Là dùl tàm ală mpồl lơh sa kă bro lơh gơlik phan, tăc macca mờ lơgar ndai khà dùl tàm Dăk Lăk, Kông ty Damaca Nguyên Phương gĭt nền ală jơnau sồr bè niam sàng goh phan sa mờ sền swì kòp bơtờp phan kis, phan tam (SPS) tàm Jơnau kĭ hơ nền Tam klăc lơh broă bal Lơh sa Tơl làm Kơnhoàl ù tiah (RCEP) halà ală jơnau sồr bơta chài pa gam gơgơs bơta pal geh kis gơs nàng phan bơna gàr geh drà tăc mờ lơgar ndai. Tềng đăp jơnau sồr ngai sơlơ kal ke ngan bơh ală drà dê, mpồl lơh sa kă bro pal rơcăng lài bơtơl jơnau yal, tam gơl ală broă lơh gơlik nàng lơh geh jơnau sồr lơgar blơi phan dê. Jăt mò Nguyễn Thị Thu Phương, Kwang Lam bồ Kông ty dê yal, kal ke tŭ do ờ mìng là “gĭt jơnau sồr” mờ là lam lơh di mờ wil tơl tàm mùl màl, den tàng bè hơ̆ mpồl lơh sa kă bro kơ̆p kờñ geh ală gah gơnoar dong kờl, pơlam lơh jăt loh làng.

“Bol hi kơ̆p kờñ geh pơlam loh làng rlau tŭ ală jơnau sồr, jơnau lơh nền Cíñ phủ dê tam gơl. Mpồl lơh sa kă bro kờñ pal gĭt pal lơh jăt ală broă lơi, anih lơh broă lơi să tờm tơn dong kờl mờ geh ală gùng dà dong kờl lơi bè sră nggal, sră pơ àr halà priă pal tă. Tŭ geh bơta lòt bal mờ pơlam loh làng, mpồl lơh sa kă bro rơ̆p pin dờn rlau tàm broă bơcri priă, lơh sir ală broă mờ jun phan kă bro tus drà ală lơgar”.

Gơ wèt mờ ală mpồl lơh sa kă bro lơh gơlik, lơh gơlik phan mờ ơn prăp phan lơh geh bơh sươn sre tăc mờ lơgar ndai, is ồn là tăc tus drà lơgar Lo, bơdìh mờ jơnau sồr (SPS) gam pal lơh jăt Jơnau lơh nền Cíñ phủ dê 280 bè niam sàng goh phan sa bơh Tổng Kụk Sền swì phan tăc blơi mờ lơgar ndai lơgar Lo dê, rơ̆p geh ai lơh jăt bơh ngai 1/6/2026 do. Bơta tam gơl dờng ngan rlau jơh là mpồl lơh sa kă bro pal cih yal tàm ală anih CIFER tơnơ̆ tŭ geh anih lơh broă geh gơnăp gơnoar pà sră yal tơnggĭt, ala tài uă ngan sră nggal geh anih lơh broă ătbồ dong kờl bè lài. Bơta do gơ sồr mpồl lơh sa kă bro rơcăng lài lơh sră nggal dipal mờ kơrnoăt boh lam, lơh loh làng jơnau yal mờ kong kơnòl tơn bè bơta dipal mờ ală jơnau yal cih yal dê. Ngan bơta tam gơl bè gùng dà broă rơndăp lơh ătbồ do gam gơ tơlik ală jơnau pal lơh mùl màl bè bơta tàm pơdờn mờ bơta pơgồp bal đah ală gah. Ồng Huỳnh Phú, ala măt dùl mpồl lơh sa kă bro kă bro phan phan lơh geh bơh sươn sre yal ală jơnau kơlôi rơcăng bè đah bơta chài mờ sră nggal tàm pơn jăt tai.   

“Tŭ do, mpồl lơh sa kă bro bol hi gam lơh sră nggal dan pà màh sồ ơn klơm mờ neh pơyoa jăt ală broă sổ lơh gam geh ngui tŭ do. Bè hơ̆, tơnơ̆ ngai 1/6/2026, tŭ Jơnau lơh nền Cíñ phủ 280 ngan ngồn geh ai lơh jăt den mpồl lơh sa kă bro pal lơh wơl jơh ală sră nggal halà kung gam geh tàm pơdờn taih? Mờ dilah kung gơlik geh bơta gơkòl tàm ală tŭ lơh jăt mờ ală kụk mìng dùl gah, mpồl lơh sa kă bro mờ ƀòn lơgar rơ̆p lùp mờ anih lơh broă lơi nàng geh pơlam di tŭ ngan rlau jơh taih?”

