Tàm dơ̆ cribơyai, ală cau ala măt neh yal bè ală jơnau gam gơkòl, ală bơta ờ hềt dipal tàm broă tam uă tờm chi jŏ nam tàm lơgar he dê tŭ do. Ală cau ala măt kung đơs là, nàng tam uă tờm chi jŏ nam jăt gùng dà kơ̆ kơl jăp, pal lơh jăt dùl ròt ală broă lơh. Bơh lơh sir rơndăp ù tiah tam ală tờm chi jŏ nam jăt gùng dà lơh gơlik phan kă bro gơ jăt bal mờ lơh gơlik phan mờ gơtùi tăc geh tus tam gơl pa broă lơh bơcri priă, tam gơl bơcri priă rah rài tus bơcri priă dipal, ngui làm uă ală bơta jak chài măy mok, ngan là măy mok ătbồ sồ tàm sươn chi. Geh sùm drà blơi ai phan bơna in bơh ală kơrnoăt, broă dong kờl dipal. Sơlơ tơnguh tai gơnoar broă ătbồ bơh Dà lơgar dê, tàm hơ̆ broă tờm là lơh sir gùng dà broă lơh, adat boh lam nàng kờñ lơh geh bơta tam gơl mhar tàm broă dong kờl cau lơh sa, lơh gơlik phan mờ tăc mờ lơgar ndai phan bơna chi jŏ nam. Ală jơnau đơs tă pơgồp tàm dơ̆ cribơyai dơ̆ do là cơng tàng kwơmàng nàng Viện Rơndăp ù tiah mờ Rơndăp lơh broă lơh sa sươn sre in lơh sir jơnau yal pơyua Ƀộ Nông nghiệp mờ Phát triển Nông thôn in sền swì mờ jun yal mờ Cíñ phủ in.