Ală nam pa do, phan bơna “Phe sàng goh Thăng Bình HTB” bơh Hợp ták xã drơng broă tơrgùm bal Lơh sa suơn sre Thăng Bình, Xã Cư Kty, kơnhoàl Krông Bông geh cau ngui sa đơs sa bơkah ngan. Nam 2020, phan bơna “Phe sàng goh Thăng Bình HTB” neh dờp tơl khà phan bơna OCOP 4 sơrmañ kấp càr. Ngan là bồ nam 2022, hợp ták xã neh kĭ sră tăc phe sàng goh tăc tus lơgar New Zealand, mờ khà bơh chờm là 6 tấn. Tŭ do, mat kă bro Phe sàng goh Thăng Bình HTB kung neh geh tăc tàm 26 đại lý tàm 12 càr, ƀòn dờng tàm jơh gùt lơgar. Geh cồng nha bè do, ồng Võ Văn Sơn, Kwang atbồ Hợp ták xã drơng broă tơrgùm bal Lơh sa suơn sre Thăng Bình pà gĭt, jơh ală bơta là kơnờm lơh bal nàng tơnguh uă bơta kwơ phan bơna dê.

Ồng Võ Văn Sơn, đơs:  Lài do lơh bal nàng tă bơsong ală bơta kal ke tàm broă lơh sa, mơya tơnơ̆ tŭ tă bơsong ală bơta kal ke tàm broă lơh sa cau lơh broă sa den kờñ wơl tă bơsong tai ală bơta kal ke tàm broă tăc bro phan bơna den hơ̆ là maketing phan bơna. Cau lơh broă sa lài do mìng gĭt tam phan lơm mơya tŭ do kờñ ai phan bơna tăc tus drà kă bro den pal lơh maketing, lơh broă yal tơngĭt den hơ̆ là ală broă lơh mờ hợp ták xã dong kờl cau lơh broă sa in nàng hời rơ hời ai phan bơna tăc tus drà kă bro dờng.

Mờ ală mpồl lơh sa kă bro lòt lài tàm broă lơh tăc phan bơna bơh suơn sre tus drà kă bro, broă lơh pràn lơh bal tàm broă tam phan, tăc bro phan bơna lơh geh ală anih lơh gơlik phan niam là kờñ geh ngan nàng wèt tus rài lơh sa phan bơna tơngai pa dê cèng wơl priă lơh geh uă. Pơn rơ bè tàm kông ty Kổ phần Damaca Nguyên Phương, xã Phú Lộc, kơnhoàl Krông Năng, tŭ tus bal tàm ală anih lơh bal, kông ty hơ: cau lơh broă sa geh tăc bro phan bơna mờ giă kơl jap, niam, ờ hoan hoàc huơr; geh mpồl lơh sa kă bro bơcri priă blơi sơn tìl, phan bơna lơh sa suơn sre nàng iang nùs lơh sa.

Mờ mpồl lơh sa kă bro kung rcang lài geh anih lơh gơlik phan bơna, bơta niam geh atbồ. Mò Nguyễn Thị Thu Phương, Kwang atbồ kông ty pà gĭt: Tŭ do tàm làng bol cau lơh broă sa mìng tam phan jat bơta pràn mờ khi gơtùi lơh. Làng bol lơh broă sa lơh is ờ gơtùi lơh dơ̆ lĕ bal ai tơlik phan bơna geh bơta niam ndrờm bal ờ. Den tàng, ală mpồl lơh sa kă bro kờñ pal mŭt lơh bal mờ cau lơh broă sa nàng lơh geh phan bơna niam ngan rlau jơh, bè: tơnhào phan tam di tơngai, di tŭ tơngai ai cồng nha niam ngan rlau jơh. Kung bè sơng ka sền gàr phan tam lơh mbè lơi ai gơ in niam den ờ mìng geh cau lơh broă khi lơh bơta do mờ să tờm ală mpồl lơh sa kă bro, kung bè anih lơh broă geh gơnoar, gơnoar atbồ kờñ pal dong kờl cau lơh broă sa bơta hơ̆ hơ̆ sồng cèng wơl cồng nha.

