Tus tŭ do, jơh gùt lơgar neh geh rlau 50 rơbô mpồl lơh sa kă bro lơh broă tàm gah lơh sa suơn sre. Mơya, nàng gơ hòi gơ jà mpồl lơh sa kă bro mŭt bơcri tàm gah broă do ờ di là bơta ƀuơn ờ, ngan là ală tiah kơh bơnơm, tài lơh sa suơn sre là gah lơh sa kong uă bơta gơrềng hoàc huơr bơh trồ tiah lơh aniai mờ bơta kòp jê. Den tàng bè hơ̆, nàng gơ hòi gơ jà mpồl lơh sa kă bro bơcri lơh tàm gah lơh sa suơn sre kờñ pal geh ală broă lơh kràñ cê jơh nùs mờ dùl ròt bal.

Càr Hà Giang geh đơs là càr geh uă bơta ƀuơn mờ bơta pràn nàng tam uă phan lơh sơnơm kwơ. Là cau kòn cau Tày, mờ nùs nhơm kờñ brồ guh lik klàs rƀah, bi Lê Thị Hồng Liễu neh jòi mờ lùp bơsram, lơh bal mờ uă oh mi cau ùr ndai nàng tam uă phan lơh sơnơm geh lài tàm càr do dê. Tơnơ̆ tŭ crơng gơs Hợp ták xã rề ơnàng tiah tam phan lơh sơnơm, bi neh lơh anih lơh gơlik gơs ală bơta cê thảo mộc tăc ai năc lòt nhơl in. Tŭ do, phan bơna lơh sơnơm bơh Hợp ták xã bi dê neh geh tăc tus drà kă bro lơgar Nhờk mờ geh làng bol lơgar bơkào anh đào dờp rò. Uă broă lơh pa, bơceh lơh, tus tŭ do Hợp ták xã bơh bi dê neh dong mờr 30 nă cau ùr lơh broă, uă ngan là làng bol kòn cau, geh broă lơh mờ geh priă jền sùm.

Bi Lê Thị Hồng Liễu, Kwang atbồ Hợp ták xã phan lơh sơnơm Sơn Ý, xã Đạo Đức, kơnhoàl Vị Xuyên, càr Hà Giang pà gĭt: Geh bơh ală bơta geh ngan tàm ù tiah añ dê hơ̆ là kơh bơnơm uă lơm. Dơ̆ 2 là hơđơm mbur chi brê den geh bơta ƀuơn ai bol añ in uă ngan. Bol he neh lời tĕ tàm bơta là mŭt ngui ală bă brê bè hơ̆. Den tàng, añ kung neh lòt jòi gĭt ală tờm chi gơtùi cèng wơl cồng nha lơh sa là uă ngan. Tŭ do là geh 4 phan bơna bơh bol añ dê neh geh cau nàng lơh sră cih mat nàng lơh broă bal tăc tàm drà kă bro lơgar ndai dê. Tàm lơgar, bol añ tơrgùm tàm ală phan bơna tàm ù tiah do dê. Lài ngan là phan rơco sŏ lơh mờ phan lơh sơnơm bol añ lơh gơlik tàm do là ală phan lơh geh bơh 21 bơta tờm chi lơh sơnơm tàm ù tiah do dê tơn.

Tŭ do, jơh gùt càr Hà Giang geh rlau 1 rơbô 500 ală bơta phan lơh sơnơm, geh rlau 39% khà phan lơh sơnơm bơh gùt lơgar dê. Hà Giang neh sền gĭt, phan lơh sơnơm là dùl tàm 5 tờm chi tam tờm ngan bơh càr dê. Do là tơngume kwơ màng nàng Hà Giang in pơnđơl pràn lơh ngan gơ gơs tiah tờm dà lơgar bè bơtàu tơnguh phan lơh sơnơm pơgồp bal mờ broă tơn jơh jơgloh tơrmù rƀah tàm ală kơnhoàl 30a dê. Ồng Vũ Tiến Hiếu, Phó Kwang atbồ Sở Nông nghiệp mờ Phát triển Nông thôn càr Hà Giang pà gĭt:

Dơ̆ 1 là sền gĭt ală tờm chi tam nang lơh phan lơh sơnơm geh di pal mờ ai lài nàng bơtàu tơnguh, lơh sir ală broă lơh bơto pơlam bơta chài nàng lam tam, sơng ka sền gàr phan lơh sơnơm tàm ù tiah càr Hà Giang dê. Dơ̆ 2, hơ̆ là dong kờl ală mpồl lơh sa kă bro, mpồl lơh sa kă bro hợp ták xã tus bal tam, pĭc, lơh gơlik, lơh geh ală mpồl lơh gơlik phan gơwèt mờ phan lơh sơnơm. Dơ̆ 3 là tă pơgồp jơnau đơs ală gùng dà broă lơh, broă sền sơ wì ală anih lơh bal nàng lam lơh lơh bal lơh gơlik phan mờ tăc bro phan bơna.

