam gơl rơndap tap sèng lơh sa ƀòn lơgar dê, bơta lơi neh lơh bi hòi jà, crơng gơs mpồl lơh bal cau ùr tam tờm zơu ròng tu taih?

Bi Cil Salamôn: Lài do, añ sền gŏ oh mi cau ùr tàm tiah Dà Long uă ngan là lơh sre, lơh mìr, tam tơngời, mìng tơl nàng sa pah ngai, ờ geh priă jền nàng blơi ồi àu, sră pơ àr kòn in lòt bơsram. Tàm tŭ hơ̆, kâp ủy mờ gơnoar atbồ tàm ƀòn lơgar kung gam ai tơlik gùng dà tam gơl rơndap tap sèng chi tam, phan ròng. Bơh jòi git, añ gŏ broă lơh tam tờm zơu ròng tu gơ dờp ngan mờ ù tiah, trồ tiah mờ mờng chài lơh sa bơh làng bol tiah do dê. Bè hơ̆ den tàng añ lơh nền hòi jà, mblàng yal oh mi cau ùr in tus bal tam tờm zơu ròng tu nàng geh tai priă jền, bơtàu tơnguh rài kis mờ kơlôi rơcang ai oh kòn in lòt bơsram niam rlau”.

- Bè hơ̆ den tŭ sơn đờm lam lơh broă lơh pa bè do, bi neh gơtìp ală kal ke lơi mờ bi neh lơh bè lơi nàng lơh gơlik bơta pin dờn, hòi jà oh mi cau ùr khin cha tus bal taih?

Bi Cil Salamôn: Bơh chờm den broă hòi jà oh mi cau ùr tam tờm zơu ròng tu gơtìp uă ngan kal ke, tài do là broă lơh pa, oh mi cau ùr ờ khin mờ ờ geh mờng chài. Nàng lơh gơlik bơta pin dờn, añ neh pơgồp bal mờ cau lam bồ, phó lam bồ mpồl – là ală cau geh bơngă pin dờn tàm ƀòn lơgar – lơh lài. Añ tus bal tơn tàm broă tam tờm zơu, ròng tu ruồi brài mờ jà oh mi cau ùr tus tàm hìu nàng sền broă ròng tu. Tus ngai tơnhàu, añ bal mờ oh mi rơ wah rơ sòn tu, kơng kĭ, kơng rơ sòn tu mờ kờp mùl màl ală bơnah priă tă bè priă ơpah cau lơh broă, priă blơi nha zơu… nàng sền gŏ priă jền lơh geh pah dơ̆ ròng. Tŭ gŏ bơta kuơ ngan ngồn, oh mi sơn đờm dan bơsram mờ cih mat tus bal. Bơh hơ̆, añ cih mat ală hìu bơnhă lơi kờñ mờ pơgồp bal mờ Mpồl dong kờl bơto pơlam broă lơh sa suơn sre sàh pờ ơdŭ bơto bơta chài tam tờm zơu ròng tu ai oh mi cau ùr in.

- Tơnơ̆ tŭ oh mi cau ùr tus bal bơto pơlam mờ sơn đờm lơh broă den ală bơta gơ kòl bè priă jền, phan bơna ròng tu ruồi brài geh bơsong bè lơi taih? Gơnoar broă bơh gơnoar atbồ tàm ƀòn lơgar dê tàm broă dong kờl broă lơh bè lơi ơ bi?

Bi Cil Salamôn: Ngan là geh kal ke. Tơnơ̆ tŭ tus bal bơto pơlam, uă oh mi cau ùr neh geh suơn tam zơu mờ kơp kờñ ròng tu ruồi brài mơya ờ tơl phan bơna. Añ neh cih mat ală hìu bơnhă geh jơnau kờñ mờ pơgồp bal mờ gơnoar atbồ tàm ƀòn lơgar nàng dong kờl. Tơnơ̆ hơ̆, gơnoar atbồ tàm ƀòn lơgar pơn jat tai pơgồp bal mờ Mpồl Lơh sa – sền gàr dà lơgar dong kờl ală phan ròng tu bè đồng,… kờp priă dong kờl rlau 70%, oh mi cau ùr mìng kờñ tă tàm pơndrờm mờr 30% priă gam wơl. Rơ sòn tu oh mi cau ùr dê sùm geh anih blơi, giă blơi bơh 195 tus 230 rbô đông dùl kĭ rơ sòn.

