Mờ kờp jơh bă ù ơnàng rlau 720 rbô lồ, tàm hơ̆, pơgăp 95% là kơphê Robusta, Việt Nam tŭ do là dùl tàm ală dà lơgar lơh gơlik mờ tăc kơphê Robusta mờ lơgar ndai uă ngan rlau jơh dunia, geh tus pơgăp 40% khà kơphê tăc tàm drà gùt plai ù. Lơh gơlik kơphê Robusta lơh geh broă lơh broă sa ai gĭt nđờ rơhiang rơbô hìu làng bol lơh broă sa in, is ồn tàm kơnhoàl ù tiah Tây Nguyên.

Bulah bè hơ̆, gah phan Robusta gam tìp mờ uă bơta lòng. Tŭ do, rlau 70% khà hìu làng bol lơh broă sa ngui phơng sih sơrlèt ir jơnau kờñ, lơh gơguh tai priă tă lơh sa, gơmù bơta niam nđiơm gơs ù mờ gơrềng tus cồng nha tam phan. Tàm tŭ hơ̆, jơnau geh ngan pik tơnhàu plai lir (plai lư̆t) kung gam geh uă ngan sơl. Cồng nha kơlôi sơnơng bơh Anih kơlôi sơnơng Jak chài Măy mŏk Broă lơh sa sươn sre brê bơnơm Tây Nguyên dê pà gŏ, broă pik tơnhàu plai lir bồ kàl digơlan lơh gơmù rlau 22% bơnah kơphê gar, mơkung lơh gơguh khà gar kơphê ờ niam, gơrềng tus bơta niam phan ngui lơh phan mờ khà priă phan kă bro dê.

Tàm pơrjum cribơyai, ală cau ala măt kung đơs là, tàm bơta drà kă bro ală lơgar ngai sơlơ gơlik tơlik ală jơnau sồr kal ke ngan bè bơta niam, bơtàu tơngguh kơ̆ kơl jăp, jòi gĭt anih tờm lơh mờ gơmù ƀà tơlik nhơm ƀơ̆ tus tiah ơm kis, broă tơngguh uă bơta niam Robusta pal sơnđờm bơh tiah tam kơphê, bơh lơh tam gơl niam wơl sơntìl, đòm jăt ală broă pơlam tam jak chài, pik tơnhàu di bơta dum, lơh niam dồ êt bơh chờm mờ lơh gơlik phan jăt ală jơnau sồr, mơkung bơ̆t bơtàu ală mpồl lơh bal kơnhăp jŏ đah cau lơh broă sa sươn sre, mpồl lơh broă bal mờ mpồl lơh sa kă bro. Tàm hơ̆, pal gĭt nền loh gơnoar broă bơh tơl cau tờm dê bơh lơh gơlik, tơrgùm blơi, lơh gơlik phan tus tăc bro nàng kờñ sok sền bơta niam, gơguh tai priă jền mờ tơngguh uă pràn tàm pơrlòng bơh kơphê Robusta Việt Nam dê tàm drà dunia. Ồng Thái Như Hiệp, Phó Chủ tịch Tơrgùm ală Mpồl Kơphê – Ka kau Việt Nam, đơs là:

 “Kờñ tơngguh uă bơta niam kơphê Robusta Việt Nam bol he pal sơnđờm bơh sơntìl, dà, ù, nhơm trồ tiah, niam chài mờ jơh ală phan bơcri tàm broă lơh sa sươn sre pal jăt ală jơnau sồr bơh sơntìl mờ bol he dê tam. Bulah bè hơ̆, bơta chài rơ̆p mìng là nggùl broă gời lơm, bơta niam mìng gơgơs priă jền tŭ mpồl lơh sa kă bro gĭt nền loh jơnau sồr, lam lơh, đo was song dơ pă loh làng mờ ai giă khà dipal ai cau lơh broă sa in”.

Bơh anih ơm là dà lơgar lam bồ dunia bè lơh gơlik mờ tăc kơphê mờ Robusta mờ lơgar ndai, Việt Nam gam ơm tềng đăp jơnau sồr pal tam gơl bơh gơguh khà phan lơh geh tus tơngguh uă bơta niam mờ priă jền. Bơta hơ̆ ờ mìng kơnờm tàm bơta chài tam phan halà măy mŏk lơh gơlik phan lơm mờ gam gơ sồr bơta lơh bal kơ̆ kơl jăp đah cau lơh broă sa, mpồl lơh broă bal, mpồl lơh sa kă bro mờ ală anih lơh broă ătbồ dê. Bơh hơ̆, Robusta Việt Nam rơ̆p geh tai tŭ niam đơs nền măt kă bro, tơngguh uă pràn tàm pơrlòng mờ bơtàu tơngguh kơnhăp jŏ tàm drà ală lơgar.