Tàm tiah brê tiah tờm sàh Măng Đen, càr Quảng Ngãi, lài do gơwèt kơnhoàl Kon Plông, càr Kon Tum, mpồl sền gàr brê tiah 6, Ci kụk Sền gàr brê càr Quảng Ngãi gam ngui flycam tàm broă atbồ, sền gàr brê mờ rơcang gàr ồs sa, mờ crùh ồs sa brê. Mìng tơnơ̆ bàr pe broă lơh gơgồp bal, phan lơh broă mhar par, kŭp geh rùp tơn nàng ai anih tờm lơh broă in. Bơh bơta ñhoa rơlao 100 thơ̆k, flycam dong kờl mpồl sền gàr brê sền gŏ tơrgùm jơh bă brê tam, di tŭ gŏ ală tiah di gơlan gơtìp ồs sa uă ha là geh tơngŏ sơgràm phan brê.

Di lah pơn drờm mờ broă lòt sền bè ờs, flycam dong kờl tềm pềr uă tơngai, bơta pràn. Tŭ geh jơnau yal lài gơtìp ồs sa, kwang bàng sền gàr brê gơtùi ai phan par tus rềp nàng sền, git tiah gơtìp ồs sa, bơta dờng bă ồs sa, bơh tŭ hơ̆ lơh jăt gùng dà broă lơh nàng bơsong mhar mờ di pal rơlao. Ờ mìng dong kờl rơcang lài gàr ồs sa, crùh ồs sa brê, flycam gam dong kờl gŏ gờñ ală broă mus mìr, kơl chi brê ờ di mờ adăt boh lam ha là ală bơta tơngŏ ni sơna tàm bơnah brê geh atbồ.

Bi Huỳnh Tú, cau sền gàr brê Mpồl sền gàr brê tiah 6, Ci kụk Sền gàr brê càr Quảng Ngãi pà git, flycam là phan dong kờl geh cồng nha, mơya lòt sền tơn kung gam là gơnoar kwơ màng ngan: “Pah ngai, cau sền gàr brê lơh jăt kơnòl atbồ, sền gàr brê, lòt sền. Mơya, broă ngui flycam dong kờl tŭ geh tiah gơtìp ồs sa, bol añ gŏ geh gùng nàng tus, tơrmù uă ngan bơta ngài, tus tềng tiah gơtìp ồs sa mhar rơlao. Tàm broă lòt sền, ală tiah mus brê lơh mìr kung geh gŏ gờñ rơlao”.

Bal mờ broă ngui măi mok, broă mblàng yal mờ pơgồp bal mờ làng bol kung geh ală mpồl lơh broă tờm brê sền gròi ngan sơl. Anih Atbồ sền gàr brê Măng Đen, Kông ty Lâm nghiệp Kon Plông tŭ do atbồ rơlao 9 rơbô 800 lồ brê, jòng ơnàng tàm rơlao 12 bă brê dềt, tàm tŭ mpồl lơh broă mìng geh 12 nă kwang bàng, cau lơh broă.

Ồng Trần Văn Thanh, Atbồ Anih Atbồ sền gàr brê Măng Đen pà git, ù tiah dờng ơnàng, mpồl lơh broă ờ gal den tàng mpồl sùm sền broă mblàng yal là gùng dà broă lơh kwơ màng ngan. Uă broă lơh geh tus bal tơn, ƀuơn wă geh lơh nàng dong kờl làng bol tơnguh jơnau git wă tàm broă sền gàr brê, rơcang gàr ồs sa, crùh ồs sa brê. Kơnờm mờ hơ̆, broă gơtìp tìs mờ adăt sền gàr brê bal mờ bơta di gơlan gơtìp ồs sa brê geh sền gròi tàm bơta ờ uă. “Anih Atbồ sền gàr brê Măng Đen lơh geh pang sră rùp rơcang gàr ồs sa brê, ai mpồl cau sền gàr ồs sa. Ală bă tiah di gơlan gơtìp ồs sa, bol añ tŏp ală jơnau yal kơrian ồs sa nàng làng bol in git do là tiah ngòt rơngơ̆t. Làng bol kờñ wàs chi, chu chi che geh suơn mìr rềp tềng brê den pal wàs chi che jăt gah brê lài, tơnơ̆ mờ hơ̆ yal mờ anih lơh broă sền gàr in. Tŭ hơ̆, anih lơh broă rơ̆p bơyô sồr làng bol tàm broă ngui ồs di mờ jơnau kờñ”.

Tàm Kông ty TNHH MTV Lâm nghiệp Kon Plông pà git, broă sền gàr brê geh lơh ndrờm bal uă gùng dà broă lơh, bơ̆t bơtàu geh gùng dà broă lơh jăt tơl tiah mờ ai mpồl lơh broă sền gàr tàm ală tiah di gơlan gơtìp ồs sa uă, tàm hơ̆ uă ngan là broă rơcang gàr lài ồs sa mờ crùh ồs sa brê. Ồng Nguyễn Văn Huynh, Lam bồ cơl dŭ lơh broă Bơta chài Kông ty TNHH MTV Lâm nghiệp Kon Plông pà git, mpồl lơh broă gam bơcri priă nàng blơi phan ai ală anih lơh broă sền gròi ồs sa brê in, rơcang lài ding sền, măi bruh nhơm mờ uă bơta phan geh kwơ nàng gŏ gờñ ñhŭ, ồs sa bơh ngài. Kơnờm mờ rơcang lài kơrian ồs sa, bơh bồ nam tus tŭ do, bă brê geh kông ty atbồ ờ hềt gơtìp ồs sa brê lơi. “Ală mpồl lơh broă gơwèt bal lơh jăt niam broă rơcang gàr ồs, crùh ồs sa brê tàm kàl prang. Bơh tŭ hơ̆, neh sền gròi, sền wơl jơh ală phan lơh broă, ală jơnau cih nàng di tŭ blơi, bơtơl, drơng broă rơcang gàr ồs sa, crùh ồs sa brê tàm kàl prang”.

Jăt jơnau kờp, bơh bồ nam tus tŭ do, càr Quảng ngãi gơtìp 3 dơ̆ ồs sa brê tàm ală sàh Bờ Y, Sơn Hà mờ Mỏ Cày. Ală dơ̆ ồs sa mìng tàm brê tam, geh mpồl lơh broă tàm do tơn kơrian pù ồs di tŭ.

Tŭ do gùt càr Quảng ngãi geh rơlao 900 rơbô lồ brê. Càr neh lơh pràn broă ngui măi mok bè yal lài gờñ, flycam, rùp bơh vệ tiñ; mờ rơcang tơl mpồl lơh broă, phan lơh broă jăt gùng dà broă lơh “4 tàm tiah tơn, 3 rơcang lài” nàng bơsong di tŭ tŭ geh ală bơta ờ niam gơlik geh. Ồng Nguyễn Khánh Ngọc, Lam bồ phó Ci kụk Sền gàr brê càr Quảng Ngãi pà git: “Dà lơgar atbồ ală bă brê rơcang gàr lài mờ brê lơh sa. Gơwèt mờ cau tờm brê mpồl 1 là hìu nhă, cau dùl nă să, mpồl bơtiàn ƀòn ơm kis mờ bă brê gam tai ờ hềt jào den geh Anih duh broă làng bol kấp sàh atbồ. Bơh bồ kàl prang, ală mpồl lơh broă neh ai tơl Mpồl sồr lơh, mờ bơ̆t bơtàu kơrnoăt boh lam pơgồp bal đah ală mpồl lơh broă gơrềng bal in”.