Kơnhoàl tiah nhàr dà lơgar Ngọc Hồi, càr Kon Tum tŭ do geh 199 Anih biến áp gùng che ồs đèng 3 pha. Mơya ală Anih biến áp 3 pha do mìng geh tàm ală gùng dờng, gùng mŭt tàm ƀòn mờ tàm ƀòn ơm kis, gam tàm ală tiah lơh sa suơn sre hờ bơdìh ƀòn ờ hềt geh bơcri priă nàng duĭ che ồs đèng.

Ồng Đinh Cao Cường, Ƀí thư Huyện ủy kơnhoàl Ngọc Hồi, kwang bàng HĐÑZ càr Kon Tum pà git, tàm dơ̆ sền ù tiah bơh anih lơh broă tờm dê pà gŏ, gùt kơnhoàl geh rơlao 3 rơbô hìu làng bol lơh sa suơn sre mờ kờp jơh bă ù ơnàng rơlao 4 rơbô lồ gam kờñ ngan geh gùng che ồs đèng lòt gan, mơya ờ hềt geh gùng che ồs đèng 3 pha nàng drơng tàm broă lơh sa. Do là bơta làng bol bal mờ cau tĕ khà neh uă dơ̆ geh jơnau dan: “Tàm ală dơ̆ tus tìp mờ cau tĕ khà mờ kwang bàng ala măt HĐÑZ càr tàm kơnhoàl Ngọc Hồi dê, cau tĕ khà neh uă dơ̆ dan gah lơh ồs đèng tus sền nàng lơh gùng che ồs đèng 3 pha nàng ai ồs đèng geh bơta pràn uă ai ală hìu làng bol lơh sa suơn sre tàm bă ù dờng ơnàng nàng drơng tàm broă tuh dà in geh niam. Añ kung git broă kờñ ngui ồs đèng nàng lơh sa tŭ do kung gam kờñ ngan tàm ờ uă tiah ndai”.

Tŭ do, gùt càr Kon Tum geh 182 tiah lơh sa suơn sre bơdìh ƀòn ơm kis kờñ geh lơh gùng che ồs đèng 3 pha. Nàng gơtùi lơh gùng che ồs đèng 3 pha ai jơh ală tiah lơh sa suơn sre do in, gah lơh ồs đèng càr Kon Tum pal lơh niam wơl, lơh pa di pơgăp 267 kơi sồ gùng che ồs đèng trung áp, 366 kơi sồ gùng che ồs đèng hạ áp, 219 anih biến áp 3 pha... mờ kờp jơh priă tă nàng lơh kờp dŭ geh rơlao 624 tơmàn đong.

Ồng Lê Như Nhất, Kwang atbồ Sở Kông thương càr Kon Tum pà git, jơnau kờñ bè priă nàng lơh gùng che ồs đèng 3 pha tŭ do sơrlèt mờ bơta pràn bơh gơnoar atbồ bal mờ gah lơh ồs đèng dê: “Gơwèt mờ broă bơcri priă nàng lơh gùng che ồs đèng 3 pha drơng lơh sa hờ bơdìh ƀòn ơm kis tŭ do gơtìp kal ke ngan ờ geh jơnau geh ai, kơrnoăt geh ai nàng bơcri priă. Den tàng priă geh nàng tă bơh gah lơh ồs đèng dê den kung ờ gơtùi tă tàm tiah do. Ală tiah mìng lơh sa tờm den geh uă ngan hờ bơdìh ƀòn ơm kis, den tàng pal geh uă ngan priă mờ gah lơh ồs đèng ờ tơl pràn. Do là bơta gơkòl mờ bơta kòl dờng ngan do tàm broă lơh jăt”.

Nàng bơsong bơta gơkòl do, jơnau kờñ geh priă bơcri lơh gùng che ồs đèng 3 pha ai ală tiah lơh sa suơn sre hờ bơdìh ƀòn ơm kis wèt mhar ngan tus mờ jơnau kờñ lơh a broă lơh sa suơn sre, jăt Sở Kông thương càr Kon Tum kờñ lơh ndrờm bal uă broă lơh, mùl màl bè: dan mờ Tổng Kông ty điện lựk miền Trung ai lài priă bơcri; gah lơh ồs đèng càr Kon Tum dong kờl bơta chài nàng lơh ală mpồl hìu tă is priă in nàng tă priă lơh gùng che ồs đèng 3 pha tus tàm tiah lơh sa; hòi jà geh bơta pràn bơh mpồl bơtiàn mờ hìu lơh sa, kă bro; gơnoar atbồ ală kấp geh broă dong kờl lơh gùng che ồs đèng 3 pha gơwèt mờ ală tiah tam phan pơgồp bal mờ tơnguh uă bơta kwơ phan geh lơh; tàm broă rơndăp lơh ù tiah geh ai pal geh sền gròi tus mờ broă ai ală tiah tam phan tàm ală tiah geh ƀuơn lơh gùng che ồs đèng 3 pha in lài.