Tơnơ̆ ală dơ̆ mìu nhai 7, uă kwang bàng, cau lơh broă sền gàr Brê dà lơgar Yok Đôn ngui rơndeh lơ òr nàng pơndiang git nđờ rhiang tờm chi Trắk Pơrhê bơh suơn ờng mờ gar tus Tiểu khu 526 nàng tam. Ồng Nguyễn Trung Hiếu, Phó Kwang atbồ Cơldŭ khoa họk mờ lơh broă bal dunia, Brê dà lơgar Yok Đôn pà git, 100% tờm chi dềt geh ờng, bơkiar sơntìl tàm suơn ờng mờ gar, gar ờng geh tơrgùm bơh ală tờm chi kra tàm brê. Broă kơlôi sơnơng, ờng sơntìl geh lơh bơh mờr 2 nam lài, tus tŭ do neh ờng mờ tam geh rlau 1 rbô tờm chi dềt tàm uă bă brê. Ồng Nguyễn Trung Hiếu yal bè broă ờng mờ tam brê mờ tờm chi Trắk Pơrhê tàm Brê dà lơgar Yok Đôn tàm tơngai lài bè do: “Lài ngan là he pal lòt sền ală tiah geh tờm chi Trắk, hơ̆ sồng đo was, sền sơ wì khà tờm chi, tơnơ̆ hơ̆ den lơh ală bă tơl khà mờ tiah tam bơh chi dê. Tơnơ̆ hơ̆ sền sơ wì ală bơta krơi is bè siñ họk bơh tờm chi Trắk dê tàm ală bă brê dờng bơh brê dà lơgar Yok Đôn dê. Bol hi chờ hờp ngan, tài neh pơgồp bơnah tàm broă lơh sền gàr sơntìl chi kuơmàng, ờ huan geh dơm chi Trắk ai Brê dà lơgar Yok Đôn in”.

Trắk Pơrhê là tờm chi dơm dờng, tờm chi jơnhia digơlan gơguh tus 25 thơk, dờng gơguh tus 1 thơk. Tàm càr Dăk Lăk, tờm chi do hòn uă tàm Brê dà lơgar Yok Đôn, tiah sền gàr brê bơnơm Ea Sô… Dơm chi Trắk Pơrhê geh bơta krơi is là kơldang, kră, dơm chi niam, là bơta dơm chi kuơmàng khà dùl tàm broă trah mòn niam chài mờ lơh phan ngui tàm hìu đam. Uă nam do, tài broă mus kơl ur ar lơh tờm chi do ngai sơlơ ờ huan gam tai.

Ồng Nguyễn Hữu Tạo, Phó Kwang atbồ Hạt Kiểm lâm Brê dà lơgar Yok Đôn yal, tŭ do tàm Brê dà lơgar Yok Đôn gam pơgap 200 tờm chi Trắk Pơrhê dờng, dilah ờ thàn ờng sơntìl nàng sền gàr, den jơnau pơhìn tờm chi ờ gam tai tàm mat chi brê tàm Brê dà lơgar do là uă ngan. Jat ồng Tạo đơs, broă kơlôi sơnơng ờng sơntìl nàng tam uă bơta tờm chi brê kuơmàng mpồl IIA do pơgồp bơnah sền gàr gen kuơmàng, pơgồp bơnah tam pa mờ tam wơl brê kơ̆ kơljap jŏ jòng sùm, kung bè gàr sùm bơta li la siñ họk. Ồng Nguyễn Hữu Tạo đơs: “Brê dà lơgar Yok Đôn neh geh rơndap broă kơlôi sơnơng khoa họk nàng sền gàr, pơn jat tai tam tờm chi Trắk. Tŭ do, neh ờng gơtùi, mờ gam kờp sền ală bă tam tàm brê geh is tàm ală bă brê ờ geh chi dipal, mờ rơp lam lơh pà tờm sơntìl ai làng bol ală thôn, ƀòn kis rềp brê in nàng tam uă, bơtàu tơnguh uă rlau tai. Broă tam uă tờm Trắk rơp pơgồp bơnah bơtàu tơnguh lơh sa làng bol in.”

Brê dà lơgar Yok Đôn, càr Dăk Lăk geh bă brê dờng ơm dơ̆ 2 gùt lơgar, mờ rlau 115 rbô lồ. Brê tàm do geh bơta li la siñ họk krơi is, tàm bơrlŭ bal tàm brê ờs mờng tơlir, brê nggùl ờs mờng tơlir mờ brê tờm chi dờng gơ jrùh nha jat kàl. Jat broă rơndap lơh, tàm kàl mìu nam do, Brê dà lơgar Yok Đôn rơp sơlơ tơnguh broă ờng sơntìl mờ dong kờl mờr 3 rbô tờm chi dềt Trắk Pơrhê ai làng bol kis tàm tiah rềp brê in tam mờ tam wơl brê tàm ală tiah gùt dar suơn.