Bal broă dum gờñ rlau ală càr tiah đah tô, plai gơ àl bơh cau lơh broă sa càr Dăk Lăk dê gam tăc geh giă jơnhoa, rlau 30 rbô đong dùl kĭ tàm sươn, lơh cau tam in chờ hờp ngan. Jơh gùt càr Dăk Lăk tŭ do geh mờr 2 rbô 600 lồ plai gơ àl, tàm hơ̆ pơgăp 1 rbô 400 lồ gam tàm tơngai gơ ai sa, geh tam uă tàm ală kơnhoàl: Ea Kar, Mdrak, Krông Pach mờ Krông Năng. Plai lơh geh kàl nam 2022- 2023 do digơlan geh 14 rbô tấn. Tŭ do, ală cau lơh sươn tam plai gơ àl Thiều sơntìl Lục Ngạn- Bắc Giang tàm càr Dăk Lăk gam pik mờ tăc plai gơ àl khà dùl geh 32 rbô tus 35 rbô đong dùl kĭ, khà II kung rlau 25 rbô đong sơl tàm dùl kĭ. Do là giă niam ngan tàm tŭ giă uă bơta phan plai chi tàm Dăk Lăk bè pơ ò, kruăc, rơpung kài...ờ gŏ kas. Bơdìh mờ broă tăc geh giă ngan, nam do, tờm plai gơ àl kung lơh geh cồng nha uă sơl bal mờ pơgăp bơh 12 tus 15 tấn dùl lồ.