Khin kơlôi, khin lơh, bi neh ai plai ƀơ lơgar Việt Nam tăc tàm ală lơgar. Bơdìh hơ̆ tai, bi gam tơrgùm ală cau kờñ tam gơl pa, bơceh lơh nàng lơh gơs Hợp ták xã drơng ala lơh sa suơn sre sồ Bình Phước dê, neh geh tŭ dong kờl làng bol lơh broă sa ngui khoa họk kông nghệ tàm broă tam phan.

Tàm sơnam 35, Đặng Dương Minh Hoàng neh là cau tờm bơh broă lơh sa suơn dờng Thiên Nông dê ơnàng rơlao 50 lồ tàm kơnhoàl Bù Gia Mập, càr Bình Phước, tàm hơ̆ geh 12 lồ tam tờm plai ƀơ Mã Dưỡng (do là phan bơnah càr Bình Phước dê), gam tai là kao su mờ tiêu. Mờ cồng nha geh 100 tấn tàm 1 nam, priă tăc geh bơh 70 rơbô tus 90 rơbô đong tàm 1 kĭ, pah nam suơn tờm ƀơ cèng geh ai bi Hoàng in rơlao 6 tơmàn đong tơnơ̆ mờ tŭ neh kờp jơh priă tă. Plai ƀơ Mã Dưỡng tàm suơn dờng Thiên Nông ờ mìng geh tăc tàm drà tàm lơgar mờ gam geh tăc tus lơgar Lào, Campuchia, Đài Loan, Lo, Nhờk. Tŭ do, bi Hoàng gam tơrbŏ bal, pờ ơnàng drà kă bro tus câu Âu. Nàng geh cồng nha bè tŭ do mờ nàng plai ƀơ lơgar Việt Nam geh lòt ngài, “Cau tờm” khà măt kă bro “ƀơ Ồng Hoàng” neh pal sơrlèt mờ uă bơta kal ke tŭ “sơbì ƀòn dờng rê hờ ƀòn lơgar”.

Bi Hoàng yal wơl, ngai lài hìu nhă bi mìng tam kao su mờ tiêu. Gŏ plai ƀơ Mã Dưỡng là sơntìl geh uă bơta niam tàm broă lơh sa mờ geh sền là phan sa bơkah càr Bình Phước dê den tàng bèp bi Hoàng neh tam gơl tam tờm plai ƀơ. Tŭ gam pŏ ù den bèp ni sơna gơtìp chơ̆t. nam 2016, tơnơ̆ mờ tŭ lòt bơsram tàm lơgar Tây rê, bi Hoàng neh kơlôi sơnơng nàng tam tờm plai ƀơ Mã Dưỡng, pơn jăt tai jăt mờ jơnau kơ̆p kờñ bơh bèp dê.

Đơs bè broă ai plai ƀơ lơgar Việt Nam tăc tus tàm ală lơgar, lơh geh nùs nhơm gơboh kờñ bơh ală cau ngui sa nền nòn dê, bi Hoàng pà git, suơn tam tờm plai ƀơ bơh hìu nhă dê geh ngui kông nghệ Blockchain nàng jòi git tiah tam. Tàm ală phan kă bro điện tử, cau blơi mìng kờñ pờ mã QR geh git jơnau tơngit suơn tam, broă sơnka sền gàr suơn tờm plai ƀơ, bơta phơng sih geh ngui, ngai tơnhào mờ tăc. Do kung là broă lơh dong kờl khà măt kă bro “Ƀơ ồng Hoàng” geh tus mờ cau ngui sa, pờ ơnàng drà kă bro mờ ờ geh tus mờ cau lòt blơi. Bi Hoàng yal: “Loh làng gùng dà broă lơh sa suơn sre kloh, nàng sa mờ gơtìp kòp là gùng dà pal geh bơh cau ngui sa dê, gam geh uă cau jòi. Mơya, di lah lơh sa suơn sre hữu kơ mờ ờ git broă lơh sa sồ, ha là ờ git broă lơh sa suơn sre sồ den he roh bơta niam tơrbŏ bal mờ cau ngui sa. Broă pơgồp bal lơh sa suơn sre sồ mờ lơh sa suơn sre hữu kơ geh dong kờl cau ngui sa ngui broă sền gròi bơh ngài, loh làng jơh broă lơh, broă sơnka sền gàr tờm phan tam, sền gàr khà măt kă bro, bơ̆t bơtàu khà măt kă bro”.

