Gùng dă mờ bêtông dềt wĕt rơwe lòt gan ƀòn Đại Lộc, sơnah ƀòn Bình Thuận, càr Lâm Đồng (lài do là sàh Hàm Hiệp, kơnhoàl Hàm Thuận Bắc, càr Bình Thuận) dê. Bàr đah gùng geh ală bă suơn tam bơkào mai dờng ơnàng neh lì bơkào nàng hòi nam pa tus. Tơnơ̆ Satềp, tŭ ală ntê bơkào mai neh gơjrùh, do kung là tŭ geh uă hìu nhă jun oh kòn kòn sao lòt bơsram sră, lòt lơh broă tàm tiah ngài, pơrgon tìp wơl kàl tơrgùm bal tàm nam tus.

Hìu nhă mò Trần Thị Nhẽ geh 8 nă kòn. Gơwèt mờ mò, pah dơ̆ 30 tờm bơkào mai tềng đăp ƀlàng hìu lì bơkào là dùl dơ̆ nùs nhơm chờ hờp: “Nam pa gŏ bơkào mai là chờ hờp ngan. Bơkào mai añ tam bè do là oh kòn añ dê lòt lơh broă tàm tiah ngài tàm 20 Satềp là rê gal ngan, tơrgùm bal jơh tàm hìu chờ hờp ngan”.

Bơkào mai lì, satềp tus. Bơkào mai jrùh, Satềp jơh. Mờ cau tam tờm bơkào mai tàm Hàm Hiệp, sơnah ƀòn Bình Thuận, càr Lâm Đồng kờp tơngai ờ mìng kờp mờ ngai nhai, mờ kòp mờ nam, sơnam bơh tờm bơkào mai dê. Hìu nhă bi Hồ Đắc Thuận, pe rơnàng kis đềt mềr mờ broă lơh, tŭ do sơnka sền gàr mờr 1 rơbô tờm bơkào mai dờng dềt tàm bă suơn ơnàng mờr 1 lồ. Bi Hồ Đắc Thuận kah sơnam bơh tơl tờm bơkào mai dê, tàm hơ̆ geh tờm bơkào mai dờng rơlao 80 nam, ai tơngŏ bơh rài ồng bi dê neh tus tàm ù tiah do: “Nam lơi kung bè hơ̆ sùm, gŏ bơkào mai lì là gŏ Satềp, ală cau chờ hờp ngan, rê satềp nam pa. Rài ồng lài do neh geh tờm bơkào mai tàm do bloh. Bơta niam chài tam bơkào mai bơh ƀòn do dê den añ pơnyờ să ngan bè sơntìl bơkào mai do. Bơkào mai añ dê tàm do den geh bơh 5 tus 18 bơkào, ƀô bơkah krơi is ngan. Pah nam cau bơh Bình Định, Huế, Đà Nẵng, bơh tàm tiah đah Jum măt tơngai mŭt tus tàm do dan blơi tờm bơkào mai gal ngan”. 

Ƀòn bơnkào mai Hàm Hiệp, sơnah ƀòn Bình Thuận, càr Lâm Đồng geh git nđờ rơhiang hìu làng bol, git nđờ jơ̆t nam do kis đềt mềr mờ broă tam tờm bơkào mai. Satềp nam pa nam Ơseh 2026 neh lòt gan ƀòn bơkào mai Hàm Hiệp, rài kis rơhời rê wơl mờ bè ờs bal mờ ală làng bol lơh broă sa sơnka sền gàr tờm, koh ntê, tam tờm bơkào mai. Tơl bơkào mai gơjrùh ờ mìng tơn jơh dùl kàl tơrgùm bal, mờ gam pờ geh nùs nhơm pin dờn ai rài kis rê wơl tàm nam pa tus do in.