Ồng Y Sanh Niê, kòn cau Rơđê ơm tàm ƀòn Pan, xã Ea Yông, kơnhoàl Krông Păch, càr Dăk Lăk neh tam kơphê, tiêu bơh jŏ. Tờm tiêu sùm gơtìp kòp lơh cồng nha lơh geh ờ geh uă, giă kung ờ yòm ngan sơl; ai kơphê den neh kra ngan, jŏ sơnam, tam pa wơl kờñ pal geh priă bơcri uă mơkung kal ke ngan lơh geh cồng nha. Nam 2011, ồng Y Sanh Niê khin cha bơcri priă tam tàm bơrlŭ bal tờm sầu riêng tàm sươn kơphê. Sầu riêng ƀươn tam, mơya ờ gĭt bơta chài sền gàr den tờm sầu riêng rơ̆p chơ̆t tài bơsềt kòp, halà mìng geh dồ êt plai gời, plai sa ờ huan bơkah. Bal mờ bă sươn ơnàng 1 lồ 7 sàu, neh geh 1 rbô 400 tờm kơphê mờ rlau 400 jrong tiêu, ồng Y Sanh Niê tam bơrlŭ bal tai 130 tờm sầu riêng sơntìl Dona. Tŭ sầu riêng dờng, lơh geh cờn nsrum nha đah hơđang, jơm ñhơm lơh mƀur ai kơphê in. Bàr pe nam rềp ndo, lơh geh sùm rlau 10 tấn plai sầu riêng, 2 tấn kơphê, 1 tấn mờ nggùl tiêu. Ồng Y Sanh Niê pà gĭt, tơnơ̆ tŭ kờp jơh ală bơnah priă tă blơi phơng sih, sơnơm sền gàr phan tam, pah nam lơh geh mờr 1 tơmàn đong. Ồng Y Sanh Niê, đơs: Bơh chờm añ ờ kung ờ gŏ bơcri priă ur ar sơl, añ kung ờ sơrbì tĕ tờm tiêu mờ kơphê, añ mìng tam tàm bơrlŭ bal lơm gời. Pah nam, kơphê lơh geh dùl tấn mờ nggùl, nam do den geh 2 tấn. Kờp jơh den tơnơ̆ tŭ he kờp kờp jơh priă bơcri den he lơh geh bơh 500 tus 600 tơlak đong.

Ồng Y Mi Êban ơm tàm ƀòn Ea K’mát, xã Hoà Đông, kơnhoàl Krông Păch kung tam tàm bơrlŭ bal tiêu tàm sươn kơphê. Tŭ srơh tam sầu riêng bơtàu tơngguh pràn, ồng Y Mi Êban neh blơi 40 tờm sầu riêng sơntìl Dona rê tam bơrlŭ bal tàm sươn. Kung săc rwah broă tam bơrlŭ bal mờ tờm kơphê mờ tiêu sơl. Tŭ do ồng neh rề ơnàng tam uă geh 120 tờm sầu riêng, gàr sùm 900 tờm kơphê, mờ 200 tờm tiêu tàm bă sươn ơnàng 1 lồ 4 sàu. Ồng Y Mi Êban pà gĭt, bă sươn tam bơrlŭ bal do gơ ai priă jền kờp jơh 1 tơmàn 500 tơlak đong dồ nam. Ồng Y Mi Êban, chờ hờp đơs: Mờ gơnoar broă là đảng viên he pal lam lài mờ lơh krơh nàng làng bol lơh jăt, añ pal tam tàm bơrlŭ bal sầu riêng, tiêu, kơphê dilah mờ mìng tam kơphê lơm den ờ gơtùi lơh geh priă jền, sầu riêng nam do den lơh geh pơgăp 10 tấn jăt giă tăc tŭ do den ngan ngồn là geh bơh 1 tus 2 tơmàn đong.

Bal mờ lơh pas ai hìu bơnhă in, ală ồng Y Sanh Niê mờ Y Mi Êban sùm crăp rơcăng dong kờl làng bol tàm ƀòn bè bơta chài sền gàr chi tam, priă jền, chi sơntìl, kòn sơntìl…nàng bơtàu tơngguh lơh sa- tơn jơh jơgloh tơrmù rƀah. Ồng Y Niêm Niê, Kwang ătbồ Cơldŭ Broă lơh sa mờ Bơtàu tơngguh Ƀòn lơgar kơnhoàl Krông Păch, càr Dăk Lăk đơs, ồng Y Sanh Niê mờ Y Mi Êban ndrờm là ală đảng viên lòt lài tàm bơtàu tơngguh lơh sa, tơn jơh jơgloh tơrmù rƀah. Ồng Y Niêm Niê, đơs: Tàm kơnhoàl Krông Păch geh uă đảng viên lơh sa jak, tàm hơ̆ geh cồng Y Sanh tàm xã Ea Yông mờ ồng Y Mi tàm xã Hoà Đông. Tàm ală dơ̆ cribơyai bơto pơlam bơta chài broă lơh sa sươn sre ai làng bol in tàm tiah jơi bơtiàn dồ êt nă cau, bol hi ndrờm yal bè ală broă lơh tơrlòng lài do bơh ală oh mi hơ̆ dê nàng làng bol in lơh jăt, bal mờ gơ̆p bơtàu tơngguh bal lơh sa, tơn jơh jơgloh tơrmù rƀah.

Broă khin cha tam tàm bơrlŭ bal tờm sầu riêng tàm sươn kơphê, tiêu bè ală hìu ồng Y Sanh Niê mờ Y Mi Êban tàm kơnhoàl Krông Păch neh yờ tơngguh uă cồng nha lơh sa, cèng wơl priă lơh geh uă ai hìu bơnhă in. Khi ờ mìng lik klàs bơh rƀah kơ̆ kơl jăp lơm mờ gam gơgơs tai là broă lơh tơrlòng lài ngan ngồn, loh làng ngan mờ rềp mềl ngan nàng làng bol tàm ƀòn in bơsram mờ lơh jăt.