Kàl tơnhào plai kơphe tàm càr Dăk Lăk mùl màl geh sơn đờm bơh lồi nhai 10, mơya tờm kơphe mờng dum uă tàm bơh nggùl nhai 11 tus lồi nhai 12 jăt mờ tơl bơta sơntìl, tơl tiah dê. Ală nam pa do, bal mờ broă ngui bơta gơguh jăk bơh măi mok pa tàm broă lơh sa, geh uă làng bol neh ngui ală sơntìl pa geh bơta niam uă bè: dum ndrờm rơlao, jơla rơlao pơn drờm mờ ală sơntìl lài do, bơnah lơi pleh mờ ală bơta kal ke bè trồ tiah. Bơta gam tai là tơngai pic tơnhào nàng geh gar kơphe bơkah niam ngan. Ồng Lê Xuân Thủy, kis tàm xã Ea Na, kơnhoàl Krông Ana, càr Dăk Lăk pà git: “Pic bè ờs ờ di pal kơlôi rơcang bè lài do tai, tŭ neh dum là pic, di lah lir ir den lơh ờ niam tờm. Dum tờm lơi den pic tờm hơ̆. Pic dum jơh hơ̆ sồng wơl tai pic jơh tơn là di”.

Tơnơ̆ mờ git nđờ jơ̆t nam geh tàm khà bơh 30 tus 40 rơbô đong tàm 1 kĭ kơphe gar, tàm tŭ priă phơng, sơnơm sền gàr phan tam, priă tă ơpah cau lơh gơguh neh lơh uă làng bol lơh broă sa gơtìp dil ngan mờ broă lơh kơphe. Bàr nam pa do, priă tăc kơphe gơguh tus 100 rơbô đong tàm 1 kĭ, geh tŭ gơguh tus mờr 150 rơbô đong tàm 1 kĭ, lơh cau tam kơphe tàm càr Dăk Lăk mŭt tàm kàl tơnhào tàm nùs nhơm chờ hờp. Mơya, jăt ồng Trịnh Đức Minh, Củ tịc Mpồl tam klăc kơphe Buôn Ma Thuột đơs, tŭ do, priă tăc kơphe gơguh uă den pal lơh di pal jơh uă bơta nàng gàr geh bơta bơkah gar kơphe dê, bơh tŭ hơ̆ gàr niam drà kă bro lơgar bơdìh kơl jăp mờ jŏ jòng. Tàm hơ̆, bơta tờm ngan là pic plai kơphe pal geh dum rơlao 85% mờ ìs, pơr, prăp gàr di mờ bơta bơkah geh ai. Bơta do pal geh broă lơh nền nòn, lơh sùm tàm tơngai jŏ mơya tam gơl wơl bơta bơkah gar kơphe geh gơguh loh làng, khà geh kung uă rơlao, bơta kwơ màng rơlao là di pal mờ jơnau kờñ nền nòn bơh mpồl cau blơi dê. Ồng Trịnh Đức Minh đơs là: Làng bol lơh broă sa càr Dăk Lăk neh ngai sơlơ sền gròi tus mờ bơta do: “Làng bol lơh broă sa git wă niam ngan bè broă gàr bơta bơkah, ờ mìng bơh broă tam mờ gam geh tàm broă pic plai. Tàm broă lơh kơphe hữu kơ, kơphe kơl jăp, kơphe đềt mềr mờ tiah kis, làng bol lơh broă sa ờ gam tàm pơrlòng jăt cồng nha lơh geh mờ làng bol neh sền gròi tus mờ bơta kơ̆ kơl jăp bơh suơn kơphe dê. Lài do cồng nha bơh càr Dăk Lăk lơh geh di pơgăp 3 tấn tàm 1 lồ mơ mờ lơh ngan gàr sùm bè hơ̆ mờ ờ tàm pơrlòng jăt cồng nha uă”.

Càr Dăk Lăk geh sền là tiah geh tam uă kơphe ngan bơh gùt lơgar dê mờ bă ù tam geh rơlao 210 rơbô lồ, khà pah nam rơlao 550 rơbô tấn kơphe gar. Kơphe là phan geh lơh bơh suơn sre tờm ngan tàm broă lơh sa càr dê, gơrềng tơn tus mờ priă geh bơh uă làng bol kis tàm càr dê. Nàng bơtàu tơnguh gah phan kơphe kơl jăp, ồng Nguyễn Văn Hà, Phó Kwang atbồ Sở Broă lơh sa mờ Bơtàu tơnguh Ƀòn lơgar càr Dăk Lăk pà git, càr neh lơh uă rơndăp broă gơrềng tus gah phan kơphe mờ geh gùng dà broă lơh nàng tơnguh uă bơta bơkah phan geh lơh bơh lơh, tơnhào, lơh gơs mờ tăc kơphe. Tàm hơ̆, broă pic plai kơphe geh bơta dum là dùl tàm ală bơta kwơ màng ngan tus mờ cồng nha, bơta bơkah bơh gar kơphe càr Dăk Lăk dê. Ồng Nguyễn Văn Hà pà git: “Bol añ gam sồr làng bol bañ pic plai kơphe gam lir, pal lời dum hơ̆ sồng pic. Dơ̆ bàr là broă ìs, pơr tơnơ̆ mờ tŭ pic nàng gàr niam phan kơphe geh bơta bơkah. Dơ̆ pe, gam dan mờ ală mpồl lơh broă tăc mờ blơi phan mờ lơgar bơdìh gờñ pơgồp bal mờ ală mpồl lơh broă bal, mpồl lơh broă bơh làng bol lơh broă sa dê nàng phan geh lơh bơh làng bol dê tơnơ̆ mờ tŭ pic geh lơh di mơ, lơh gơs nàng drơng tàm broă tăc mờ lơgar bơdìh, nàng gàr bơta bơkah kung bè cồng nha lơh geh”.

Pic plai kơphe neh dum ờ mìng tơnguh uă bơta bơkah bơh gar kơphe dê mờ gam là broă lơh kơl jăp dong kờl bơ̆t bơtàu măt kă bro gar kơphe lơgar Việt Nam dê tàm drà kă bro ală lơgar. Làng bol lơh broă sa càr Dăk Lăk mờ nùs nhơm bơh să tờm dê gam ngai sơlơ ai tơngŏ gơnoar kwơ màng tàm gah phan kơphe lơgar Việt Nam dê.