Tơnơ̆ ală ngai lơh ngan tơmut dà srồm, sơnơm tơmba wil tơl jat jơnau pơlam bơh cau lơh sơnơm phan ròng dê, mpồl kơnrồ bơh hìu bơnhă ồng Nguyễn Đình Sơn ơm tàm thôn Bồng Lai, xã Hiệp Thạnh, kơnhoàl Đức Trọng neh rơhời pràn wơl. Bơdìh mờ 2 nơm kơnrồ gơtìp kòp jroă neh chơt, rlau 10 nơm kơnrồ gam wơl tàm mpồl neh gơtùi sa nhơt. Bulah bè hơ̆, bơta mờ ồng Sơn kơlôi rơcang ngan là rlau là geh kơnrồ pơhìn gơbàn wơl kòp: “Cit sơnơm vaccine ngai 25/7, tus ngai 02/8 den geh tềl tơnggŏ ờ bài sa, tus ngai 04/8 den jơh dùl mpồl sang tĕ sa jơh tơn. Tơngai kòp gơbàn kơn jơ̆ ngan rlau jơh, jê ndul gơ jroh là ngai 07/8 jŏ jòng tus ngai 09/8 den kơnrồ chơt 2 nơm. Tŭ do kơnrồ uă ngan geh sa đau, mơya geh dùl nơm gơbàn wơl kòp dơ̆ 2 tàm pơgap 3 ngai do ờ bài sa”.

Ndrờm bè hơ̆ sơl, bơdìh mờ 4 nơm neh chơt, 232 nơm kơnrồ dà toh gam wơl bơh hìu bơnhă mò Lê Thị Ánh Hồng dê ơm tàm  thôn Bồng Lai, xã Hiệp Thạnh, kơnhoàl Đức Trọng, càr Lâm Đồng kung neh sơrlèt ing bơta sơbơng roh. Bàr, pe nơm neh sa dồ êt đau. Jat mò Hồng yal, bơta tềng đap mat là pal geh jơnau pơn dut bè kơnòl tơm wơl, dong kờl hoàc huơr ai cau ròng kơnrồ in: “Cau lơi là cau lơh gơlik sơnơm hơ̆ den pal kong kơnòl mờ làng bol, pal tơm wơl kơnrồ làng bol in. Tŭ do đơs là kòp bơtờp mơya ờ git là kòp lơi. Kơnrồ añ dê lài do ờ tơl nhơt nàng siam gơ in sơl, mờ tơnơ̆ hơ̆ den kơnrồ lơi cit sơnơm ndrờm gơbàn kòp lơm. Tŭ do kung gam 2, 3 nơm ờ bài sa, drim do kung pal tơmut dà srồm sơl. Tŭ do, nđờ nơm kơnrồ neh sơm bời den uă kơnrồ gơbàn wơl kòp, dilah gơbàn wơl kòp là chơt tơn gơ dê”.

Kờp tus jơh ngai 12/8, càr Lâm Đồng geh 5 rbô 350 nơm kơnrồ dà toh gơtìp kòp jê ndul gơ jroh mờ 237 nơm kơnrồ chơt, tơrgùm uă ngan tàm 2 kơnhoàl Đơn Dương mờ Đức Trọng. Do là ală kơnrồ ndrờm geh cit sơnơm vaccine NAVET-LPVAC rơcang lài kơryan kòp as sồt kơl tau gơlik pơnời tàm tơngai bơh ngai 22 tus ngai 31/7/2024.

Jat ồng Hoàng Sỹ Bích, Kwang atbồ Sở Broă lơh sa mờ Bơtàu tơnguh ƀòn lơgar càr Lâm Đồng pà git, sơnơm vaccine NAVET-LPVAC rơcang lài kơryan kòp as sồt kơltau gơlik pơnời bơh Kông ty Kổ phần sơnơm phan ròng dà lơgar (NAVETCO) gơ kờn tàm pơrlòng giă mờ tac. Tơngai tàm pơrlòng giă mờ tac sơnơm vaccine do ndrờm lơh jat tơl làm broă rơndap lơh mờ lơh jat ală jơnau sồr bơh adat boh lam dê. Ồng Hoàng Sỹ Bích pà git, bulah bơh sơn rờp đal git broă cit sơnơm vaccine geh gơ rềng tus kơnrồ lơh gơbàn kòp jê ndul gơ jơh, mơya hơ̆ là jơnau lơh gơbàn kòp mờ chơt halà ờ den pal kơp jơnau pơn dut bơh đah anih lơh broă mờng chài: “Bơh khà kờp jat sền tus tŭ do, jơh khà kơnrồ dà toh gơbàn kòp ndrờm gơ ơm tàm mpồl kơnrồ neh cit sơnơm vaccine kơryan kòp as sồt kơltau gơlik pơnời, ală kơnrồ ờ cit den ờ gơbàn kòp. Bulah bè hơ̆ he ờ gơtùi pơn dut ờ, pal geh cồng nha sền sơ wì mờ pal geh anih lơh broă geh gơnoar geh kơnòl yal mờ sră nggal. Bol hi kung neh sồr, nàng gơ in loh làng den pal geh bơta sền sơ wì is. Dilah jơnau gơbàn kòp tài cit sơnơm vaccine den bol hi rơp sồr mpồl lơh sa kă bro tơm wơl hoàc huơr làng bol dê”.

Bơdìh mờ 2 kơnhoàl Đơn Dương mờ Đức Trọng, kơnhoàl Lâm Hà mờ ƀòn dờng Bảo Lộc bơh càr Lâm Đồng dê kung sơn đờm geh kơnrồ dà toh gơtìp jê ndul gơ jroh tơnơ̆ tŭ cit sơnơm vaccine kơryan kòp as sồt kơltau gơlik pơnời. Tàm hơ̆, tàm kơnhoàl Lâm Hà neh geh 2 nơm kơnrồ dà toh chơt. Tŭ do, broă lơh rơcang lài kơryan kòp jê ndul gơ jroh tàm kơnrồ dà toh bơh càr Lâm Đồng dê gam geh ală mpồl lơh sơnơm phan ròng bơh dà lơgar mờ càr dê jơh nùs lam lơh.