Nàng tơnguh bơtàu geh bơta kwơ tơngời mờ bùm blàng, tơngai do Tập đoàn De Heus lơgar Hà Lan neh sền tiah tam phan tàm 3 càr tiah Tây Nguyên, tàm hơ̆ geh: Dăk Lăk, Gia Lai mờ Kon Tum.

Bơh broă tus sền pà gŏ, tơngời mờ bùm blàng gam geh uă bơta niam nàng tơnguh geh bơta kwơ tŭ tus bal tàm mpồl lơh phan sa phan ròng in, tơmù bơta kal ke tàm phan sa blơh bơh lơgar bơdìh. Ồng Nguyễn Như Cường, Kụk atbồ Tam phan đơs là: Tây Nguyên là tiah ƀuơn nàng tơnguh bơtàu ờ uă bơta phan tam lơh phan sa tơlir siñ khối bè: tơngời, bùm blàng. Nàng pơrlòng mờ ală bơta phan tam ndai tàm tiah do pal lơh bè lơi tơnguh geh cồng nha lơh sa. Kờñ bơ̆t bơtàu geh tiah lơh phan sa dờng di pal mờ broă lơh sa mờ măi mŏk pal bơ̆t bơtàu broă lơh pơgồp bal đah làng bol lơh broă sa, hợp ták xã bơh tŭ hơ̆ geh pơgồp bal mờ mpồl lơh sa kă bro lơh gơs phan mờ tăc phan geh lơh.