Tàm hơ̆, bơta kwơ bơh broă lơh sa gơguh tai tàm uă bơta phan, pơgồp bơnah tơnguh uă priă lơh geh tăc phan mờ lơgar ndai jơh gùt càr dê, pơn jat tai đơs nền gơnoar kwơ màng tàm rơndăp tăp sèng lơh sa bơh càr dê. Nam 2024, giă tăc ală bơta phan lơh geh bơh broă lơh sa suơn sre tàm càr Dăk Lăk sùm ơm tàm khà uă. Giă kơphê, tiêu geh tŭ sùm gơguh uă ngan. Bơta do pơgồp bơnah tơnguh priă lơh geh ai làng bol, mpồl lơh sa kă bro in, lơh geh tŭ tơngai niam tơnguh priă lơh geh bơh phan bơna dê. Cồng nha lơh sa broă lơh sa suơn sre tàm càr tàm jơh gùt nam gàr niam lơh geh broă rơndăp lơh geh ai. Phan lơh geh bơh broă lơh sa suơn sre, phan brê mờ phan tàm dà kờp dŭ lơh geh rlau 23 rơbô 450 tơmàn đong, gơguh rlau 4% pơndrờm dùl tŭ bal mờ nam lài, sơrlèt 0,65% broă rơndăp lơh. Phan lơh geh bơh broă lơh sa suơn sre càr Dăk Lăk neh tăc mờ lơgar ndai tus rlau 70 dà lơgar mờ kơnhoàl ù tiah, priă lơh geh tăc phan mờ lơgar ndai lơh geh mờr 1 tơmàn 700 tơlak dolar Mỹ.

Ồng Nguyễn Hoài Dương, Kwang atbồ Sở Broă lơh sa mờ Bơtàu tơnguh Ƀòn lơgar càr Dăk Lăk pà gĭt: Nam 2025, gah broă lơh sa suơn sre lơh ngan kờp jơh bơta kwơ phan lơh geh bơh broă lơh sa suơn sre, phan brê, phan tàm dà lơh geh rlau 24 rơbô 700 tơmàn đong, gơguh rlau 5% pơndrờm mờ nam 2024. Nàng lơh geh jơnau kờñ do, càr rơ̆p pơn jat tai tơnguh bơta niam bơkah phan bơna lơh geh bơh broă lơh sa suơn sre dê nàng lơh geh tơl jơnau sồr tăc phan mờ lơgar ndai.