Jăt mờ hơ̆ 09 nhai do, kờp jơh priă tă tàm kes priă Dà lơgar càr Dăk Lăk dê geh 6 rơbô 200 tơmàn đong, geh mờr 90% khà rơndăp broă Dà lơgar jào, gơguh rơlao 12% pơn drờm mờ tŭ do nam 2023.

Mìng is rề dia mờ priă pal tă geh gah dia lơh jăt geh 94% khà  kờp dŭ lài rơndăp broă geh jào. Geh ờ uă khà rề dia gơguh pơn drờm mờ tŭ do nam lài bè: priă dia ù, dia sền gàr tiah kis,  rề dia bơh tiah bơdìh mờ mpồl lơh sa kă bro dà lơgar, bơh mpồl lơh sa kă bro geh priă bơcri lơgar bơdìh dê. Ồng Phạm Thanh Long, Phó Kwang atbồ Kục dia càr Dăk Lăk pà git, nàng geh cồng nha do, mpồl lơh broă do neh lơh ndrờm bal, lơh pràn ală gùng dà broă atbồ gah rề dia, sơndră ờ geh rề dia, pơlam rề dia gam gơlời. Mờ lơh geh uă ală broă mblàng yal broă dong kờl, adăt boh lam dia pa; ngui măi yal tơngit mok pa, lơh pràn broă lơh niam sră nggal, tam gơl sồ.