Tàm ală tiah lơh sa suơn sre tờm càr Dăk Lăk dê, broă pơrlòng lơh geh cồng nha chờ gờm Pơrjum dờng Đảng dơ̆ XIV geh ai tơngŏ loh làng bơh tơl kàl lơh sa, tơl broă lơh sa geh cồng nha. Bi Lyby Niê Siêng, làng bol lơh broă sa tàm sàh Krông Búk pà git, làng bol chờ hờp ngan tềng đăp mờ ală cồng nha neh lơh geh mờ sùm wèt tus Pơrjum dờng mờ nùs nhơm geh kơnòl uă ngan. “Chờ hờp chờ gờm, sùm tàm pơrlòng lơh geh ală jơnau kờñ lơh, lơh bè lơi nàng cèng geh cồng nha ai làng bol in tàm mpồl làng bol lơh broă sa suơn sre càr Dăk Lăk dê, sùm geh bơtàu tơnguh niam ngan nàng pơgồp bal tàm broă bơ̆t bơtàu dà lơgar ngai sơlơ pas gơs niam bơnĕ rơlao”.

Nùs nhơm tàm pơrlòng chờ gờm Pơrjum dờng dơ̆ XIV Đảng dê kung lơh geh uă tàm ală mpồl lơh sa kă bro, tàm hơ̆ uă ngan là gah tăc phan geh lơh bơh broă lơh sa suơn sre mờ lơgar bơdìh – do là phan tờm lơh sa càr dê. Tàm Kông ty TNHH MTV Tăc phan mờ lơgar bơdìh ngai 02 nhai 9 Dăk Lăk (Simexco Dăk Lăk), kơnòl lơh sa, kă bro pơgồp bal mờ ală jơnau kờñ pơrlòng mùl màl. Ồng Nguyễn Tiến Dũng, Phó Kwang lam bồ Kông ty pà git: “Chờ gờm Pơrjum dờng Đảng, nhai do là bol añ ai jơnau kờñ là blơi geh 25 rơbô tấn mờ tăc mờ lơgar bơdìh rơlao 20 rơbô tấn mờ jơh ală tơrgùm cau lơh broă bơh đảng viên tus mờ kwang bàng cau lơh phan, cau broă nàng geh broă lơh mùl màl ai geh wơl priă geh kung bè là ai cồng nha lơh sa kă bro niam rơlao”.

Bal mờ mpồl lơh sa kă bro dà lơgar, tiah mpồl lơh sa kă bro cau dùl nă să lơh is kung ai tơngŏ loh broă tus bal mờ kơ̆p gơn tàm gùng dà broă lơh dờng bơh Đảng dê. Mò Dương Nữ Thiên An, Kwang lam bồ Kông ty TNHH kă bro phan mờ broă lơh drơng ala tăc mờ blơi phan mờ lơgar bơdìh Si Café pà git: “Tàm Pơrjum dờng dơ̆ XIV, tơrgùm uă ngan tàm broă lơh pràn gah lơh sa suơn sre. Den tàng să tờm mpồl lơh sa kă bro lơh tàm gah lơh sa suơn sre den bol añ kờñ lơh bal ngan. Tàm lơh sa, tàm kă bro, geh bal broă ai phan yal tus lơgar bơdìh bol añ kung dờp geh broă dong kờl uă ngan bơh ală gah broă. Tơngai tus do kơ̆p kờñ ngan rơ̆p geh dong kờl uă rơlao bơh ală broă dong kờl pa Dà lơgar dê”.

Bơh tàm mùl màl càr dê, ală tam gơl niam tàm broă bơtàu tơnguh lơh sa mpồl bơtiàn tàm ƀòn lơgar là cơng tàng pà gŏ niam ai geh cồng nha tàm gùng dà broă lơh bơh Đảng dê tàm tơngai do. Geh pơnrơ ngan là tàm sàh Ea Knuêc, càr Dăk Lăk. Nam 2025, sàh do lơh gơs mờ sơrlèt mờ ală khà broă geh ai bơtàu tơnguh lơh sa mpồl bơtiàn, khà gơguh lơh sa geh di pơgăp 10%, priă geh tơl nă cau gơguh sùm. Là sàh geh sền là “tiah tờm sầu riêng” càr Dăk Lăk dê, Ea Knuếc neh lơh geh tiah lơh sa suơn sre dờng ơnàng, pơgồp bal mờ lòt nhơl lơh sa suơn sre bal mờ tăc phan geh lơh bơh tàm drà kă bro điện tử, rề ơnàng drà kă bro phan mờ lơgar bơdìh. Mò Nguyễn Thị Cẩm Loan, Phó Củ tịc Duh broă sùm Anih duh broă Mặt trận Dà lơgar Việt Nam sàh Ea Knuêc kơ̆p kờñ: “pal đơs ngan là ưn ngài Đảng, Dà lơgar neh geh ală kơrnoăt bal mờ gùng dà broă lơh nàng ai làng bol lơh broă sa suơn sre bol añ in tàm khà rài kis bè ờs tơl ngui tơl sa, tŭ do gơtùi lơh pas… tàm hơ̆ uă ngan là tơnguh uă bơta kwơ nùs nhơm, phan bơna bơh làng bol dê, tơnguh rài kis, broă lơh rài kis broă lơh sa mpồl bơtiàn, lơh niam gah lơh sơnơm, bơto bơtê mờ geh nùs nhơm ring bal uă”.

Mờ nùs nhơm pràn tàm pơrlòng duh hồl, broă dùl nùs bal bơh làng bol lơh broă sa suơn sre, mpồl lơh sa kă bro bal mờ mpồl lơh broă cíñ trị dê, càr Dăk Lăk gam wèt tus Pơrjum dờng dơ̆ XIV Đảng dê mờ ală broă lơh mùl màl, pin dờn ală kơrnoăt bal mờ gùng dà broă lơh pa rơ̆p pơn jăt tai ai geh bơta pràn nàng gah lơh sa suơn sre, làng bol lơh broă sa bal mờ ƀòn lơgar bơtàu tơnguh kơl jăp.