Tiah kòp jê ndul gơ jroh sur câu Phi geh tàm hìu bơnhă ròng sur ồng Bùi Đức Hoạch, ơm tàm thôn 1, xã Ea Kao, ƀòn dờng Buôn Ma Thuột, càr Dăk Lăk. Hìu bơnhă ồng Hoạch geh ròng 23 nơm sur, tàm hơ̆ geh rlau 10 nơm rcang tăc. Cồng nha sền wì kòp bơtờp mờ virus kòp jê ndul gơjroh sur câu Phi. Jơh ală sur kòp neh geh tơ̆p pơrgŭc tàm mho ngai 22 nhai 08.

Ồng Hoàng Anh Dũng, Kwang atbồ Anih Ròng phan gah lơh sơnơm phan ròng ƀòn dờng Buôn Ma Thuột, càr Dăk Lăk pà gĭt: bal mờ tơ̆p pơr gŭc ală sur kòp, mpồl lơh broă neh pơgồp bal mờ gơnoar atbồ tiah do lơh dơ̆ mblàng yal ai ală hìu bơnhă ròng sur in. Sồr cau lơh sơnơm gah ròng phan ƀòn lơgar gĭt loh ù tiah, bơto pơlam cau ròng sur in ngui ală broă lơh rcang lài kơryan kòp, tơ̆p pơrgŭc di broă gơwèt mờ sur chơ̆t dilah geh.