Tŭ lơh sa suơn sre, bi Hoàng ờ jăt broă lơh ờs mờng, mờ ngui jơh tàm kông nghệ, ala bơta pràn kòn bơnus. Jơh bă suơn dờng geh crăp phan cảm biến, pơgồp bal mờ phan tuh dà jăt ntờc mờ sih phơng is geh crăp tus tơl tờm ƀơ. Bơh broă ngui Internet tơrbŏ bal rơbô phan ioT, jơh ală zữ liệu bè bơta sùh iò tàm ù, khà dà tuh mờ broă hòn gơs bơh phan tam ndrờm geh tơrgùm tàm phan cảm biến mờ pơyoa tus điện thoại nàng ală phan lơh broă mblàng mờ ai geh ală jơnau yal lài, bơto sồr nàng cau ngui in git tàm broă sơnka sền gàr, tơnhào phan tam bè lơi di pal. Cau tam geh tềm pềr geh 80% dà tuh, 40% phơng, sơnơm.

Broă lơh sồ jơh tàm broă lơh sa suơn sre bơh bi Hoàng dê neh geh uă cồng nha mờ geh uă cau sền gròi. Tŭ do neh geh uă ngan làng bol kis tàm càr Bình Phước geh tus bal pờ ơnàng bă ù tam ƀơ Mã Dưỡng tus 200 lồ. Bi Hoàng kơlôi, tàm broă lơh sa suơn sre “kờñ lòt ngài den pal lòt bal” den tàng bi sùm kơ̆p kờñ tam pà bal broă lơh nàng ală cau in git. Jơnau kơlôi do bơh bi Hoàng dê neh geh ùr lơh sa kă bro Nguyễn Thị Thành Thực kờñ ngan mờ pơlam lơh gơs hợp ták xã lơh sa suơn sre sồ, hòi tơrgùm 12 nă cau geh nùs nhơm ndrờm bal lơh, bơh tŭ hơ̆, Hợp ták xã Lơh sa suơn sre sồ Bình Phước neh geh lơh tàm nhai 6 nam 2022. Do là dùl tàm ală mpồl lơh broă sơnrờp ngan càr Bình Phước dê geh lơh jăt broă tam gơl sồ tàm broă lơh sa suơn sre. Bi Hoàng geh rơwah lơh Kwang atbồ.

Mờ gơnoar là Kwang atbồ Hợp ták xã, bi Hoàng neh pơlam mờ jào kông nghệ ai git nđờ jơ̆t mpồl lơh sa kă bro in. Bơh tŭ hơ̆ lơh geh ală mpồl lơh broă mờ cồng nha niam ngan mờ broă sơnka sền gàr nền nòn, dong kờl làng bol kung geh priă niam nàng tơnguh rài kis, tàm hơ̆ niam ngan là gơtùi cèng phan geh lơh bơh broă lơh sa suơn sre lơgar Việt Nam dê tus ngài tàm ală lơgar. Bi Nguyễn Minh Hiếu, cau tờm bơh anih lơh sa Gia Bảo Ecofarm tàm thị xã Phước Long, Phó Kwang atbồ Hợp ták xã lơh sa suơn sre sồ Bình Phước đơs: “Bi Hoàng geh bơta pràn gah kông nghệ thông tin. Hoàng sơbăc ngan mờ ală broă tam gơl pa neh geh bơto sồr oh mi, kung bè tơrbŏ bal jơnau tơngit nàng lơh broă lơh sồ jơh pràn kơl dang, niam bơnĕ rơlao”.

