Càr Dăk Lăk tŭ do geh rlau 22 rbô 500 lồ ù tam sầu riêng, geh tus rlau 43% bă ù tam chi sa plai càr dê, plai lơh geh mờr 188 rbô tấn. Jơh gùt càr neh geh 49 mat tiah tam geh kĭ bal mờ bă ù ơnàng rlau 1 rbô 800 lồ mờ 17 anih ơn tàm kơldung sầu riêng tăc mờ lơgar ndai. Tơngai lài, broă pà măt khà tiah tam sầu riêng tăc mờ lơgar ndai tàm càr Dăk Lăk tìp bơta gơkòl, bal mờ mờr 40 sră nggal gơtìp gơkòl. Gơnoar ătbồ mờ gah lơh broă geh gơnoar tàm càr gam lơh pràn ală broă lơh tă bơsong nàng kờñ lơh geh tai ală tiah tam sầu riêng tơl bơta tăc uă di gùng mờ lơgar ndai.

Nhai 08 tus, càr Dăk Lăk rơ̆p geh pơgăp 9 rbô lồ sầu riêng tàm càr rơ̆p mŭt tàm kàl tơnhàu. Tàm tŭ, càr pa pà geh 63 măt khà tiah tam, kờp jơh bă ù ơnàng pơgăp 2 rbô lồ. Jơnau sồr gơ ai tơlik gơ wèt mờ ală tiah tam sầu riêng geh sền swì pà măt khà là ală bă ù pal ơm rềp bal, bal mờ bă ù ơnàng bơh 10 lồ rlau hơđang, ờ gŏ tam tàm bơrlŭ bal ală bơta chi sa plai ndai, lơh geh ală jơnau sồr bè gròi sền kòp phan tam. Bulah bè hơ̆, tài bơh sầu riêng tàm càr Dăk Lăk tam rah rài, tam tàm bơrlŭ bal mờ uă chi tam, lơh bal đah cau lơh broă sa mờ mpồl lơh sa kă bro ờ hềt lơh geh bơta song dơ pă loh làng bè đah adat boh lam, bơta sơgràm tam phan lơh gơlik bơta kal ke ai broă sền swì gĭt nền tiah tam di cau tam dê...gam kơryan tŭ tơngai pà măt khà. Bơh nhai 03 nam 2023 tus tŭ do, neh geh 40 sră nggal bơh 40 tiah tam sầu riêng dê dan pà mat...gơtìp gơkòl tài bơh ală jơnau do.

Nàng lơh mhar broă pà măt khà tiah tam, Ủy ƀan Ñân zân càr Dăk Lăk neh jàu kơnòl broă sền swì, sền swì tai tiah tam ai ală Cơldŭ Lơh broă sa sươn sre mờ Bơtàu tơnguh Ƀòn lơgar kâp kơnhoàl in; jàu Ci Kụk Tam phan mờ Sền gàr phan tam càr in bơyai lơh bơto pơlam tai ai jơh ală kwang bàng lơh kơnòl broă tờm in bè broă lơh do. Ồng Lê Văn Thành, Kwang ătbồ Ci Kụk Tam phan mờ Sền gàr phan tam càr Dăk Lăk, pà gĭt: bal mờ sầu riêng, càr gam geh broă rơndăp lơh pà măt khà tiah tam ai jơh ală bơta phan lơh geh bơh sươn sre pràn in den tàng broă bơto pơlam bè lơh mòn, pà mờ ătbồ măt khà tiah tam rơ̆p geh lơh mhar. Ồng Lê Văn Thành, Kwang ătbồ Ci Kụk Tam phan mờ Sền gàr phan tam càr Dăk Lăk, đơs: Ci Kụk Tam phan mờ Sền gàr phan tam bol añ geh jàu lơh anih lơh broă tờm pà măt khà tiah tam den bol añ neh jà Kụk Sền gàr phan tam tus nàng bơyai lơh pơn jăt tai bơto pơlam ơn in loh làng nền cê ngan ai ală kwang bàng lơh kơnòl broă tờm bơh kâp kơnhoàl dê in. Ală kwang bàng bơh ală hợp tak xã, kwang bàng bơh anih Tam phan mờ Sền gàr phan tam, Anih tờm Dong kờl bơto pơlam lơh broă sa sươn sre, Ci Kụk Bơtàu tơnguh ƀòn lơgar...jơh ală anih lơh broă geh gơrềng den bol añ ndrờm jà jơh.

