Sơrbăc mhar tàm broă pĭc plai prìt sơkò dờng, niam nàng pơn diang cau tus blơi in, lŏ Trần Thị Lan, kis tàm thôn 2, xã Cư̆ Drăm, kơnhoàl Krông Bông, càr Dăk Lăk pà git, mờr 4 nam do, tờm prìt sơkò neh gơs phan tam tờm cèng geh uă priă kơl jăp ai hìu nhă lŏ in. Bơh 12 lồ ù tam lài do mìng geh tam kơphe, pơgăp mờ do 5 nam, lŏ Lan neh càn 50 tơlăk đong bơh ngân hàng cíñ sác xã hội kơnhoàl Krông Bông nàng tam gơl tam 7 lồ prìt sơkò sơntìl Cayenne. Tơnơ̆ nam sơnrờp lŏ neh geh mờr 300 tơlăk đong. Gŏ tam prìt sơkò geh cồng nha, lŏ rơhời tơm jơh dồs mờ pơn jăt tai càn priă nàng tam gơl 5 lồ ù gam tai tam prìt sơkò. “Lài do añ tam tờm kơphe, tơnơ̆ mờ hơ̆ den tờm kơphe sền gàr ờ jai ir, den tàng añ tam gơl tam prìt sơkò. Di lah pơn drờm mờ phan tam ndai den añ gŏ prìt sơkò ờ hoan kal ke ir, priă tă ờ uă rơlao, phơng ờ uă rơlao, cồng nha cèng wơl geh uă rơlao mờ tờm kơphe. Añ càn Ngân hàng cíñ sác den añ gŏ là priă cồng ờ uă, tŭ añ càn nàng tam prìt sơkò den tơm priă cồng ờ uă rơlao pơn drờm mờ tŭ añ càn hờ bơdìh”.

Tàm xã Cư̆ Drăm geh uă dòr ù rơđeh gam geh kơl dìng bơh ală suơn prìt sơkò dê tàm uă sơnam krơi is bơh làng bol dê. Lŏ Nguyễn Thị Kim Yến, kis tàm thôn 2, xã Cư̆ Drăm pà git: bă ù tam prìt sơkò gam geh rề ơnàng tàm 2, 3 nam pa do. Ờ sŭk bè broă tăc phan geh lơh tŭ bă ù tam gơguh mhar, làng bol kis tàm do neh kơlôi tus mờ gùng dà sơnka sền gàr nàng prìt sơkò geh tơnhào rah rài uă dơ̆, nàng cồng nha bal mờ priă tăc geh kơl jăp rơlao. “Tàm do mìng là tam prìt sơkò tài gŏ gơdờp rơlao jơh mờ ală bơta phan tam ndai. Tam prìt sơkò do ƀuơn, tam ƀuơn, tờm prìt sơkò ƀuơn hòn. Tàm Cư̆ Drăm geh uă ngan bă ù tam prìt sơkò, den tàng pal lơh geh plai ờ di kàl. He pal tam cah, pah dơ̆ he lơh ờ uă den hơ̆ sồng he tăc geh priă, mờ cồng nha geh uă rơlao, priă tăc kung gơguh sơl, ờ gơtìp cau blơi rồn bơklơn priă tăc”.

Bal mờ tờm prìt sơkò, làng bol kis tàm xã Cư̆ Drăm tam tai uă bơta phan tam ndai gơdờp mờ ù tiah bè tờm chi keo, tờm điều, tờm chi sa plai; ròng phan tàm tiah mƀur chi brê. Jăt jơnau kờp, xã Cư̆ Drăm tŭ do geh 700 lồ ù tam tờm keo, 800 lồ ù tam prìt sơkò tàm ù dòr, 120 lồ ù tam tờm chi sa plai bè sầu riêng, plai gơ-àl, plai jràng lồng, plai kroăc... Là tiah ngài mờ rơlao 2 rơbô hìu, rơlao 10 rơbô nă làng bol, tàm hơ̆ làng bol kòn cau geh rơlao 80%, xã Cư̆ Drăm geh sền gròi, hòi jà uă priă tă nàng dong kờl tơnguh bơtàu lơh sa. Tàm hơ̆, priă càn bơh ngân hàng cíñ sác do là priă càn geh uă làng bol rơwah ngui tài priă cồng ờ uă, sră nggal lơh ƀuơn, ƀuơn càn. Ồng Trần Đức Ánh, atbồ mpồl càn priă thôn 2, xã Cư̆ Drăm pà git: “Mpồl thôn 2 den geh 52 hìu càn mờ tŭ do priă jơnkah dồs là 2 tơmàn đong. Gơwèt mờ ù tiah do sùm là ai càn nàng ròng phan mờ tam phan. Ală cau tàm mpồl den heh lơh jăt broă bơsong priă bơh să tờm tàm broă ngui di bè jơnau hơ tŭ càn priă”.

Jăt mò Nguyễn Thị Thanh Huyền, Phó kwang atbồ Ngân hàng Cíñ sác xã hội kơnhoàl Krông Bông yal, tus tŭ do, priă jơnkah dồs ai càn tàm xã Cư̆ Drăm là rơlao 30 tơmàn đong, mìng bơcri tàm broă ròng kơnrồ me deh kòn mờ tam phan. Làng bol lơh ngan tàm broă lơh sa, ngui priă càn di mờ jơnau kờñ den tàng ală priă càn lơh geh cồng nha, di pal mờ jơnau kờñ càn priă bơh làng bol dê. Ờ mìng tàm xã Cư̆ Drăm, priă càn bơh ngân hàng cíñ sác, bơh ală broă lơh kung geh tam pà bơh uă gah broă ai càn tàm kơnhoàl Krông Bông dê nàng làng bol ƀuơn càn mờ ngui priă. Bơh tŭ hơ̆, tơnguh uă cồng nha tàm broă bơcri priă lơh sa, kă bro. Mò Nguyễn Thị Thanh Huyền đơs: “Bol añ gam ai càn tus 12 broă lơh ai càn priă, tơrgùm uă ngan là 3 broă lơh: hìu rơƀah, hìu ndrờm mờ rơƀah mờ hìu pa klàs mờ rơƀah bal mờ hìu lơh sa kă bro tàm tiah kal ke. Ai lài ngan bè 3 broă lơh rơƀah. Broă bơcri priă bơh cau atbồ mpồl ai càn priă mờ ală mpồl lơh broă. Ală cau do geh đơng lam ală dơ̆ pơrjum mpồl, sền wơl broă kờñ càn là nền nòn ngan. Làng bol tơriang ngan mờ lơh ngan lơh broă sa, den tàng ngui priă di mờ jơnau kờñ dan càn priă, cèng geh cồng nha lơh sa ai hìu làng bol in, ờ hoan kal ke bơh hìu nhă làng bol dê. Mờ dơ̆ bàr tai là tơnguh bơtàu lơh sa tàm ƀòn lơgar”.

Mờ broă tơriang tơriồng, ờ ngòt glar bòl lơh ngan jòi sền, uă làng bol kis tàm xã tiah ngài Cư̆ Drăm neh tus bal tàm broă tam gơl phan tam, phan ròng nàng tơnguh priă geh tàm rài kis, tơnguh bơtàu lơh sa ai hìu nhă in. Priă geh bơh ală broă ai càn sa priă cồng ờ uă neh dong kờl làng bol geh tai priă nàng rề ơnàng lơh sa, geh tai gùng dà broă lơh pa nàng pơgồp bal tàm broă lơh pràn lơh sa tàm ƀòn lơgar tơnguh bơtàu.