Bŭ lah tàm pơgăp 2 bơnah 3 khà kờp làng bol gam tàm sơnơm lơh broă, uă càr kung gam ờ tơl cau lơh broă drơng tàm broă bơtàu tơnguh in. Bè hơ̆ cau lơh broă Tây Nguyên gam tàm tiah lơi tàm pang rùp ù tiah ntrờn cau lơh broă dê?. Tàm jơnau cih dơ̆ bàr bơh ròt jơnau cih “Jơnau kờñ gơguh tai Tây Nguyên dê mờ bơta lòng bơta pràn cau lơh broă” geh măt sơnđan “Bơsong jơnau lùp cau lơh broă ai jơnau kờñ bơtàu tơnguh kơnhăp jŏ tiah Tây Nguyên in” rơ̆p lòt jòi jơnau hơ.

Cau lơh phan Đoàn Văn Tâm, cau pa rê bơh ƀòn dờng Hồ Chí Minh rê wơl hờ ƀòn tờm nàng lơh broă tàm Tiah lơh sa mờ măi mok Becamex Bình Định, càr Gia Lai dê pà git, jơnau kơ̆p kờñ geh rê ƀòn lơgar tòm nàng lơh broă mờ kơl jăp rài kis tơnơ̆ mờ dùl tơngai jŏ lik bơdìh ƀòn lơgar nàng jòi geh broă lơh pà git: “Lài do, añ mŭt tàm sơnah ƀòn Bình Tân, Sài Gòn (Ƀòn dờng Hồ Chí Minh) lơh broă mờr 10 nam. Priă nhai, priă pơn jờng tàm hơ̆ 1 nhai geh tàm 13 tơlăk đong, mơya tŭ do rê tàm do ơm kis mờ lơh broă nàng rềp hìu. Priă nhai tờm mờ priă geh tai tŭ tơnguh tơngai lơh broă, tă priă sền gàr hơ̆ sồng gam 8 tơlăk đong pah nhai. Priă nhai ờ uă he ngui sa ờ uă den kung gam niam rơlao mờ lơh broă tàm Sài Gòn”.

Tơnơ̆ mờ tŭ tơmŭt bal, ală càr tiah Tây Nguyên geh tai ù tiah ơnàng nàng bơtàu tơnguh, hòi jà uă rơndăp broă lơh bè tiah lơh sa mờ măi mok, lòt nhơl, anih ơhò dà lềng mờ tiah drà mờ kờp jơh priă bơcri rơlao 470 rơbô tơmàn đong, tơngai bơh nam 2026 tus 2030. Mìng is càr Dăk Lăk geh di pơgăp 170 rơbô tơmàn đong. Ồng Huỳnh Lữ Tân, Kwang bàng tàm Mpồl Lơh kơnòl broă sùm Tỉnh ủy càr Dăk Lăk, Lam bồ Mpồl Atbồ Tiah lơh sa Phú Yên pà git, ală rơndăp broă lơh pa kờñ tus 60 rơbô nă cau lơh broă. Do là dơ̆ niam broă lơh, priă geh ai làng bol in, mơya kung là bơta lòng bè khà kờñ mờ bơta jăk cau lơh broă dê: “Mờ Kờp jơh khà priă bơcri uă ngan bơh broă lơh phan bơna tàm ală tiah lơh sa mờ măi mok, rơndăp broă lòt nhơl mờ ală rơndăp broă lơh tơnơ̆ tàm tiah lơh sa mờ măi mok tàm ală tiah lơh sa, añ kơlôi là rơ̆p geh dùl khà gal cau tus lơh broă. Mìng is Mpồl lơh broă Hoà Phát mờ ală rơndăp broă lơh ndai bơh tŭ do tus nam 2030 di gơlan ai geh di pơgăp 40 rơbô nă cau lơh broă tàm tiah đah măt tơngai Lik càr Dăk Lăk dê”.

Ồng Nguyễn Quang Thuân, Phó Kwang Lam bồ Sờh Broă dơlam is càr Dăk Lăk đơs là, di lah ờ geh broă lơh dong kờl di pal, cau lơh broă rơ̆p pơn jăt tai là bơta gơkòl bơtàu tơnguh càr dê: “Tŭ do, ală mpồl lơh sa kă bro lơh broă tàm càr Dăk Lăk tơm priă cau lơh broă in là ờ uă ngan pơn drờm mờ ală tiah ndai. Tài he là tiah 3, tiah 4. Geh tŭ uă cau lơh broă lòt bơsram broă lơh tàm ƀòn dờng Hồ Chí Minh ha là Đồng Nai geh tơm priă bơh 8 tơlăk 500 rơbô đong tàm 1 nhai ha là uă rơlao, mơya tŭ rê tàm càr Dăk Lăk lơh broă, ală cau do mìng geh tơm priă tàm 6 tơlăk đong tàm 1 nhai mơ. Pơn jăt tai, tiah lơh broă kung ờ ndrờm mờ ală mpồl lơh sa kă bro dờng, den do kung là ală bơta ờ pràn, den tàng ală mpồl lơh sa kă bro tàm càr Dăk Lăk pal tam gơl pa nàng hòi jà, gàr jơng cau lơh broă”.

