Tơnơ̆ tŭ lòt sền bơta geh ngan broă lam lơh broă lơh rơcang lài kơryan kòp bơtờp bơh mpồl lơh sơnơm phan ròng mờ gơnoar atbồ tàm ƀòn lơgar dê, bàr, pe wàng ròng geh kơnrồ dà toh gơtìp jê ndul gơ jroh mờ chơt tàm 2 kơnhoàl Đơn Dương mờ Đức Trọng, mpồl lơh broă neh geh dơ̆ lơh broă mờ kwang đơng lam bồ càr Lâm Đồng.

Tàm do, ồng Phùng Đức Tiến sồr ală anih lơh broă dà lơgar bal mờ càr pal mhar lam lơh ală broă lơh nàng sơm phan 4 jơng gơtìp kòp jê ndul gơ jroh in, tơrmù lơyah ngan rlau jơh hoàc huơr mờ gàr kloh niam tiah ơm kis. Kụk lơh sơnơm phan ròng bal mờ ală mpồl lơh broă geh gơ rềng mhar lơh sir jơnau pơlam sơm kòp ngan ngồn ai kơnrồ dà toh gơtìp kòp in nàng pơlam di tŭ tus làng bol, pơgồp bal mờ làng bol sơm kơnrồ gơtìp kòp. Ƀộ Broă lơh sa mờ bơtàu tơnguh ƀòn lơgar mờ ală anih lơh broă dà lơgar, mpồl lơh sa kă bro ờs mờng bè ròng phan rơp dong kờl phan lơh sơnơm, sơnơm tơmba ai càr Lâm Đồng in.