Là dùl nă klau pơnu gùt nam rềp mềr lơh broă tàm sre, tàm mìr, mơya kơnờm lơh ngan lùp bơsram mờ ngăc ngar tàm broă lơh sa, khin cha ngui bơta chài pa tàm broă tam phan, bi K’ Đức, ơm tàm xã Đinh Trang Thượng, kơnhoàl Di Linh, càr Lâm Đồng gơ gơs làng bol jak chài bơh ƀòn dê mờ geh tơmŭt tàm mpồl Đảng. Tơnơ̆ tŭ là Đảng viên tơn, K’ Đức neh ngai sơlơ lơh jat gơnoar lam lài lơh krơh niam, jơh nùs hòi jà làng bol tam gơl rơndăp tăp sèng phan tam, tam biăp jat broă lơh tơnguh uă bơta kwơ phan bơna dê.

Bi K’ Đức, đơs:“Mờ gơnoar broă là Đảng viên kơnòm să, tàm tơngai pa do, añ neh lơh broă geh kơnòl ngan, jơh nùs tàm tơl broă lơh bơh Đảng ủy mờ kwang đơng lam bồ tiah do dê jàu. Tàm hơ̆, geh broă lòt lài tàm bơtàu tơnguh lơh sa, tam gơl rơndăp tăp sèng phan tam, tơnguh uă priă lơh geh mờ hòi jà làng bol lơh jat bal. Bè Wa Hồ neh bơto Đảng viên pal lòt lài nàng làng bol ƀòn lơgar in lòt jat bơh ngkời”.

Drờm bè hơ̆ sơl, Đảng viên K’ Ly, ơm tàm xã Tân Thượng, kơnhoàl Di Linh kung lơh niam ngan gơnoar broă lòt lài tàm bơtàu tơnguh lơh sa mờ rài kis nàng làng bol tàm ù tiah do in bơsram mờ mut lơh jat bal. Bơh ngai lơh geh cồng nha broă lơh tam ƀăng tơi jat sră dan blơi, suơn ồng K’ Ly dê gơ gơs tiah tus sền, gơ hòi gơ jà geh uă ngan làng bol tàm tiah do tus jòi gĭt. K’ Ly pà gĭt, kờñ tam gơl pa nùs nhơm bồ tơngoh tam phan bơh làng bol dê pal lơh nền mờ ală broă lơh geh ngan mờ ngan ngồn ngan. Ồng K’ Ly, đơs:“Nàng làng bol in geh tai priă lơh geh pah ngai, să tờm añ tam ƀăng tơi nàng ai phan tam lơyah ngai ròng phan tam jŏ nam, geh làng bol bơsram mờ lơh jat bal. Tŭ do, ƀăng tơi geh tiah tăc bro sùm, giă tăc bơh 70 rơbô đông tus 100 rơbô đông dùl kĭ, uă cau kă bro dan blơi tus tàm suơn tơn mơya ờ geh ƀăng tơi nàng tăc. Tàm tơngai tus, añ  rơ̆p pơnđơl pràn lơh ngan rề ơnàng broă lơh do nàng uă làng bol in geh priă jền pah ngan, gàr niam kơ̆ kơl jăp rài kis”.

Jat Đảng viên K’Brao, Ƀí thư Ci ƀộ thôn Hàng Ùng, xã Bảo Thuận, kơnhoàl Di Linh, broă lơh jat gơnoar lam lài bơh Đảng viên dê tàm bơtàu tơnguh lơh sa mờ rài kis tàm ală ƀòn lơgar jơi bơtiàn dồ ết nă cau là dùl tàm ală broă lơh kwơ màng ngan geh Đảng ƀộ kơnhoàl Di Linh is ồn sền gròi ngan lơh pràn lơh jat. Den tàng, kờñ tam gơl bồ tơngoh kơlôi sơnơng, broă lơh bơh làng bol dê, đảng viên tàm Ci ƀộ sùm cribơyai bal mờ lơh ală broă lơh lơh sa di pal mờ geh cồng nha. Geh bè hơ̆ làng bol hơ̆ sồng pin dờn mờ lơh jat. Đảng viên K’Brao, đơs: “Lài do, tài bơh tam kơphê ờng is mờ gar den tàng cồng nha tơnhào ờ uă. Bơh ngai ngui sơntìl kơphê pa sơntìl 138 kơphê bơkiar den tàng cồng nha tơnhào kơphê uă rlau pơndrờm mờ lài do. Làng bol gŏ lơh geh cồng nha den uă ngan cau bơsram lơh jat bal nàng bơtàu tơnguh lơh sa, bơtàu tơnguh rài kis”.

Kơnhoàl Di Linh tŭ do geh 4 rơbô 400 nă Đảng viên, tàm hơ̆ geh rlau 900 nă Đảng viên là làng bol kòn cau. Ngan là mpồl cau Đảng viên do là ală cau lam lài, sùm lam lài tàm tơl broă lơh, pơgồp bơnah lơh tam gơl bồ tơngoh kơlôi sơnơng broă lơh tàm ală mpồl bơtiàn jơi bơtiàn dồ ết nă cau, tă pơgồp jơh nùs tàm bơta bơtàu tơnguh lơh sa- mpồl bơtiàn bơh kơnhoàl Di Linh đơs is mờ càr Lâm Đồng đơs bal.