Càr Dăk Lăk tŭ do geh di pơgăp 33 rơbô lồ ù tam tờm sầu riêng, tàm hơ̆, kơnhoàl Krông Păc geh sền là tiah geh tam uă tờm sầu riêng ngan càr Dăk Lăk dê. Là càr geh khà gơguh tam tờm sầu riêng mhar ngan gùt lơgar dê, mơya gah phan sầu riêng càr Dăk Lăk gam kong gơtìp mờ uă bơta lòng, bè: tiah tam ờ hềt tơrgùm, mìng geh tam bơrlŭ bal tàm suơn kơphe; broă lơh sa gam dềt; tiah tam geh ai màh sồ gam ờ uă; ngui bơta chài măi mok pa lơh plai sầu riêng mờ prăp gàr tơnơ̆ tơnhào bơtàu tơnguh ờ hềt uă, bơta bơkah ờ ndrờm bal; broă pơgồp bal bơta kwơ gam ờ nền nòn, broă lơh phan bơna lơh sa gam ờ ndrờm bal…

Ală cau ala măt đơs là, nàng bơsong ală bơta gơkòl do pal geh broă tus bal bơh jơh ală gah lơh broă, bơh làng bol lơh broă sa, dà lơgar, cau khoa học mờ mpồl lơh sa kă bro. Jăt Giáo sư, Tiến sĩ ồng Trần Văn Hâu đơs, bơta bơkah plai sầu riêng pal geh sền là bơta kwơ màng ngan, den tàng pal geh sền gròi lơh gơs bơta chài tam phan ai tơl tiah in. Ồng Trần Văn Hâu pà git: “He pal lơh geh bơta chài tam tàm tơl tiah, geh bal bơta pràn, bơta git wă bơh làng bol lơh broă sa dê den hơ̆ sồng gơtùi lơh gơs ală plai sầu riêng bơkah. Bơkah plai sầu riêng pal là bơta kwơ màng. Den tàng, ală cau tus bal tàm mpồl lơh geh bơta kwơ bơh làng bol lơh broă sa tus mờ dà lơgar, mpồl lơh sa kă bro jơh ală pal git sền gròi lơh geh khà măt kă bro plai sầu riêng bơh càr dê mờ plai sầu riêng lơgar Việt Nam bè hơ̆, hơ̆ sồng gơtùi bơtàu tơnguh kơl jăp”.

Gam jăt cau jăk gah lơh sa suơn sre mò Nguyễn Thị Thành Thực đơs, lơgar Việt Nam ờ hềt ai lơh jăt geh Jơnau lơh nền bơh Cíñ phủ dê loh làng nàng bơto pơlam bè lơh màh tiah tam, bơta do gam lơh gơbàn kal ke, kwi kwơ mờ kơnờm, geh tŭ ờ jai tàm broă cri bơyai lơh broă bal mờ ală gah lơh broă bal tŭ tăc mờ lơgar bơdìh. Mò Nguyễn Thị Thành Thực pà git: “Bol añ kơ̆p kờñ mờ dan Ƀộ broă lơh sa mờ Bơtàu tơnguh Ƀòn lơgar, ală Sở geh ală jơnau bơto sồr mè màh tiah tam bè hơ̆ den bol he hơ̆ sồng gơtùi yal tàm dunia mờ hòi jà ală lơgar dờp bal. He pal lơh tờm, ờ di dờp mờ jơnau rồn bơklơn ha là đờm jăt mờ lir jơnau bơh ală lơgar ndai dê”.

Bơh tàm mùl màl lơh sầu riêng tàm kơnhoàl dê, ồng Trần Văn Thắng, ala măt Mpồl lơh broă bal broă lơh drơng ala Broă lơh sa suơn sre tơlir, kơnhoàl Krông Păc, càr Dăk Lăk pà git, kơ̆p kờñ dà lơgar geh gùng dà broă bơtàu tơnguh gah phan sầu riêng jŏ jòng bal mờ ală broă nàng bơsong di tŭ. Ồng Trần Văn Thắng pà git: “Bơta pràn ờ geh uă bè priă jền, bơta chài lơh, cau lơh broă… den tàng bol añ kơ̆p kờñ ngan ală anih lơh broă geh gơnoar gơtùi dong kờl. Di lah dong kờl geh bè priă jền den niam ngan ha là dong kờl bè bơta chài măk mok pa, bơto sồr tàm broă lơh nàng lơh bè lơi niam ngan, gàr geh broă tă priă ờ uă ngan mờ tơnguh uă bơta niam phan geh lơh kơl jăp, jŏ jòng den hơ̆ sồng di pal mờ drà kă bro bơh lơgar blơi dê”.

Lơh chờ Sầu riêng Krông Păc, càr Dăk Lăk dơ̆ bàr nam 2024 neh lơh geh cồng nha niam bơnĕ, lời wơl ală bơta niam ngan tàm nùs nhơm làng bol bal mờ cau năc lòt nhơl sền. Lơh chờ hòi jà rơlao 350 hìu ràng phan bơh ală mpồl lơh sa kă bro, mpồl lơh sa bal, hìu lơh – kă bro ală bơta phan sầu riêng, phan OCOP mờ lơh sa suơn sre krơi is, phan dong kờl lơh sa suơn sre.. tàm càr mờ càr ndai, pơgồp bal tàm broă yal phan geh uă bơta, ală bơta plai chi bơkah tàm kơnhoàl do dê.

Tàm dơ̆ lơh chờ, dơ̆ sơnrờp ală plai sầu riêng bơkah ngan kơnhoàl Krông Păc dê geh bơyai lơh tàm pơrlòng tăc, mpồl bơyai lơh neh tăc geh cồng nha 03 nai “Ùr hàng sầu riêng”, mờ priă geh 2 tơmàn 800 tơlăk đong. Jơh khà priă geh bơh broă tàm pơrlòng tăc do rơ̆p ngui nàng lơh broă lơh sền gàr rài kis mpồl bơtiàn, bơsram tàp, dong kờl làng bol lơh broă sa tam tờm sầu riêng bè bơta chài tam, sơnka sền gàr nàng gơguh uă bơta bơkah, di pal mờ jơnau kờñ tăc mờ lơgar bơdìh.

Lơh chờ Sầu riêng Krông Păc, càr Dăk Lăk dơ̆ bàr neh lơh geh ală broă geh ai. Cau năc lòt nhơl bơh lơgar bơdìh, ală Anih lơh broă ala măt ală lơgar, ală mpồl lơh sa kă bro tàm lơgar mờ lơgar bơdìh sền gròi tus gah sầu riêng mờ kwơ màng rơlao jơh là làng bol tàm càr mờ bơdìh càr sền gròi lơh bè lơi nàng bơ̆t bơtàu gah phan sầu riêng kơl jăp.