Mơya bơta geh ngan, tàm Dăk Lăk ală anih lơh bal tàm broă lơh gơlik phan lơh geh bơh suơn sre gam dùl ết, broă lơh ờ hềt dờng; bơcri priă ai lơh sa mờ măi mok lơh gơlik phan kung gam lơyah ờ hềt geh tơnguh uă priă lơh geh bơh phan lơh geh bơh lơh sa suơn sre bơh ală anih lơh bal dê. Bơdìh hơ̆ tai, bàr pe mpồl lơh sa kă bro, hợp ták xã ờ hềt jòi geh “drà tăc bro” kơ̆ kơljap den kal ke nàng pờ ơnàng ală anih lơh bal... Ngan là bè gah phan bơna ka kao, Dăk Lăk geh ù tiah tam tus 1 rơbô 200 lồ, mơya, bơta pràn lơh bal tŭ do mìng pa ơm wơl tàm khà dùl ết ngan pơgap 200 hìu bơnhă tus bal lơh bal bơh ală hợp ták xã, mpồl lơh bal dềt rah rài. Bơta do neh bơnah lơi lơh tơrmù ƀà khà phan bơna geh cồng nha tŭ tăc tàm drà kă bro.

Ồng Trương Ngọc Quang, Kwang atbồ Kông ty TNHH Ka Kao Nam Trường Sơn đơs là: Rề ơnàng ù tiah tam phan tŭ do tàm càr Dăk Lăk pơgap 1 rơbô 200 lồ den pal geh broă lơh tơrgùm rlau tai nàng bơtàu tơnguh lila uă rlau tai. Bơh hơ̆ dong kờl ai làng bol cau lơh broă sa halà ală hợp ták xã in dùl bă pràn kơl dang rlau tai nàng khi in gĭt wă là broă lơh bal là dùl tàm ală jơnau kờñ jal mhar mờ kờñ pal geh ngan tàm broă bơt bơtàu ală bơta kwơ nàng lơh tus lơh sa dùl bă kơ̆ kơljap.

Jat ồng Nguyễn Hoài Dương, Kwang atbồ Sở Nông nghiệp- Phát triển Nông thôn càr Dăk Lăk, tàm tơngai tŭ do, lơh ală anih lơh ban là broă lơh kwơ màng nàng lơh  “anih tăc bro” ƀuơn ƀoài ai phan bơna lơh sa suơn sre in. Nàng dong kờl bơtàu tơnguh ală anih lơh bal, Dăk Lăk neh mờ gam lơh ngan lam lơh jăt ală Nghị địñ bơh Cíñ phủ dê bè broă lơh pơn jờng bơtàu tơnguh lơh broă bal, lơh bal tàm broă lơh sa mờ tăc bro phan lơh sa suơn sre. Tàm hơ̆, tơrgùm sơlơ tơnguh ală broă lơh dong kờl tơnơ̆ dơ̆ bơcri lơh bè: tam phan, lơh gơlik phan, lơh mat kă bro mờ jòi gĭt tiah tờm lơh gơlik phan lơh geh bơh lơh sa suơn sre.

Ồng Nguyễn Hoài Dương pà gĭt: Mblàng yal dong kờl ai ală bơta uă ngan rlau jơh ai ală tiah, ală tiah tam phan tàm càr in. Ngan là ală tiah geh uă bơta ƀuơn, bơta pràn bè phan bơkah pơn rơ den ală broă tàm tơrbŏ bal tăc bro phan bơna là broă lơh kwơ màng ngan rlau jơh tàm broă bơt bơtàu ală anih lơh gơlik priă jền bơh phan bơna dê. Sền gĭt broă do Sở neh yal mờ Ủy ƀan Ñân zân càr in ring bal rơndap broă lơh dong kờl phan bơna, bơh hơ̆ tàm tơrbŏ bal mờ ală tiah, ală tiah tàm gùt lơgar nàng tăc bro phan bơna tàm tơngai tus.

Dăk Lăk tŭ do geh rlau 380 hợp ták xã lơh sa suơn sre mờ rlau 90 mpồl lơh sa kă bro tăc mờ blơi phan bơh lơgar ndai. Phan bơna lơh geh bơh lơh sa suơn sre càr neh  tăc tus 68 dà lơgar, ù tiah kơnhoàl tàm dunia, ngan là neh mŭt tàm ală drà kă bro dờng bè: Mỹ, Nhờk, Anh, Tây…. Do là ală tơngume kwơ màng tàm broă lơh bal ală anih lơh sa tàm broă lơh sa suơn sre. Dilah Dăk Lăk lơh niam bơta kwơ lơh jat ală anih lơh bal geh pơgồp bơnah kwơ màng tàm broă bơsong jơnau bè bơta niam phan lơh geh bơh lơh sa suơn sre, tơnguh uă bơta kwơ gơguh uă mờ bơtàu tơnguh lơh sa suơn sre dùl broă kơ̆ kơljap tềng đap ală bơta tam gơl bơh drà kă bro.