Tus tŭ do, càr Kon Tum neh bơtàu tơngguh geh mờr 11 rbô 300 lồ tờm chi lơh sơnơm, tàm hơ̆ is ồn bă ù tam tờm kơnuh sơnơm Ngọc Linh là rlau 2 rbô 400 lồ. Priă lơh geh bơh tờm chi lơh sơnơm neh dong gĭt nđờ rbô hìu jơi bơtiàn dồ êt nă cau tàm ală kơnhoàl: Tu Mơ Rông, Kon Plông, Đăk Glei brồ guh lik klàs rƀah, pơgồp bơnah bơtàu tơngguh lơh sa- mpồl bơtiàn tàm tiah sar lơgar ngài bơh càr dê.

Tŭ do, càr Kon Tum gam kơlôi sơnơng, lơh bàr pe broă dong kờl krơi is dong kờl làng bol bè sơntìl, bơta chài, lơh phan…nàng rề ơnàng bă ù mơkung tơngguh uă priă jền phan bơna bơh tờm chi lơh sơnơm. Nàng ai tơl bơta broă bơtàu tơngguh tờm chi lơh sơnơm in pal rề ơnàng anih lơh gơlik sơntìl. Tàm tŭ hơ̆, giă sơntìl kơnuh sơnơm Ngọc Linh jơnhoa ngan; 1 gar sơntìl geh giă pơgăp 100 rbô đong, 1 tờm chi kòn 1 sơnam 300 rbô đong. Tài bè hơ̆, Kon Tum kờñ ngan gơhòi gơ jà cau bơcri priă tàm gah broă do, hơ̆ sồng bơ̆t bơtàu geh tiah tờm chi lơh sơnơm geh bă ù dờng.