Dăk Lăk tŭ do geh rlau 22 rbô 500 lồ sầu riêng mờ khà lơh geh rlau 200 rbô tấn, tơngai pik bơh lồi nhai 7 tus nhai 10 pah nam. Tus tŭ do, sầu riêng càr Dăk Lăk gam mut tàm kàl pik tơnhàu. Nàng ƀuơn ai broă tac hờ lơgar ndai in, Sở Nông nghiệp mờ Phát triển Nông thôn càr Dăk Lăk sồr Kụk sền gàr phan tam jàu mpồl lơh broă gơ wèt Kụk in lơh mpồl tờm đơng lam, sồr kwang bàng, rơndap ai phan bơna, măi mok ờs mờng tàm gah do lam lơh gròi sền kòp tu sa aniai mờ lơh sră nggal gròi sền kòp tàm càr ai ală khà sầu riêng càr Dăk Lăk in tàm kàl nam 2023.

Lài hơ̆, tàm dơ̆ lơh broă đah Kụk sền gàr phan tam mờ Sở Nông nghiệp mờ Phát triển Nông thôn càr Dăk Lăk, Mpồl tam klac lơh sầu riêng càr Dăk Lăk, Kụk sền gàr phan tam neh ring bal sồr kwang bàng mờ ai phan bơna, măi mok ờs mờng lam lơh gròi sền kòp tu sa aniai mờ lơh sră nggal gròi sền kòp tu sa aniai tàm càr ai ală khà sầu riêng bơh càr Dăk Lăk dê in.