Tơngai do gam mŭt tàm tơngai prang dờng bơh kàl prang dê, gah lơh broă sa sươn sre càr Kon Tum neh rơcăng ală gùng dà broă lơh tam dră mờ trồ prang ai chi tam kàl mrềt prang nam 2022- 2023 in. Càr Kon Tum tŭ do geh 178 nơm bơtơ̆t tơnau dơng dà kung gam gàr tơl dà tuh ai rlau 16 rbô 600 lồ chi tam ală bơta in. Bulah bè hơ̆, tài bơh bàr pe broă bơ̆t bơtàu broă đơng pơlam kơnờm tàm dà pơdơng den tàng digơlan rơ̆p gơlik geh jơnau ờ tơl dà tuh tàm lồi kàl. Yal lài, bơh tŭ do tus lồi kàl prang, geh pơgăp 250 lồ chi tam rơ̆p gơtìp ro kơnrañ. Nàng tơrmù uă ngan rlau jơh bơta ờ tơl dà tuh tàm lồi kàl, gah lơh broă geh gơnoar neh rơcăng ală gùng dà broă lơh tam dră mờ trồ prang ai chi tam in, bè: lam tuah wàs brong ai dà mờ tuah wàs hiòng dà hòr nàng gàr niam gùng dà hòr tus tàm brong dà; ai măy ƀồm dà nàng ƀòm jơh dà gam tàm tơr è tơnau dà lồi kàl prang.