Tŭ do, càr Hà Giang neh rơndap tiah tam phan lơh sơnơm mờ ai tơlik ală broă lơh dong kờl lơh bal gah lơh sa suơn sre, jat ală anih lơh gơlik phan kwơ, gơ hòi gơ jà uă mpồl lơh sa kă bro tàm càr mờ bơdìh càr tus bal bơcri priă tam, lơh gơlik phan lơh sơnơm mờ kông nghệ kao, mờ ală broă lơh pa, lơh geh ală jơnau sồr kal ke ngan nàng bơtàu tơnguh kơ̆ kơljap mờ jŏ jòng. Dùl tàm ală mpồl lơh sa kă bro bơcri priă lơh uă ngan tàm gah lơh sa suơn sre tàm càr Hà Giang dê hơ̆ là Kông ty Kổ phần lơh sơnơm Bông Sen Vàng. Geh bơta dong kờl ai ală bơta bơh ală sở, ngàñ mờ kấp ủy, gơnoar atbồ tiah do dê, mpồl lơh sa kă bro do neh bơcri lơh hìu măy lơh gơlik phan lơh sơnơm mờ bơta ơnàng 2 rơbô thơk vuông tơl khà GACP dê.

Ồng Bàn Văn Sơn, cau Atbồ gah lơh gơlik phan, Kông ty Kổ phần phan lơh sơnơm Bông Sen Vàng pà gĭt: Kông ty geh gùng dà broă lơh lơh bơh broă bơh chờm bơh phan lơh sơnơm dê. Phan lơh sơnơm digơlan là tiah tam phan bơh kông ty dê. Kông ty bơcri priă lơh is, lam lơh is halà phan lơh sơnơm hơ̆ là broă lơh bal mờ ală hìu bơnhă, ală hợp ták xã halà ală mpồl hìu bơnhă nàng gơtùi geh broă lơh di pal. Bơdìh mờ hơ̆, gơwèt mờ kông ty den kông ty kung bơtàu tơnguh tai dùl gùng lòt pa. Hơ̆ là broă phan lơh sơnơm do mờ jat tơl jơnau sồr bơh sơnơm tơm ba dê, tơl jơnau sồr Sền sơ wì sơnơm niam dê.

Ală mpồl lơh sa kă bro tŭ bơcri priă tam uă phan lơh sơnơm tàm Hà Giang, rơ̆p geh dong kờl 100% priă cồng càn priă nàng lơh suơn ờng sơntìl, tơngai dong kờl 36 nhai. Ngan là, Hội đồng Ñân zân càr Hà Giang ai lơh jat Nghị quyết sồ 209 dong kờl tam phan, lơh gơlik phan uă ngan rlau jơh là 15 tơmàn đong ai dùl hìu măy lơh gơlik phan lơh sơnơm in, dong kờl 30% priă dia ù tiah tam phan, tiah tam phan lơh sơnơm ai ală hìu măy lơh gơlik phan lơh tàm ală tiah in, tàm tơngai 60 nhai. Sền gŏ ală bơta ƀuơn ngan hơ̆, Kông ty Kổ phần bơtàu tơnguh lơh sa suơn sre, brê bơnơm mờ tiah ơm kis Việt Nam kung neh bơcri priă lơh mpồl lơh gơlik phan kông nghệ kao, sơn tìl phan tam, tơnguh uă cồng nha tơnhào mờ bơta niam bơkah bơh phan lơh geh bơh lơh sa suơn sre dê.

Ồng Cao Văn Quỳnh, Phó  Kwang atbồ Kông ty Kổ phần bơtàu tơnguh  lơh sa suơn sre, brê bơnơm mờ tiah ơm kis Việt Nam pà gĭt: Jat jơnau yal den bè khà phan lơh sơnơm tŭ do bơh Việt Nam dê pa mìng geh pơgap 20% khà phan lơh sơnơm nàng lơh gơlik phan lơm. Dơ̆ 2 tai là geh bơh broă là cồng nha bơh ală broă tam tờm chi brê bơnơm, tam brê, cèng wơl cồng nha lơyah ngan, den tàng kông ty neh bơcri tàm gah phan lơh sơnơm hơ̆ nàng tăc dùl bơnah dềt rơhền bè khà phan lơh sơnơm ai Việt Nam in, sơnơm hơ̆ geh tiah lơh gơlik. Dơ̆ 3 là nàng tơnguh uă cồng nha tam phan tàm brê bơnơm ai làng bol in mờ cèng wơl bơta kwơ lơh sa.

Mờ bơta ƀuơn bơtàu tơnguh phan lơh sơnơm bơh càr Hà Giang dê, mơya ờ di là jơh ală mpồl lơh sa kă bro lơi kung bơcri tàm gah do ndrờm geh cồng nha lơm ờ. Ủy ƀan Ñân zân càr Hà Giang neh ai lơh jat uă broă lơh, gùng dà broă lơh pơn jờng, lơh geh ală bơta nàng bơtàu tơnguh gah lơh sa suơn sre brê bơnơm phan bơna. Ngan là ală bơta dong kờl lời ai mpồl cau, mpồl lơh sa kă bro in bơcri priă bơtàu tơnguh. Gơtùi đơs là, broă gơ hòi gơ jà mpồl lơh sa kă bro bơcri tàm gah lơh sa suơn sre, mơkung ai lơh jat ală broă lơh bơtàu tơnguh lơh gơlik phan lơh geh bơh gah lơh sa suơn sre, hơ̆ ngan là bơta dong kờl ai bơtàu tơnguh gah lơh sa suơn sre càr Hà Giang in.