Tàm dơ̆ lơh chờ kơphe Buôn Ma Thuột dơ̆ 8 nam 2023, drim ngai 10/3, tàm ƀòn dờng Buôn Ma Thuột, Hiệp hội kơphe Buôn Ma Thuột bơyai lơh Dơ̆ mut lơh pơrlòng klài kơphe bơkah Việt Nam nam 2023. Do là dùl tàm ală bơta tờm bơh Dơ̆ lơh chờ dê, pơgồp bơnah lam lơh jat jơnau kờñ ai Buôn Ma Thuột gơ gơs anih tus bơh kơphe dunia dê.

Geh lơh bơh ngai 10 tus ngai 13/3, dơ̆ pơrlòng geh 33 nă cau tus bal bơh 9 càr, ƀòn dờng tàm gùt lơgar, tàm hơ̆ geh 24 nă cau cih mat tus bal pơrlòng klài mờ Phin ờs mờng mờ 27 nă cau cih mat tus bal pơrlòng klài Pour V60 (hơ̆ là klài kơphe mờ sơn ròc mờ sră jồr). Dơ̆ pơrlòng nàng kờñ git gŏ, jờng rơ, yal tơnggit rùp hin ală cau jak chài tàm broă klài kơphe; tơnguh bơta kuơ bơh klài lơh gơlik dà kơphe bơkah dê, lơh jat jơnau kờñ ngai sơlơ uă bơh cau hùc dê; Yal tơnggit, bơtàu tơnguh gah lơh kơphe bơkah Việt Nam, niam chài kơphe Việt Nam pơgồp bơnah tơnguh tă dơ̆ ngui tàm lơgar mờ bơta kuơ bơh gah lơh kơphe Việt Nam dê.