Pa do, Mpồl sầu riêng càr Dăk Lăk kung neh bơyai lơh Pơrjum tàm tơrbŏ tăc bro phan bơna sầu riêng nam 2023. Tàm pơrjum, ala măt ală mpồl lơh sa kă bro mìng bè gah phan sầu riêng neh yal bè broă tam, blơi mờ tăc bro plai sầu riêng tàm ală càr tiah đah jum dà lơgar kàl nam 2023, jơnau bơsram mờng chài ai càr Dăk Lăk in, ală mờng chài bè bơtàu tơnguh ală anih lơh gơlik phan tàm broă lơh sa kă bro sầu riêng bơh bàr pe dà lơgar dê bơh broă lơh mờ tê, lơh niam dùl êt, prăp gàr tơnơ̆ tŭ tơnhàu, ală bơta ƀươn bơta kal ke tàm tŭ lơh gơlik phan lơh geh bơh sươn sre tăc mờ lơgar ndai. Ală Hợp tak xã, mpồl lơh broă bal yal bè ală broă lơh sa, mờng chài ătbồ, lam lơh broă hợp tak xã mờ ală kal ke tàm ală tŭ lam lơh tàm tiah tam.

Bal mờ hơ̆, Mpồl sầu riêng càr Dăk Lăk kung neh yal bè broă rơndăp lơh lam bơto pơlam lơh gơlik sầu riêng jăt tơl jơnau sồr tăc mờ lơgar ndai, jòi gĭt anih tờm lơh gơlik, dong kờl cau tàm mpồl tàm tơrbŏ lòt rê kă bro mờ ală mpồl lơh sa kă bro nàng lơh geh ală anih lơh gơlik phan tàm broă lơh gơlik gah phan sầu riêng bơtàu tơnguh kơ̆ kơl jăp. Tàm pơrjum do, Mpồl sầu riêng càr Dăk Lăk neh kĭ sră cih kah mờ Viện bơtàu tơnguh lơh sa sươn sre, Kông ty Bơcri priă bal măy mok phần mềm Autoagri mờ tơlik măt Anih yal tơngĭt jơnau bơh Mpồl dê tàm anih: Hiephoisauriengdaklak.org.vn nàng kờñ lơh tơ kwèng bal ală cau tàm Mpồl. Tus bal pơrjum lơh tơn kwèng, ồng Tống Văn Hiếu, Phó Kwang ătbồ dờng Kông ty Bơcri priă bal lơh gơlik phan lơh geh bơh sươn sre khà 1, kơnhoàl Krông Păch, càr Dăk Lăk, pà gĭt: Gơ wèt mờ mpồl lơh sa kă bro jờng rơ ngan mpồl neh ai tơl bơta lòt rê kă bro, tìp măt lơh kwèng bè do. Kơnờm bơh mpồl ai tơl ală bơta niam bè do rơp yal tơngĭt geh ală phan bơna tus mờ ală cau geh mờng chài bè sầu riêng in. Lài ngan, he pal jà geh ală cau geh mờng chài bè sầu riêng nàng jơh tơl nă cau in tă pơgồp jơnau đơs nàng he lơh sir niam ngan rlau jơh phan bơna tơnơ̆ hơ̆ sồng jà geh ală drà kă bro kal ke rlau.

Là càr geh tơl bơta pràn, bơta ƀươn nàng tam uă sầu riêng, tơngai lài, bal mờ broă lơh ngan dong kờl cau lơh broă sa tam phan geh cồng nha, gơnoar ătbồ mờ gah lơh broă geh gơnoar càr Dăk Lăk sùm sền gròi broă tăc bro phan bơna mờ giă niam ngan rlau jơh, kwơmàng là bơh broă lơh tăc uă mờ lơgar ndai di gùng. Bal mờ hơ̆, càr Dăk Lăk gam lam lơh rơndăp broă lơh Lơh tơrlòng lài tam sầu riêng ngui măy mok ngăc ngar mờ pơgồp bal lơh gơs broă lơh sươn sầu riêng gơ jăt bal mờ lòt nhơl nàng kờñ gĭt lơh broă sa sươn sre. Bơh hơ̆, geh ală rơndăp broă lơh bơto pơlam, pơlam jrô, dong kờl mờ bơsram ngan ngồn nàng lơh tơ kwèng bal cau lơh broă sa tam sầu riêng, ngui măy mok ngăc ngar tàm broă tam, lơh gơs sươn pơlam lơh lài mờ broă lơh sươn pơlam lơh lài sầu riêng gơ jăt bal mờ lòt nhơl lòt sền nàng gĭt lơh broă sa sươn sre. Jơnau kờñ bơh rơndăp broă lơh dê là tơnguh uă bơta gĭt wă bơh cau lơh broă sa jơi bơtiàn dùl êt nă cau dê mờ lơh bal bơtàu tơnguh lơh sa bal ngui tam gơl khà; lơh tơrlòng lài ngui măy mok ngăc ngar nàng jăt sền ală broă sơngka sền gàr sầu riêng mờ tus bal drà kă bro tàm internet.