Jat ồng Lê Văn Đông, Kwang atbồ dong kờl bơto pơlam cau lơh broă sa xã An Nhơn, kơnhoàl Dà Teh, bơdìh mờ ală sơntìl plai rơpung kài bè ờs, kàl rơpung kài nam do làng bol gam tam tai sơntìl rơpung kài pơrhê ờ geh gar. Do là plai rơpung kài gam geh cau ngui sa kờñ ngan den geh uă ngan cau kă bro jòi blơi.

Bal mờ bơta kờñ tàm drà kă bro, broă tam rơpung kài jat broă lơh pa, hữu kơ, ngui ală phan tuh dà is, tuh dà ntờc neh pơgồp bơnah cèng wơl cồng nha lơh sa uă ai cau tam rơpung kài in. Tiah tam rơpung kài tờm ngan càr Lâm Đồng dê là 2 kơnhoàl Dà Teh mờ Cát Tiên, mờ kờp jơh bă ù ơnàng 300 lồ, gơguh uă rlau 2 dơ̆ pơndrờm bal dùl tŭ mờ nam lài. Tŭ do, làng bol gam rcang tơnhào rơpung kài nàng tăc tàm drà kă bro sa tềp dà lơgar mờr rê tus.