Ƀộ Broă lơh sa mờ Bơtàu tơngguh Ƀòn lơgar lơh broă mờ càr Gia Lai jòi tiah tuh dà pa ai bơtơ̆t rbòng dà Ia Mơr in
Thứ sáu, 10:49, 02/08/2024
Cau mblàng: Lơ Mu K'Yến/ VOV Tây Nguyên
Cau mblàng: Lơ Mu K'Yến/ VOV Tây Nguyên
VOV4.K’Ho- Drim ngai 01/08, Ƀộ trưởng Ƀộ Broă lơh sa mờ Bơtàu tơngguh Ƀòn lơgar ồng Lê Minh Hoan bal mờ mpồl lơh broă neh lơh broă mờ Anih duh broă Làng bol càr Gia Lai bè broă tă bơsong kal ke, jòi tiah tuh dà pa ai bơtơ̆t rbòng dà Ia Mơr in.
Rơndăp broă lơh Tơnau dơng dà Ia Mơr, geh priă bơcri lơh kờp jơh rlau 2 rbô 600 tơmàn đong, mờ kơnòl broă pà dà tuh ai rlau 14 rbô 300 lồ ù tam phan tàm ală càr: Gia Lai mờ Dăk Lăk in. Bulah bè hơ̆, tơnơ̆ tŭ lơh sir, kờp jơh bă ù chi tam geh tuh mìng 3 rbô 600 lồ lơm, ờ tơl mờr 5 rbô lồ pơndrờm mờ rơndăp lơh. Tàm dơ̆ lơh broă, Anih duh broă Làng bol càr Gia Lai neh sồr Ƀộ Broă lơh sa mờ Bơtàu tơngguh Ƀòn lơgar kĭ gùng dà jun dà rê tus ală tiah geh tam gơl bơh ù tam tờm kau su ờ huan geh cồng nha.
Ƀộ trưởng Ƀộ Broă lơh sa mờ Bơtàu tơngguh Ƀòn lơgar ồng Lê Minh Hoan ring bal mờ jơnau sồr bơh Gia Lai dê, gàr niam jơnau kờñ tam pa, tam wơl mờ sền gàr brê, sền gàr tiah nhàr lơgar mờ cèng wơl cồng nha ai lơh broă sa sươn sre in.
Viết bình luận