Jat Sở Broă lơh sa mờ Bơtàu tơnguh Ƀòn lơgar càr Dăk Lăk, tơngai tơnhào kơphê nam 2023-2024, kờp jơh khà tơnhào kơphê Dăk Lăk dê lơh geh rlau 535 rơbô tấn, gơmù 23 rơbô tấn pơndrờm kàl tơnhào nam lài.  Kơnờm geh giă tăc mờ lơgar ndai gơguh uă, priă lơh geh tăc kơphê mờ lơgar ndai bơh càr dê lơh geh 915 tơlak dolar Mỹ, gơguh 168 tơlak dolar Mỹ pơndrờm mờ kàl tơnhào lài hơ̆.

Jat ồng Nguyễn Hoài Dương, Kwang atbồ Sở Broă lơh sa mờ Bơtàu tơnguh Ƀòn lơgar càr Dăk Lăk, tờm kơphê kung là tờm chi tam tờm ngan, tă pơgồp kwơ màng tàm bơtàu tơnguh lơh sa- mpồl bơtiàn bơh càr dê. Is ồn, tàm tơngai nam 2023-2024, Dăk Lăk neh rề ơnàng, bơtàu tơnguh geh phan bơna kơphê bơkah pơn rơ, do là gùng lòt bơtàu tơnguh pa, di pal mờ jơnau kờñ cau ngui  tàm dunia dê. Tàm kàl tơnhào kơphê mờr tus, ală tiah sền gròi tơnguh uă cồng nha lơh geh, bơta bơkah niam kơphê dê, bơtàu tơnguh uă rlau tai ală tiah tam kơphê bơkah pơn rơ; lơh pràn sền gàr dong kờl kơphê geh ù tiah sơñio Buôn Ma Thuột tàm ală drà kă bro lơgar ndai dê, lơh jat tam kơphê ờgŏ di mus brê bơh mpồl tam klăc câu Âu dê.