Bă sầu riêng Dona rlau 14 lồ bơh 10 hìu làng bol dê tàm thôn 19/5, sàh Krông Pắc geh khà plai digơlan pơgăp 350 tấn geh ai tàm pơrlòng giă bal mờ giă bơh chờm 55 rbô đong dồ kĭ. Tus bal tàm pơrlòng giă geh 10 mpồl lơh sa kă bro tơrgùm blơi mờ tăc mờ lơgar ndai phan lơh geh bơh sươn sre. Kông ty Kong kơnòl nă să is Tăc mờ blơi phan lơh geh bơh sươn sre Nguyên Thuận (ƀòn dờng Hồ Chí Minh) là mpồl tàm pơrlòng giă geh cồng nha bal mờ khà giă 68 rbô đong dồ kĭ, ndrờm mờ priă sră pơrgon pơgăp 23 tơmàn 800 tơlak đong. Ồng Mai Đình Thọ, Mpồl lơh broă bal drơng broă sa priă broă lơh sa sươn sre kloh Krông Pắc, càr Dăk Lăk đơs, broă tàm pơrlòng giă ờ mìng dong tơngguh priă jền lơh sa bơh plai sầu riêng dê lơm mờ gam lơh gơlik pràn gơn kơnờm nàng cau tam in bơcri priă tơngguh uă bơta niam phan bơna.

“Bơh dar tàm pơrlòng giă do, cau geh pơrlòng giă den kung chờ hờp sơl tài bơh geh rwah ală sươn niam ngan, bơkah ngan nàng tăc mờ cau năc blơi phan in. Bơta ndai, cau ngui sa den gơdờp sơlơ̆u wơl, ờ mìng gơguh tai cồng nha bè lơh sa mờ gam pơn jờng bơta chờ hờp bơh ală cau lơh sầu riêng dê tai”.

Broă lơh tàm pơrlòng giă sươn sầu riêng là dùl tàm ală bơta pa bơh Lơh chờ Sầu riêng Dăk Lăk nam 2026 dê, pơgồp bơnah bơ̆t bơtàu măt kă bro sầu riêng càr dê jăt gùng niam, song dơ pă loh làng mờ tơngguh uă pràn tàm pơrlòng tàm drà. Jăt Mpồl Bơyai lơh, bơh tŭ do tus ngai 20/8 rơ̆p pơn jăt tai bơyai lơh tai 2 dar tàm pơrlòng giă. Digơlan pơgăp 200 lồ sầu riêng, khà plai pơgăp 4 rbô 600 tấn, lơh geh jơnau sồr mờ geh màh sồ tiah tam rơ̆p geh ai tàm pơrlòng giă, lơh geh gah tàm tơrbŏ tơn đah mpồl lơh sa kă bro mờ tiah tam phan.

Ồng Lại Đức Đại, Chủ tịch Anih duh broă Làng bol sàh Krông Pắc pà gĭt, cồng nha dar tàm pơrlòng giă bơh sơnrờp sơrlèt rlau bơta kơ̆p gơn bơh Mpồl bơyai lơh dê, lơh geh bơnàng jă nàng ƀòn lơgar in pơn jăt tai lơh sir broă lơh tơrlòng lài tàm pơrlòng giă mờ tơngguh uă bơta kwơ gah phan sầu riêng.

“Dar tàm pơrlòng giă ngai do sơrlèt rlau mờ bơta kơ̆p gơn bơh Mpồl bơyai lơh dê. Geh bơta sồr lơh bơh Anih duh broă Làng bol càr dê tàm gùng dà bơ̆t bơtàu ală anih lơh gơlik gơ wèt mờ gah phan sầu riêng, bol hi gĭt nền bơyai lơh tàm pơrlòng giă là dùl broă lơh nàng rơhời đơs nền măt kă bro sầu riêng Krông Pắc đơs is mờ sầu riêng Dăk Lăk đơs bal tàm drà. Cau lơh broă sa rơ̆p ờ mìng tăc phan bơna lơm mờ là tăc bơta kwơ bal mờ ală cồng nha mờ khi dipal geh dờp”.

Càr Dăk Lăk tŭ do geh pơgăp 45 rbô lồ sầu riêng. Nam 2025, khà plai pik tơnhàu geh rlau 390 rbô tấn, cèng wơl priă kă bro rlau 1 tơmàn 100 tơlak dolar Mỹ. Nam do, khà plai pik tơnhàu digơlan geh rlau 500 rbô tấn. Jăt Sờh Broă lơh sa sươn sre mờ Tiah ơm kis càr Dăk Lăk, cồng nha dar tàm pơrlòng giă bơh sơnrờp là bơnàng jă nàng ƀòn lơgar in pơn jăt tai lơh sir broă lơh tơrlòng lài, rề ơnàng broă lơh tàm pơrlòng giă tàm ală kàl sầu riêng pơn jăt tai.