Broă lơh tơl xã dùl bơta phan ngai sơlơ geh sền gròi, hòi jà geh broă tus bal bơh uă cau. Dơ̆ sền wơl, tam cah khà săp sèng dơ̆ do, geh 30 bơta phan gơwèt ală mpồl phan, dà hùc, ñhơ̆t sơnơm bơh 18 mpồl là ală kông ty TNHH, Hợp ták xã mờ hìu kă bro tàm ƀòn dờng Buôn Ma Thuột, kơnhoàl Krông Păc, Krông Năng, Cư̆ Mgar mờ Krông Ana.

Do kung là ală phan geh bơh lơh sa suơn sre geh pơnrơ ngan, mìng geh tàm ù tiah tàm ală kơnhoàl geh bơcri priă bè bơta niam, phan geh lơh, tiah tam, loh làng. Tus tŭ do, gùt càr Dăk Lăk neh geh 110 bơta phan OCOP geh bơh 3 tus 4 sơrmañ. Tàm gùng dà tơnguh bơtàu phan OCOP, càr Dăk Lăk lơh ngan tus nam 2025 geh 200 bơta phan OCOP, nam 2030 geh 300 bơta phan OCOP geh dờp. ală bơta phan tơnguh rơhời bơta niam, khà sơrmañ, geh tus drà kă bro tàm lơgar mờ lơgar bơdìh mùl màl.