Tŭ do, ală cau tàm Hợp ták xã ndrờm geh bơto sồr ngui app AutoAgri, phan lơh geh bơh broă lơh sa suơn sre pal geh sơnka sền gàr jăt broă lơh bal. Bơta niam phan lơh geh bơh broă lơh sa suơn sre ờ geh bơta ờ ndrờm bal, den tàng broă tăc tàm drà kă bro tàm lơgar mờ lơgar bơdìh geh ƀuơn rơlao. Tàm gơnoar broă Kwang atbồ Hợp ták xã lơh sa suơn sre sồ Bình Phước, bi Hoàng rơcang tus bal mờ ală pơrjum, cri bơyai tơrbŏ bal gùng kă bro mờ ală mpồl lơh sa kă bro tàm lơgar mờ lơgar bơdìh, pơgồp bal tàm broă yal rùp rài phan geh lơh bơh broă lơh sa suơn sre càr Bình Phước dê mờ jòi anih nàng dong kờl ờ uă làng bol lơh broă sa, mpồl lơh sa kă bro jòi geh anih tăc phan geh lơh bơh broă lơh sa suơn sre ƀòn lơgar dê. Pa do ngan, bi Hoàng neh tơrbŏ bal nàng ală cau tàm Hợp ták xã geh mã tiah tam sầu riêng tăc tus lơgar Lo. Bơdìh mờ 12 nă cau tàm Hợp ták xã, bi Hoàng gam tam pà ờ sa priă app AutoAgri tus 1 rơbô 500 hìu làng bol lơh sa suơn sre tàm càr Bình Phước. Tus tŭ do, geh uă cau lơh sa suơn sre neh geh ngui bơh broă lơh bi Hoàng dê mờ lài ngan neh geh ală cồng nha.

Ồng Trần Quốc Duy, Kwang atbồ Anih hòi jà bơcri priă mờ lòt nhơl càr Bình Phước pà git, suơn tam ƀơ bơh bi Hoàng là dùl tàm ală broă lơh sa suơn sre ngăc ngar tàm càr Bình Phước dê. Bi Hoàng neh rơcang tơrbŏ bal, dong kờl bal, tam gơl broă mờng chài ai ơruh pơnu tàm càr in mŭt lơh broă jăt broă ngui kông nghệ. Nàng lơh geh dùl mpồl sơn đờm mŭt lơh broă di pal, dong kờl cau kơnòm să khin tàm broă tam gơl pa, bơceh lơh, tŭ do Anih do gam bal mờ bi Hoàng lơh geh uă broă lơh. Ồng Trần Quốc Duy pà git: “Tus tŭ do, bol añ gam lòt bal tàm dùl gùng lơh gơrề ală jơnau yal kờñ gơboh tus mờ ală cau gam kơnòm, dong kờl làng bol lơh broă sa tàm tiah do, geh pơgồp bal bơta pràn ai ală mpồl lơh broă in tam gơl pa, bơceh lơh mờ ală broă lơh mùl màl. Bè tơrbŏ bal mờ ală cau jăk chài bơto wơl ală bồ tơngoh, jơnau đơs, ha là bơto khoa họk kông nghệ. Bơh tŭ hơ̆ lơh bè lơi nàng lơh sa suơn sre càr Bình Phước tơnguh bơtàu mờ lòt bal cèng rùp rài phan lơh geh bơh broă lơh sa suơn sre lơgar Việt Nam tus mờ ală lơgar tàm dunia mờ tàm tiah do”.

Bơh ală broă lơh bơceh pa, tam gơl pa, broă tam tờm plai ƀơ bơh bi Hoàng dê geh khà VietGAP, dờp geh uă khà jờng bơh ală ƀộ, gah lơh broă. Bi Hoàng kung geh jào khà jờng Lương Đình Của tàm nam 2021 geh Đoàn ơruh pơnu dà lơgar jào pà.

 Tŭ do, bi Hoàng gam là Cau atbồ ală mpồl Lương Đình Của gùt lơgar. Mờ gơnoar broă do, bi Hoàng sùm bal mờ ală “cau lam lài Lương Đình Của” tơrbŏ bal, dong kờl bal ơruh pơnu kis tàm ƀòn mŭt lơh broă jăt broă lơh kông nghệ 4.0. Mờ bơta gơboh kờñ, nùs nhơm khin tàm broă lơh, geh jòi sùm, bơceh lơh mờ lơh pràn, klao kỹ sư bơsram bơh lơgar Tây neh lơh uă cau pal ngềr ngan bè bơta ai geh broă lơh să tờm in lài do, tŭ rơwah rê mờ ƀòn lơgar nàng lơh broă, pơgồp bal tàm broă ai phan lơh geh bơh broă lơh sa suơn sre lơgar Việt Nam lòt ngài.