Ngai 11/09, tàm ƀòn dờng Buôn Ma Thuột, càr Dăk Lăk, Ƀăo Lơh broă sa Việt Nam, là mpồl Duh broă sùm Mpồl Đơng lam Cribơyai Tàm tơn tìp phan lơh geh bơh sươn sre 970 gơ wèt Ƀộ Nông nghiệp mờ Phát triển Nông thôn pơgồp bal mờ Sở Nông nghiệp mờ Phát triển Nông thôn càr Dăk Lăk, Ală mpồl sầu riêng càr Dăk Lăk, Kụk Sền gàr phan tam, Kụk Bơta niam, Lơh gơlik phan mờ Rề ơnàng drà kă bro neh bơyai lơh Cribơyai “Đal gĭt bơta geh ngan lơh bal lơh sa, tăc bro, tăc mờ lơgar ndai sầu riêng nam 2023 mờ Broă lơh bơtàu tơnguh geh cồng nha, kơ̆ kơl jăp jŏ jòng gah phan sầu riêng lơgar Việt Nam”.

Đơs tàm dơ̆ cribơyai, Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan pà gĭt, bơh lài mờ tŭ Nghị địñ thư bè sền swì kòp sầu riêng geh kĭ hơ tơn, pờ gùng ai tăc uă mờ di gùng lơgar ndai, Ƀộ Nông nghiệp mờ Phát triển Nông thôn neh kơlôi lài geh jơnau digơlan gơlik geh ngai do bơh gah sầu riêng dê. Nàng sơrlèt gan, jơh bal cau lơh sa hơ̆ là cau lơh broă sa, mờ cau tăc bro hơ̆ là mpồl lơh sa kă bro ờ mìng sền gròi bơta kwơ bơh he dê lơm mờ kờñ pal bơ̆t bơtàu ai jơh bal rài tơnơ̆ do gah phan dê in tai. Anih lơh broă ătbồ dà lơgar, gơnoar ătbồ, mpồl lơh sa kă bro, ală mpồl pal tus bal lơh bơh chờm bal mờ cau lơh broă sa nàng làng bol in geh wil tơl jơnau yal tơngĭt nàng tam gơl lơh sa.