99 mã sồ tiah tam bơh càr Gia Lai dê mìng geh ai ală bă ù tam prìt, plai màk, mrĕ, rơpung kào, thanh long,... Tàm hơ̆, prìt geh 26 mã sồ, bă ù rơlao 3 rơbô lồ; plai màk geh 19 mã sồ, bă ù tam geh mờr 600 lồ; mrĕ geh 20 mã sồ mờ mờr 300 lồ...

Bal mờ mã sồ tiah tam, ală mpồl lơh sa kă bro tàm càr Gia Lai neh dan cih măt 24 mã sồ hìu klơm dăp, mờ kờp jơh bơta pràn di pơgăp 700 tấn plai ris tàm 1 ngai. Kơnờm geh dờp tơl jơnau yal bè tiah tam mờ hìu klơm dăp, phan geh lơh bơh broă lơh sa suơn sre càr Gai Lai neh geh tăc mờ gùng tờm tus uă drà kă bro bè: Lo, Australia, Mỹ, Mpồl tam klăc câu Âu... Ală kơnhoàl, thị xã, ƀòn dờng tàm càr Gia Lai gam pơn jăt tai bơ̆t bơtàu ală tiah tam jăt jơnau kờñ VietGAP, dong kờl làng bol lơh broă sa, mpồl lơh sa kă bro lơh sa suơn sre dan cih măt mã sồ tiah tam mờ hìu klơm dăp nàng tơnguh bơta niam tăc phan geh lơh bơh broă lơh sa suơn sre mờ lơgar bơdìh càr dê.