Ală kơlôi rơcăng do bơh mpồl lơh sa kă bro dê pà gŏ jơnau kờñ jal mhar pal geh bè dùl broă lơh pơlam gơcèng bơta “ià tê sơnio broă” tŭ tơngai ai lơh jăt mờr tus rềp. Mblàng hơ ală jơnau kơlôi rơcăng do, mơkung đơs nền lơh ngan lòt bal bơh gah broă lơh sa sươn sre dê, ồng Ngô Xuân Nam, Phó Kwang Lam bồ Cơldŭ lơh broă SPS Việt Nam gơ wèt Ƀộ Broă lơh sa sươn sre mờ Tiah ơm kis, pà gĭt: mpồl lơh broă bal mờ ală gah geh gơrềng neh mờ gam jal mhar bơto yal jơnau yal, dong kờl mpồl lơh sa kă bro bơh broă lơh loh làng rùp hin hìu măy tus pràn jak ătbồ broă sră nggal. Bulah bè hơ̆, jăt ồng Nam, bơta gơkòl kwơmàng ngan rlau jơh tŭ do ờ gơ ơm tàm bơta ờ ƀươn soh bơh sră nggal dê mờ gơ ơm tàm bơta rơcăng lài mờ bơta dipal ngan bơh mpồl lơh sa kă bro dê tŭ lơh jăt gơnoar cih yal is:

“Mpồl lơh sa kă bro kờñ pal kơlôi sơnơng nền ală jơnau sồr mờ pơlam geh gơrềng. Añ đơs ngan là tŭ neh wờng di, wờng wil tơl ală jơnau sồr den broă cih yal rơ̆p ờ gŏ kal ke ir. Bulah bè hơ̆, sră nggal pal geh lơh loh làng ndrờm bal, bơh tìs akhar cih, jơnau yal cih yal tus rùp hin hìu măy, anih lơh gơlik. Mìng kờñ dùl tìs dềt rơhền ngan tàm sră nggal kung digơlan gơtìp đah cau lơh broă bal tơr wơl wơl. Tŭ mpồl lơh sa kă bro gĭt nền jơnau sồr, rơcăng nền mờ lơh jăt di tơn bơh sơnrờp den añ dòn mpồl lơh sa kă bro Việt Nam gơtùi lơm lơh geh niam ală jơnau sồr pa”.

Ƀộ Broă lơh sa sươn sre mờ Tiah ơm kis gĭt nền, gơ wèt mờ ală bơta phan tờm ngan bè sầu riêng, plai chi ris, phan sa trŭ gơm sin halà phan lơh geh bơh sươn sre geh lơh bơh phan tam, broă lơh geh niam ală jơnau sồr SPS rơ̆p dong tơrmù jơnau digơlan gơtìp yal tơngkah, tơr wơl wơl phan halà ơm ing tăc mờ lơgar ndai. Do kung là jơnau kwơmàng nàng gàr bơngă pin dờn ai phan lơh geh bơh sươn sre Việt Nam dê in tàm bơta tàm pơrlòng ală lơgar ngai sơlơ kal ke ngan.

Tàm đah sơlơ̆u wơl, ală jơnau sồr pal lơh kung gam lơh gơlik bơta pràn rồn bơklơn niam nàng gah broă lơh sa sươn sre rơndăp tăp sèng wơl jăt gùng song dơ pă loh làng, niam lơngăp lơngai mờ kơnhăp jŏ rlau. Tŭ mpồl lơh sa kă bro rơcăng lài tơngguh jơnau sồr bơta niam, ai anih lơh broă ătbồ sơlơ lòt bal, dong kờl di tŭ, phan lơh geh bơh sươn sre rơ̆p geh tai tŭ niam rề ơnàng drà mờ tơngguh uă anih ơm tàm muh măt ală lơgar.

Tàm pơrjum “Mblàng yal uă jơnau yal ală jơnau sồr bè niam sàng goh phan sa mờ sền swì kòp bơtờp phan kis, phan tam (SPS) tàm Jơnau kĭ hơ nền RCEP mờ Jơnau lơh nền Cíñ phủ 280 lơgar Lo dê” bơh Ƀộ Broă lơh sa sươn sre mờ Tiah ơm kis bơyai lơh tàm càr Dăk Lăk, ồng Võ Văn Hưng, Thứ trưởng Ƀộ Broă lơh sa sươn sre mờ Tiah ơm kis đơs wih đơs wơl, broă tă bơsong kal ke ai mpồl lơh sa kă bro in pal geh lam lơh jơh nùs kràñ cê lài mờ ngai 1/6/2026 do tơn nàng kờñ lơh bè lơi ờ lơh gơkòl lơh broă tăc mờ lơgar ndai phan lơh geh bơh sươn sre, brê bơnơm, phan tàm dà.

“Bol hi sùm hơ lòt bal mờ gơnoar ătbồ ƀòn lơgar, ală sờh, gah mờ mpồl bơtiàn mpồl lơh sa kă bro nàng rơcăng niam ngan rlau jơh, rơcăng lài ngan rlau jơh mờ crăp rơcăng ngan rlau jơh tàm lơh geh ală jơnau sồr. Jơnau kờñ là tơngguh uă cồng nha tăc phan mờ lơgar ndai, chồl pràn tăc blơi phan lơh geh bơh sươn sre ai làng bol in, bơh hơ̆ dong phan lơh geh bơh sươn sre Việt Nam dê tàm drà lơgar Lo kung bè ală drà ndai pơn jăt tai bơtàu tơngguh niam, lơh geh ală kơ̆p gơn pa tàm tơngai tus”.

Tàm bơta tăc phan mờ lơgar ndai pơn jăt tai là gơn kơnờm kwơmàng ai gơguh tai lơh sa in, broă gàr jơnau “pin dờn” tàm bơta niam phan bơna, lơh jăt niam ală jơnau sồr SPS mờ gơdờp mhar mờ ală jơnau sồr pa rơ̆p là gùng lòt nàng phan lơh geh bơh sươn sre Việt Nam dê in bơtàu tơngguh kơnhăp kơ̆, rề ơnàng drà mờ tă pơgồp geh cồng nha rlau ai rài lơh sa dà lơgar in.