Nam 2022, bi Nguyễn Thanh Đức tàm sàh Sông Lũy, càr Lâm Đồng sơn đờm lơh broă ròng lềl pơgồp bal mờ ròng rơgut nàng tăc poăc. Bi pà git: broă lơh do ngui bơta pràn boh ù tiah hìu nhă geh, drơng tàm broă kờñ bơh drà kă bro bal mờ pơgăp bal mờ broă tam gơl phan tam, phan ròng cèng cồng nha uă… Sơn đờm mŭt lơh broă mờ broă ròng lềl, tơngai sơnrờp bi Đức ờ hềt git ròng phan pa do den tàng kung gơtìp uă ngan kal ke. Mơya sền gŏ jơnau kờñ tàm drà kă bro geh ƀuơn, tăc ờ tơl jăt mờ jơnau kờñ den tàng bi neh bơcri tai priă nàng blơi phan, bơsram, kơlôi sơnơng nàng ròng mờ lơh is sơntìl, tăc tàm drà kă bro phan geh lơh uă rơlao. Bi Đức pà git, priă tă lài ngan tơl wàng ròng lềl (2 thơ̆k vuông tàm 1 wàng) tàm pơgăp 300 rơbô đong (tàm hơ̆ geh lòs, toal tang kao su nàng lơh wàng mờ tăp lềl).

Dùl nơm wàng ròng lềl tơnơ̆ mờ tŭ tàm pơgăp 35 ngai sền gàr gơtùi tăc. Phan sa ai lềl in là phan sa geh ngui nàng rơgut in, gơtùi ai lềl sa tai ală bơta biăp bè: rơpuôn, bùm lô, cồng bùm blàng, ñhơ̆t… pah ngai ai lềl sa 2 dơ̆ (drim mờ mho). Lềl ròng is, kloh, ờ hoan gơtìp kòp, mìng gơtìp hoàc huơr ờ uă. Nàng lềl kis dờng niam, wàng lềl pal rañ, àng niam, bañ gơtìp sùh mờ broă ngui nha prìt ro ha là phan đơ tăp iar… Bi Nguyễn Thanh Đức pà git: “Tơnơ̆ mờ tŭ kòp Covid-19 añ rê tơn ờ mŭt tàm Sài Gòn tai, rơcang wàng nàng ròng lềl tàm hìu bơh lài, añ tă priă lơh ơnàng tai wàng ròng nàng ròng rơgut, ngui phơng rơgut nàng sih tàm biăp, hơ̆ sồng ai biăp lơh phan sa lềl mờ rơgut in”.

Tŭ broă ròng lềl geh priă, bi Đức neh bơcri tai lơh wàng nàng ròng rơgut. Bi Đức pà git, ròng rơgut pal lơh wàng kloh niam, tiah ròng pal àng, ờ gơtìp jơngo nàng pleh mờ kòp. Broă ai rơgut in sa pal ndrờm bal mờ di tŭ, di lah ờ lơh gơrềng ờ niam tus mờ dơ̆ deh tăp. Bơh tŭ deh tus tŭ dờng deh tăp mìng tàm 50 ngai mờ tơngai geh tăp tàm bơh 7 tus 8 nhai là tam gơl mpồl ròng pa. Ala mờ broă ngui lơ̆ geh lơh uă, bi ngui lềl mờ pơgồp bal tam biăp nàng lơh phan sa rơgut in. Rơgut bi tăc tàm drà kă bro geh 12 rơbô đong tàm 1 nơm, uă rơlao mờ rơgut ròng uă 8 rơbô đong tàm 1 nơm. Bi Nguyễn Thanh Đức pà git: “Nàng ròng rơgut tăc geh cồng nha, den he ròng tơlik, pơgồp bal mờ ală phan sa tơlir bè: biăp, kơnuh, plai chi… nàng tơnguh bơta bơkah poăc; hơ̆ sồng bơtơl tai phan sa bơh ală bơta phan mờ tàm hìu neh geh lài bè lềl, ai sa tai nàng tơnguh bơta bơkah poăc. Den tàng rơgut tàm do is mờ rơgut ròng tàm gŭ jăt broă ròng uă ờs mờng dê”.

Broă lơh bơh bi Nguyễn Thanh Đức dê neh cèng geh uă priă kơl jăp, mờ gam rơhời geh lơh uă tàm sàh Sông Lũy, càr Lâm Đồng dê. Bi Nguyễn Mạnh Tường Huy, Ƀí thư Đoàn Ơruh pơnu sàh Sông Lũy pà git, bơdìh mờ broă pơlam ơruh pơnu bơtàu tơnguh, ròng uă broă ròng rơgut, tàm tơngai tus, sàh rơ̆p pơn jăt tai ai ală broă lơh sa pa, mùl màl tus mờ ơruh pơnu bal mờ làng bol lơh broă sa suơn sre in. “Broă lơh do neh lơh geh 2 nam, Đức ai bơh tiah ndai tus mờ tơnơ̆ mờ hơ̆ geh lơh sơntìl, sền gàr, ròng pơgồp bal mờ tam biăp nàng tăc. Jơh ală là tăc tàm internet. Do là broă lơh pa pơgồp bal mờ broă tus bal bơta chài kung bè sền gàr nền nòn. Do là broă lơh lài ngan, tàm tơngai tus rơ̆p hòi jà kung bè rề ơnàng broă lơh do dong kờl ală bơyô đoàn viên, ơruh pơnu in kờñ ròng nàng lơh broă mờ brồ guh lơh pas di pal”.

Ròng lềl pơgồp bal mờ ròng rơgut ƀuơn lơh, mờ ờ pal tă uă priă, gơdờp mờ ală ơruh pơnu kis tàm ală ƀòn. Bi Nguyễn Thanh Đức tàm sàh Sông Lũy, càr Lâm Đồng sùm rơcang bơto sồr bè bơtaa chài ròng kung bè ai sơntìl nàng ală cau lơi in kờñ ròng broă ròng phan “niam, krơi is” do.