Wèt tus hờñ chờ tơngkah kir sơnrai 94 nam ngai tơlik mat Mpồl tam klăc cau ùr Việt Nam mờ Ngai Cau ùr Việt Nam 20/10, ngai 8/10, tàm ƀòn dờng Kon Tum, Mpồl tam klac cau ùr càr Kon Tum bơyai lơh Ngai cau ùr sơnđờm mut lơh broă mờ tơn jơh dơ̆ pơrlòng cau ùr sơnđờm mut lơh broă nam 2024 mờ tơngume “Cau ùr Kon Tum lơh jat niam phan kwơ tàm ù tiah mờ tam gơl tơlir”.

Tus bal dơ̆ pơrlòng geh 48 jơnau kơlôi sơnơng, tàm hơ̆ 28 jơnau kơlôi sơnơng tus bal dơ̆ pơrlòng sơnđờm mut lơh broă kấp càr, 20 jơnau kơlôi sơnơng tus bal kấp Dà lơgar. Mờ rơndăp broă lơh lơh sa, lơh gơlik ală bơta plai chi, biăp bùm kơnuh plai đo mờ phan lơh sơnơm sàng goh tàm càr Kon Tum, rơndăp broă lơh bơh bi Nguyễn Thị Minh Ngọc, Mpồl tam klăc cau ùr xã Đăk Hring, kơnhoàl Đăk Hà lơh geh khà 1 dơ̆ pơrlòng dê. Mpồl bơyai lơh dơ̆ pơrlòng kung jàu 1 khà 2; 2 khà 3 mờ 6 khà pơn jờng ai ală rơndăp broă lơh sơnđờm mut lơh broă geh uă bơta ƀuơn, bơta pràn. Nàng lơh ngan ngồn ală jơnau kơlôi sơnơng, rơndăp broă lơh sơnđờm mut lơh broă bơh cau tàm mpồl dê, Mpồl tam klăc cau ùr càr Kon Tum neh dan mờ Ngân hàng Cíñ sác Xã hội dong kờl 28 jơnau kơlôi sơnơng geh tus bal mờ ală priă càn dong kờl ờ sa priă cồng uă mờ kờp jơh khà priă 7 tơmàn đong.