Ƀộ Broă lơh sa mờ Bơtàu tơnguh Ƀòn lơgar Việt Nam mờ Đah sền gàr mpồng nhàr lơgar Lo pa kĭ Jơnau lơh nền bè broă sồr kloh niam phan sa gơwèt mờ plai sầu riêng lơh mrềt lơgar Việt Nam tăc tus lơgar Lo. Mờ Jơnau lơh nền pa geh kĭ hơ bal, kờp dŭ priă tăc plai sầu riêng lơh mrềt lơgar Việt Nam tàm nam 2025 di gơlan tus 300 tơlăk dolar Mỹ.

Tàm càr Dăk Lăk, do là tiah geh bă ù mờ khà geh plai sầu riêng ơm dơ̆ bàr gùt lơgar dê, càr do gam lơh ngan rơcang, tŭ lơi kung kờñ di pal mờ ală jơnau kờñ tus bal tăc mờ lơgar bơdìh tŭ Jơnau lơh nền geh ngui. Càr Dăk Lăk geh mờr 33 rơbô lồ ù tam tờm sầu riêng, khà lơh geh pah nam rơlao 280 rơbô tấn. Gùt càr neh geh 23 hìu dăp mờ 68 tiah tam geh ai màh sồ drơng tàm broă tăc plai sầu riêng ris tus lơgar Lo. Broă Ƀộ Broă lơh sa mờ Bơtàu tơnguh Ƀòn lơgar Việt Nam mờ Đah sền gàr mpồng nhàr lơgar Lo kĭ Jơnau lơh nền bè broă tăc plai sầu riêng lơh mrềt neh pờ geh uă bơta niam ai gah phan sầu riêng lơgar Việt Nam đơs bal, càr Dăk Lăk đơs is.