Jăt jơnau yal tàm pơrjum, 9 nhai do, broă lơh sa kă bro, bơcri priă dà lơgar, bơ̆t bơtàu phan bơna mờ tăc blơi phan mờ lơgar ndai tàm càr Dăk Lăk mờ Dăk Nông bơtàu tơngguh kơ̆ kơl jăp, uă broă jàu gơguh pơndrờm dồ tŭ mờ nam lài. Is ồn, càr Lâm Đồng pràn gơguh lơh sa geh tềl tơnggŏ gơ lơyài wơl. Jơh bal 3 càr ndrờm tìp kal ke, gơkòl gơrềng tus broă dong kờl ù, dong kờl hìu ơm ai làng bol jơi bơtiàn dồ êt nă cau in jăt Broă lơh jơnau kờñ Dà lơgar mờ broă ntrờn làng bol ờ jăt Broă rơndăp lơh…

Jăt Ƀộ trưởng ồng Nguyễn Văn Hùng đơs, cồng nha lơh geh tam 9 nhai do pà gŏ, 3 càr: Dăk Lăk, Dăk Nông mờ Lâm Đồng neh geh uă pơnđơl pràn, lơh ngan, ngan là tàm bơtàu tơngguh broă lơh sa sươn sre. Ƀộ trưởng ồng Nguyễn Văn Hùng sồr 3 càr tơrgùm ală broă lơh lơh sir jơnau kờñ neh sồr lơh tàm nam 2024. Tàm hơ̆, ală tiah pal lơh mhar tŭ tơngai ai priă bơcri dà lơgar dê, lơh sir ală broă bơ̆t bơtàu, rơndăp broă lơh bơcri priă dà lơgar; sền gròi rlau tai broă lơh sền gàr niam lơngăp lơngai sền gàr dà lơgar; prăp gàr mờ ngui niam ală bơta kwơ bè niam chài, pơgồp bal bơtàu tơngguh niam chài gơ jăt bal mờ lòt nhơl.