Bơdìh mờ 3 nơm kơnrồ neh chơt, 29 nơm kơnrồ gam wơl bơh hìu bơnhă ồng Nguyễn Thanh Phong dê ơm tàm thôn Kinh tế mới, xã Tu Tra, kơnhoàl Đơn Dương, càr Lâm Đồng ndrờm gơ ơm tàm bơta jê ndul gơ jroh, rơgai ờ sô, ờ bài sa, tàm hơ̆ bàr, pe nơm kơnrồ digơlan chơt khat tàm tŭ lơi. Rlau 10 ngai do, hìu bơnhă neh hoàc uă ngan priă jền blơi sơnơm tơmba sơm kòp mơya ờ geh cồng nha. Ồng Phong pà git, nàng ròng mpồl kơnrồ do, hìu bơnhă neh tơrgùm jơh priă jền prap gàr geh bơh uă nam do, càn tai Anih priă jền dê 3 tơmàn đông. Tŭ do, mpồl kơnrồ nggùl den chơt, nggùl den gơbàn kòp tài cit sơnơm vaccine, ờ gơtùi pat dà toh, den tàng broă lơh sa hìu bơnhă dê gơtìp pơhìn kơn jơ̆ ngan: “Mpồl kơnrồ 32 nơm den 3 nơm chơt neh tơp pơrguc, 3 nơm kơnrồ ndai gam ơ sô ờ suài bè do. Kơnrồ dà toh tŭ do gơbàn wơl kòp, ờ bài sa, gơbàn jê ndul gơ jroh tàm 5, 6 nơm kơnrồ tai. Añ pơlai soh ngan, priă jền đơs ngan là ờ geh, mìng càn priă bơh anih priă jền mờ priă tềm pềr, tă pơgồp tàm do. Tŭ do gơbàn bơta bè do den ờ git tơnơ̆ do kis bè lơi tai. Kơp kờñ ală kâp gơnoar atbồ sền sơ wì hoàc huơr làng bol dê nàng geh broă lơh dong kờl”.

Ndrờm bè hơ̆ sơl, mò Huỳnh Thị Kim Phượng ơm tàm thôn Lạc Nghiệp, xã Tu Tra, kơnhoàl Đơn Dương kung ờ git lơh bè lơi tŭ sền gŏ mpồl kơnrồ dà toh hìu bơnhă dê piam dồ bă. Tơnơ̆ tŭ cit sơnơm vaccine rơcang lài kơryan kòp as sồt kơltau gơlik pơ nời tàm ngai 31/7, jơh 76 nơm kơnrồ dà toh ndrờm gơbàn kòp jê ndul gơ jroh. Bulah hìu bơnhă neh blơi sơnơm tơmba rlau 20 tơlak đông pah ngai mơya mpồl kơnrồ kung ờ bời kòp sơl, 8 nơm kơnrồ neh chơt. Mò Phượng đơs là, kơnrồ kòp mờ chơt là tài cit sơnơm vaccine rơcang lài kơryan kòp as sồt kơltau gơlik pơ nời lơh gơbàn den tàng pal geh tơm wơl hoàc huơr: “Ờ hềt git là gam nđờ nơm kơnrồ tai chơt, tài tus tŭ do neh nđờ jơt ngai mờ kơnrồ sùm piam bè do den sền bè kơp chơt, mbè gơtùi dong tai. Ngai lơi kung sền mpồl kơnrồ piam dồ bă, hìu bơnhă kung gơ chul nùs ngan ờ git pal lơh bè lơi. Tŭ do bơta kơp kờñ hìu bơnhă dê là mpồl kơnrồ gơtìp bè do là tài sơnơm vaccine, gơnoar atbồ geh broă lơh dong làng bol in sồr mpồl tac sơnơm vaccine pal tơm wơl hoàc huơr làng bol in”.

Jat tàm ală tềl tơnggŏ bơh sơn rờp, reh kham sền tềl kòp lời wơl, cồng nha xét nghiệm mờ mblàng sền git rơndpa tap sèng gen, Kụk Lơh sơnơm phan ròng gơ wèt Ƀộ Broă lơh sa mờ Bơtàu tơnguh ƀòn lơgar bơh sơn rờp geh jơnau pơn dut jơnau lơh gơbàn kòp jê ndul gơ jroh tàm mpồl kơnrồ dà toh tàm càr Lâm Đồng là tài bơtờp Pestivirus tauri tơnơ̆ tŭ cit sơnơm vaccine NAVET-LPVAC bơh Kông ty NAVETCO dê. Mùl màl, cồng nha xét nghiệm git gŏ 24 tàm 24 gri sơnơm vaccine do ndrờm bơ tờp mờ Pestivirus, do là jơi virus lơh gơbàn kòp jê ndul gơ jroh tàm mpồl kơnrồ. Bal mờ hơ̆, Kụk Lơh sơnơm phan ròng kung pà git, ờ git gŏ khat dùl bơta virus, vi khuẩn lơh gơbàn kòp lơi tàm ală bơta phan siam mờ kañ vi siñ ngui ai kơnrồ dà toh in.

Tŭ do, bơta kòp jê ndul gơ jroh mờ chơt tàm Lâm Đồng kung gam pơn jat tai gơlik geh kal ke, pah ngai lơh hoàc uă ngan priă jền tus broă sơm kòp. Bulah bè hơ̆, ndrờm bè làng bol kung gam pal kơlôi rơcang is tơl bơnah priă jền sơm kòp mpồl kơnrồ in.