Gam tơnhàu 1 lồ mờ nggùl rơpung kài mờ hìu bơnhă apah ù nàng tam tàm thị trấn Phú Túc, kơnhoàl Krông Pa, ồng Nguyễn Văn Kính (tus bơh càr Phú Yên) muăt jrùm ngan tài bơh rơpung kài nam do ờ geh tơnhàu. Ồng pà gĭt, kung tàm bă ù do sơl, kàl lài, trồ tiah niam, tơl nơm plai rơpung kài tŭ tơnhàu kơn jơ̆ tus 8 kĭ mơya namdo rơpung kài nggờc rlau uă ngan. Ồng Nguyễn Văn Kính, đơs: Añ lơh rơpung kài 12 nam do rao, nam geh nam ờ, mìng is nam do gơtìp ờ geh tơnhàu. Làng bol lơh rơpung kài tàm do den uă ngan là bơcri priă kung bơh priă lèng càn ngân hàng dê sơl, làng bol kung tơngộ đau tus nam tơnơ̆ rơ̆p lơh wơl, dilah geh tơnhàu uă tăc geh giă den rơ̆p tơm jơh priă dồs.

Bơh thị xã An Nhơn, càr Bình Định lòt tus ndo apah 3 lồ ù tàm xã Ia Mlăh, kơnhoàl Krông Pa, càr Gia Lai nàng tam rơpung kài, bi Nguyễn Nhật Tân muăt jrùm yal, bơcri priă tam 1 lồ rơpung kài bơh sơnrờp tus dì tŭ tơnhàu pơgăp 150 tơlak đong. Kàl do mìu uă, rơpung kài ờ ring bal den tàng cồng nha lơh geh kờp bal mìng geh bơh 30 tus 34 tấn tàm dùl lồ lơm, giă blơi bơh 3 tus 3 rbô 500 đong dùl kĭ. Kờp dŭ jơh, kàl lơh rơpung kài nam do, bi Tân hoàc hươr 60 tơlak đong. Bi Nguyễn Nhật Tân muăt jrùm yal: Nam do trồ tiah ờ niam ir den tàng lơh ờ geh cồng bè ală nam lài, lài do, 1 lồ tơnhàu geh pơgăp 40 tấn rơpung kài, nam do tơngai prang dùl êt ir den tàng rơpung kài ờ niam den tàng cau lơh sươn hoàc hươr, dùl lồ hoàc hươr pơgăp jơ̆t nđờ tus bàr jơ̆t tơlak đong.

Tŭ do, jơh gùt kơnhoàl Krông Pa geh rlau 1 rbô lồ rơpung kài mờ plai lơh geh pơgăp 40 rbô tấn. Ồng Võ Ngọc Châu, Kwang ătbồ Cơldŭ Lơh broă sa mờ Bơtàu tơnguh Ƀòn lơgar kơnhoàl Krông Pa pà gĭt, mờr bè jơh ală bă ù tam rơpung kài là bơh làng bol bơh tàm tiah ndai dê tus apah ù nàng tam is, ờ gŏ geh tàm rơndăp ù tiah bơh kơnhoàl dê. Bal mờ hơ̆, cau kă phan tus blơi rơpung kài jăt broă lơh khăt gơboh is, ờ gŏ geh kĭ sră hơ pơrgon den tàng gơnoar ătbồ mờ gah lơh broă geh gơnoar ờ gơtùi ai geh ală gùng dà broă lơh, dong kờl ai cau lơh broă sa in. Ồng Võ Ngọc Châu, đơs: Lài hơ̆, mìu sùm den tàng rơpung kài gơtìp gơ pồt nha den tàng plai ờ geh niam den tàng bè hơ̆ làng bol gơtìp hoàc hươr. Uă ngan làng bol tàm Bình Định mờ Phú Yên lòt tus ndo apah ù tàm ù tiah kơnhoàl Krông Pa, ờ gŏ di là bơh làng bol tàm do dê tam den tàng kal ke tàm broă hòi jà ală hìu bơnhă tài bơh cau lòt tus ndo mìng apah ù nàng tam lơm den tàng kal ke ngan ătbồ.