VOV4.K’ho - Bơh nam 2016, Ban Thường vụ Huyện ủy Kon Plông, càr Kon Tum tơlĭk broă lơh sồ 26 lơh jăt broă lơh jăt jơnau kờñ bơh dà lơgar bơ̆t bơtàu ƀòn lơgar pa, tơngai bơh nam 2016 tus 2020. Tơnơ̆ mờ mờr 5 nam lơh jăt, broă lơh sồ 26 neh cèng geh ală tam gơl niam ai muh măt broă lơh sa suơn sre, ƀòn lơgar mờ tơnguh rài kis làng bol.

Ồng Lê Đức Tín, Phó Chủ tịch UBND kơnhoàl Kon Plông pà gĭt: Kờ lơh mùl màl jơh gùng dà broă lơh bơh Ban Thường vụ Huyện ủy bè broă bơ̆t bơtàu ƀòn lơgar pa, UBND kơnhoàl Kon Plông đơng lam ală anih lơh broă geh gơnoar bơ̆t bơtàu, dan mờ UBND kơnhoàl tơlĭk ală rơndăp broă lơh, rơndăp broă bơyai lơh mùl màl, khoa học, ai geh ală khà broă pal geh lơh pah nam mờ tàm jơh tơngai lơh broă; ală kơnòl, khà broă bơ̆t bơtàu ƀòn lơgar pa geh ai lài lơh jăt geh nùs nhơm pràn kơl dang, lơh tơ ngu me tờm nàng lơh gơs ală khà broă bơ̆t bơtàu ƀòn lơgar pa gam tai di pal mờ mùl màl tàm kơnhoàl dê...

Ai geh broă bơ̆t bơtàu ƀòn lơgar là “bơta tờm” tàm broă lơh jăt broă bơ̆t bơtàu ƀòn lơgar pa, tơnguh bơtàu broă lơh sa mpồl bơtiàn tàm tiah ƀòn lơgar tàm kơnhoàl, tơngai bơh nam 2016 tus 2020, kơnhoàl Kon Plông tơrgùm ală broă ai lài bơcri priă lơh ală broă tàm ƀòn lơgar.

Tus tŭ do, kơnhoàl Kon Plông geh 7 tàm 8 xã geh khà broă sồ 2 bè gùng lòt, gơguh 6 xã; 8 tàm 8 xã geh khà broă sồ 3 bè bơtơ̆t rơbòng dà, gơguh 5 xã; 8 tàm 8 xã geh khà broă sồ 4 bè ồs đèng, gơguh 3 xã; 4 tàm 8 xã geh khà broă sồ 5 bè hìu bơsram, gơguh 2 xã; 5 tàm 8 xã geh khà broă sồ 6 bè bơta bơna chài rơgơi, gơguh 4 xã pơndrờm mờ nam 2015.

Mờ kơnhoàl Kon Plông ai broă chồl pràn broă tơnguh bơtàu lơh sa, tơnguh uă rài kis ai làng bol in là dùl tàm ală broă pal ai lài đơng lam nàng geh bơta pràn tàm broă bơ̆t bơtàu ƀòn lơgar pa; tàm hơ̆ tơrgùm lơh jăt geh cồng nha broă bơ̆t bơtàu wơl broă lơh sa suơn sre pơgồp bal mờ broă bơ̆t bơtàu ƀòn lơgar pa.

Kơnờm mờ hơ̆, tơnơ̆ mờ 5 nam, pơgồp bal gơmù khà hìu rơƀah tàm tiah ƀòn lơgar gam 14,98% tàm nam 2020, gơmù 39,31% pơn drờm mờ nam 2015; priă geh tơl nă cau tàm nam 2020 geh 33 tơlăk 500 rơbô đong, gơguh 16,74 tơlăk đong tàm 1 nă pơn drờm mờ nam 2015.

Kơnhoàl sền kuơ broă bơto broă lơh ai cau lơh broă tàm ƀòn neh geh bơsram broă lơh geh 2 rơbô 282 nă cau, geh 91% khà broă geh ai; tàm hơ̆, bơto broă lơh sa suơn sre geh 2 rơbô 107 nă cau geh 92,3%. Kuơ màng, broă bơto broă lơh geh pơgồp bal mờ broă ai broă lơh neh pơgồp bal tàm broă tơnguh uă khà cau lơh broă neh geh bơsram broă lơh mờ khà cau lơh broă neh geh bơsram broă lơh geh broă lơh ngai sơlơ gơguh.

Tàm gah bơto bơtê mờ bơsram, broă lơh hìu bơsram, ơdŭ bơsram geh kơnhoàl sền gròi bơcri priă, lơh niam wơl, pờ ơnàng, di pal mờ broă kờñ bơsram sră bơh làng bol dê. Geh 9 tàm 9 xã, thị trấn geh khà broă bơsram bơtơl cấp 1 di sơnam mờ bơsram bơtơl cấp 2; 100% khà xã, thị trấn geh khà bơsram bơtơl mầm non ai kơnòm dềt 5 sơnam in.

Phan bơna, phan lơh broă, cau lơh broă tàm gah lơh sơnơm geh tơnguh bơcri priă. Gùt kơnhoàl tŭ do geh 9 tàm 9 xã, thị trấn geh khà broă bè gah lơh sơnơm, geh 100% khà broă neh geh ai.

Broă sền gàr tiah kis sùm geh sền gròi, broă lơh jăt jơnau kờñ dà lơgar bè dà sàng kloh mờ kloh niam tiah kis ƀòn lơgar lơh geh cồng nha. Tus tŭ do, khà hìu nhă ngui dà sàng kloh, kloh niam tàm tiah ƀòn lơgar geh 98% gơguh 8% pơn drờm mờ nam 2015.

Kơnờm mờ broă lơh jăk ală broă lơh tàm broă lơh jăt, broă bơ̆t bơtàu ƀòn lơgar pa tàm kơnhoàl Kon Plông tàm tơngai do neh lơh geh ală cồng nha niam. Tus lồi nam 2020, gùt kơnhoàl geh 2 xã geh 19 tàm 19 khà broă geh ai mờ neh geh UBND càr dờp xã geh khà ƀòn lơgar pa. pal kah ngan, khà broă bè ờs lơh geh tàm dùl xã là 15,8 khà broă; gơguh 10,2 khà broă bè ờs tàm 1 xã pơn drờm mờ nam 2015. Kơ̆p kờñ tàm tơngai tus, broă lơh jăt jơnau kờñ bơh dà lơgar bơ̆t bơtàu ƀòn lơgar pa tàm kơnhoàl Kon Plông cèng geh uă cồng nha niam, wèt tus lơh gơs jăt jơnau kờñ bơ̆t bơtàu ƀòn lơgar pa tàm kơnhoàl di jăt mờ rơndăp broă neh geh ai.

Cau mblàng Ndong Brawl