Pơrjum gơ hòi gơ jà mờr 400 nă cau ala mat là hìu bơnhă lơh broă sa suơn sre, mpồl lơh broă bal, mpồl lơh sa kă bro bal mờ ala mat uă sờh, gah broă lơh tus bal. Mờ jơnau kờñ rề ơnàng drà kă bro tac phan lơh gơs mờ tơnguh priă lơh geh phan bơh suơn sre càr dê, pơrjum nam do geh bơta tus bal bơh uă mpồl tac phan dờng bè Bách hoá Xanh, Central Retail - GO!, Proton mờ Vinanutrifood Bình Định. 

Mờr 50 phan lơh gơs bơh suơn sre tờm ngan, phan OCOP tơl bơta niam jat jơnau sồr bal mờ uă phan bơkah pơn rơ ngan bơh càr dê geh yal tơnggit tus ală mpồl lơh broă bal, mpồl lơh sa kă bro tac phan. Bal mờ tàm tơrbŏ bal lơh gơlik mờ blơi phan, ală gah bal mờ gơp cribơyai bè ală bơta pal geh bè lơh gơs tơl khà màh sồ tiah tam, jơnau sồr bè lơh sa tơlir, bal mờ ală broă lơh ai phan lơh gơs bơh suơn sre Gia Lai mut uă rlau tai tàm ală mpồl tac rah rài pa.