- Bơh ală ngai bơh chờm mờ 25 nă cau tàm mpồl, tus tŭ do Mpồl lơh bal neh bơtàu tơnguh bè lơi ơ bi? Bi gơtùi yal tai bè ală cau pơn rơ jak mờ bơta tam gơl tàm rài kis oh mi cau ùr dê kơnờm broă lơh do bè lơi taih?

Bi Cil Salamôn: Bơh chờm den Mpồl lơh bal mìng geh 25 nă cau, tus tŭ do neh gơguh 29 nă, tàm hơ̆ geh 20 nă oh mi cau ùr gàr sùm broă tam tờm zơu ròng tu mờ lơh geh cồng nha niam ngan. Tơl dơ̆ ròng gơ jat tàm bă ù tam tờm zơu, ală hìu bơnhă ròng bơh nggùl hộp, 1 hộp tus dùl hộp mờ nggùl tu sơntìl, cèng wơl priă jền lơh geh bơh 12 tus 15 tơlak đong pah dơ̆ ròng. Broă lơh ngai sơlơ bơtàu tơnguh, uă cau tàm mpồl geh pơn rơ pơn jat tai gàr sùm mờ lơh krơh oh mi cau ùr tàm ƀòn in. Pơn rơ bè bi Kơ Să K’Bích – cau lam bồ mpồl cau ùr thôn 4 – pơn jat tai drơng broă mờ tề lam broă lơh; ală bi Liêng Hót K’Săn, Kơ să K’Hà, Lơ Mu K’Jiêng. Is ồn, bi Ka Să K’Hà - Ƀí thư Ci đoàn thôn, mờ là Phó cau lam bồ mpồl cau ùr thôn 4, bơh dùl hìu bơnhă uă kal ke neh khin cha brồ guh gơ gơs cau pơn rơ ngan, broă lơh bi dê gơ gơs là anih tàm tìp, bơsram mờng chài. Kuơmàng ngan rlau jơh là kơnờm tu ruồi brài mờ uă oh mi cau ùr, tàm hơ̆ geh añ neh lik klàs rƀah kơ̆ kơljap sùm.

- Mờ gơnoar broă là cau tơng gơs mpồl, bi kơp kờñ bơta lơi nàng Mpồl lơh bal pơn jat tai bơtàu tơnguh kơnhăp jŏ tàm tơngai tus. Bi geh jơnau dan lơi sơl gơ wèt mờ ală kâp mpồl mờ gơnoar atbồ nàng dong kờl oh mi cau ùr in niam rlau?

Bi Cil Salamôn: Là cau neh geh tŭ lơh kwang bàng Mpồl cau ùr mờ tơng gơs tơn Mpồl lơh bal, añ kơp kờñ ală kâp gơnoar atbồ tàm ƀòn lơgar mờ kwang bàng mpồl pơn jat tai sền gròi, dong kờl oh mi cau ùr bè jơnau git wă, bơta chài tam tờm zơu ròng tu nàng mpồl ngai sơlơ bơtàu tơnguh. Añ kung kơp kờñ Mpồl tam klac cau ùr càr sền gròi tơnguh jơnau git wă mờ bơta chài lơh sa. Bal mờ hơ̆, mpồl cau ùr càr kung dong tàm tơrbŏ mờ ală cau blơi phan nàng blơi rơ sòn tu oh mi cau ùr in, tơrmù lơyah broă tac phan, dong oh mi cau ùr iang nùs lơh sa jŏ jòng.

- Ơi, dan ưn ngài bi uă ngan!