Lơh broă mờ Gah Broă dơlam is bè broă cau lơh broă ai tơngai bơtàu tơnguh pa in, ồng Tô Lâm, Tổng Bí thư, Chủ tịc lơgar đơs loh: Broă gàr bơta niam cau lơh broă sùm pơgồp bal mờ broă tơnguh uă bơta niam rài kis ai cau lơh broă in; Bơtàu tơnguh cau lơh broă ờ mìng là broă dong kờl cau lơh broă mờ gam pơgồp bal mờ broă dong kờl jơi bơtiàn, bơtàu tơnguh kòn bơnus mờ tơnguh nùs nhơm pin dờn bơh làng bol dê.

Bŭ lah ờ đơs tus tàm bơta krơi is tàm ală càr Tây Nguyên dê, mơya gùng dà broă đơng lam bơh Tổng Bí thư, Chủ tịch lơgar dê tàm dơ̆ lơh broă do neh đơs di mờ bơta tờm tiah Tây Nguyên dê tàm broă bơtàu tơnguh cau lơh broă, hơ̆ là “pal pơgồp bal mờ rài kis broă lơh broă sa mùl màl bơh tơl tiah, tơl jơi bơtiàn, tơl mpồl bơtiàn” dê; “Pơgồp mờ prăp gàr bơta niam chài, sền gàr tiah kis, gàr brê, gàr ù, gàr dà căt, gàr tiah nhàr lơgar”. Ồng Tô Lâm, Tổng Bí thư, Chủ tịch lơgar đơs loh làng ngan bè gơnoar bơh Dà lơgar bal mờ ală kơnòl broă pal lơh. “Dà lơgar dong kờl lơh phan bơna, ai càn priă, yal tơngit, bơto pơlam adăt boh lam, mpồl lơh sa kă bro, lơh broă bal, hìu lơh sa, pơgồp bal broă blơi phan bơto sồr bơta chài, bơ̆t bơtàu măt kă bro, bơta niam, càr bơyai lơh tơrbŏ bal lơh broă lơngăp lơngai, tơrmù broă ntrờn ơm kis lơh is, lơh broă ờ tơl, gơtìp sơgràm, gơtìp pơrlồm. Bơtàu tơnguh broă lơh tàm tiah làng bol jơi bơtiàn pơgồp bal mờ prăp gàr bơta niam chài, sền gàr tiah kis, gàr brê, gàr ù, gàr dà căt, gàr tiah nhàr lơgar jơnau kờñ ờ mìng geh tai broă lơh mờ pal broă lơh gơdờp bal mờ bơta geh is, niam chài, bơhiàn, lơh sa, dong kờl làng bol kơl jăp rài kis, tơrmù rơƀah kơl jăp, pin dờn tơrgùm bal, pơgồp bal tàm broă bơtàu tơnguh bal dà lơgar dê”.

Mùl màl bơh suơn mìr tus mờ ală tiah lơh broă, ală rơndăp broă lơh dờng tàm ală càr tiah Tây Nguyên, tus mờ ală jơnau đơng lam, gùng dà broă lơh bơh kwang đơng lam Đảng mờ Dà lơgar dê ndrờm pà gŏ, bơto cau lơh broă là di pal mờ jơnau kờñ tềng đăp măt, mờ nàng rơcang ai bơta pràn tàm pơrlòng jŏ jòng in. Cau lơh broă tơl bè khà geh, kơl jăp bè bơta jăk chài rơ̆p là bơta pràn kwơ màng nàng ală rơndăp broă bơtàu tơnguh lơh geh cồng nha, lơh jăt mùl màl jơnau kờñ gơguh lơh sa 2 sồ, mờ kung là bơta pràn nàng bơ̆t bơtàu dùl Tây Nguyên tơlir, uă bơta niam krơi is, dùl tiah nhàr kơl jăp dà lơgar dê.

Mờ kờñ geh bơta do, ală càr tàm Tây Nguyên ờ mìng lơh jăt ală broă dong kờl phan bơna, ai càn priă, yal tơngit, bơto bơtê bè jơnau Tổng Bí thư, Chủ tịch lơgar neh sơnio sồr, mờ gam pal lơh pràn tàm broă bơsong ală kal ke tàm gơguh lơh sa bè tŭ do; gàr tơl broă lơh – priă geh bal mờ rài kis kơl jăp ai cau lơh broă in.

Sền jơnau cih sơnrờp tềng do: https://vov4.vov.vn/kho/broa-loh-sa-nha-nong/rot-jonau-cih-jonau-kon-goguh-tai-tay-nguyen-de-mo-bota-long-bota-pran-cau-loh-broa-jonau-cih-sonrop-o-tol-oa-ngan-cau-loh-broa-boh-anih-loh-broa-bot-botau-tus-suon-mir-bal-mo-hiu-mai-523209.vov4